محيّـا

عمت ممسى يا المقام العف .. محمود السجية لارجهنت خشع الابصار لك والشعر ثاير حطّ رحلك لا تعبت من السنين السرمدية التعب مخلوف والعيضة مقابيل البشاير للحزن والصدق في وجيه القصايد: قابلية والقصايد تشبه الأيام: مجهولة مصاير لو تغر الصمت في سحر البيان: الأبجدية؟ والله أن الصدر مستودع محابيس السراير ما شربت اللال مثناة الضحى، والشمس حية لأجل أواري جملة أحلامي حيا .. خلف الستاير وأنت لو تبطي بك الدنيا، محاويلك ندية ولا يطفي جمرتك في الصدر مذروف العباير بدر ليلة واسطة عقد الشهر، عذب الخطية يا كثر ما لك ورى الضلع القصيّر من جراير ما عليك إلا سلام الله، ومردود التحية أنت مبلغ حاجة الأنفس ورغبات الضماير ما هداك لكلمةٍ في البال حق ولا حمية ولا أستمال احساسك المنشود عزم، ولا مساير وش يجيب الكلمة المرة لبسمتك العذية شوف عيني/ يستقيم الراي .. وتدور الدواير والله لتبقى محط آخر رجاء النفس العصية دونها الي فيك ما ينشد شوير، ولا يخاير خلها ترجع بعد وحي الرسالة: جاهلية العزاء لقلوب خلق الله مقاتيل الحراير

بعد ودّا ليلٍ أسبل ظلامه ثم جاب اجدب التخمين والشك عوده مرتوي كيف من بعد الوهَج صرت مطفيّ السحاب؟ غيمتك لا ومض فيها ولا فيها دوي في ربوعك ما هتك وابلٍ ستر التراب وفي سماك الرعد خافت وبرقك منطوي وسط عرقك تنضح الشمس ويلوح السراب فيه كم جرة تلاشت، وكم ضاع بدوي مرخص الخطوه فالأرض الوريفه واليباب ولاوي ذراع المسافات لأحبابك لوي مرتحل وشدادك الحدس وظنونك زهاب وحاديٍ جهمٍ تهادى ولا حولك خوي ليلة إن قلبك وصل في ضياعه للنصاب ليلةٍ ما كان قلبك ضعيف ولا قوي