من دون حد بلادنا رمح مسنون
قل للعدو اللي غَشته الغشامه
في سفلة التاريخ لوكم تناسون
ينبيكم سلاحٍ عليكم وسامه
الجيش من دون البلد و يتفادون
في بر و لّا بحر يشمخ مقامه
و كويتنا في عز مهما تسوّون
دار الصباح و قبلةٍ للشهامه
🇰🇼🇰🇼
#الكويت #الدفاع_الجوي
تتصدى حالياً الدفاعات الجوية الكويتية لهجمات طائرات مسيّرة معادية.
تنوه رئاسة الأركان العامة للجيش بأن أصوات الانفجارات، إن سُمعت، فهي نتيجة اعتراض منظومات الدفاع الجوي للهجمات المعادية.
ويرجى من الجميع التقيد بتعليمات الأمن والسلامة الصادرة عن الجهات المختصة.
#الجيش_الكويتي
عسى نور الصباح اللي يبدد وحشة الاخلاق
فداه جروح ليلٍ بالهوى يسرق محبينه
على قلبي سهومٍ ما قوَتها زمرة العشّاق
لها عامين تسرق عافيَته و تسرق سنينه
لو انه بالهوى ما هو لحاله ضايق و توّاق
لكنه طاح طيحة قيس ليلى لو خفى شينه
عليك من السلام اللي فقده القلب والخفّاق
يا خلٍ لو تغيّب ساعته قلبي نشد وينه ؟
ترى عاشقك ما في معجمه لو رحت بـ الطقاق
خويّه بالدجى من غبت هاجوسه و تلحينه
يسولف للقمر و الليل و يفضفض لهم مشتاق
لو تشوفه تقول ان ضارب فيوزه على حينه
رسم فالبال صورتك الجليّه لو تجي بـ اوراق
غدت صفْحَته لحمه دام مصدر حبره بـ عينه
اشوفك روح عمري مثل لون الرسم دونه عاق
الا وش خانة فنون الرسم من دون تلوينه
تعال و ربّع الدار الخليّه داخل الاعماق
بدونك عايش الغربه يتوه بمرحلة بينه
تعال و عوّض جروح الجفى بالوصْل والإعناق
مادام ان حضنك ان ضم الحجر يبدا لنا لينه
تعال اقطع علاقة عاشقك في جرح ماينطاق
ترى ذروة فرحه ان صافحت يدّيك يدينه
رحيلك دون سبّه مثل كاس المر ما ينذاق
يزيد الجرح بـ حشاي و يزوّد معه تمكينه
يموت الهايم بقصّة غرامه دام فيه فراق
لو انّه حي ميّت بـ الشعور و ربّي يعينه
يجف الحبر في وجه الورق مع جفّت الاحداق
ويموت القلب من رجي الرجوع وكثر تخمينه
خالد بن كريفيس
ما يزوّد بهجتي و لا يثير احراكي
غير طلتك بدجى يا طلّة الحوريه
اقبلي ي ام الوصوف اللي تفوق ادراكي
صوّرك ربي تعالى ،، ( آيةٍ كونيّه )
فالجديل اللي فتّني و القوام الحاكي
ماوفت وصفك حروف بحوري الشعريه
كل ما غبتي يزيد مع الليال اعراكي
م اعترف في غيبتك بالراحه النفسيه
كن غربال الهوى وسط الصدر متراكي
ساد خفّاقي من شبوره ليا مليّه
ما معه نزْرة شعور و لا يعبّر باكي
معجمه ما فيه ثمّت حاله انسانيه
اقبلي وامحي وجوده في صدى انباكي
بدّلي جرعة سمومه جرعة الحنيّه
دمتي بقلبي ملاك و راس مال املاكي
لو تزيدين بغيابك هالمشاعر حيه
ما تخطيّت الدروب و لا وطيت اشواكي
بالغرام الّا معاك و لا طرت لي نيّه
بالهوى يا الفارقه محدٍ يجيب ارباكي
غيرك ولا يوصلك بالمترفات بنيّه
خالد بن كريفيس
يا ليل الشقى حاول ترفّق قدر الامكان
ما عاد يتحمل قلبي اطلبك ترفق به
انا من ورى صدري مثل فوهة بركان
وبواخر غرابيلي على القلب رسّت به
تدور الليالي و العنى ثابت الاركان
على من سلك درب المحبين يثبت به
يقولون فـ اول دربه اللول و المرجان
عصافيره من الصبح لـ الليل غنّت به
واقول الصحيح ان الهواوي ترى ضميان
لو انه لقى له جم قرهود يشرب به
لو انك تغني ( سايق الخير ) يا طربان
مردك تجر من الصبا لين تكتب به
عليك الحشى ملتاع يالجادل الفتّان
طواريك تخطف بال عاشقك تفلم به
ترى طيفكم ما غادر لعالم النسيان
لو انك تغيب سنين فكري تحفظ به
و لو اني تعلمت الرسم من حبر فنان
و خذيت اتعلم لين رسمي تفنن به
من المستحيل ارسمك صوره ورق والوان
ما دام ان وصفك يعجز انسان يفكر به
انا كيف بنجى من هدف سهمك الرنان
اشوف انه اقسى سهم فالقلب ينشب به
تبتخر على كل الغنادير بـ إنس و جان
على زينك الطاغي يحق الك تغتر به
خالد بن كريفيس
هدوء المسا و الفكر هيّض لحون القاف
مزون القصيد العذب يمطر بي قنوفه
اسوق الخطاوي قاصدٍ ذروة المشراف
يسرّيني التفكير فالعشق و ظروفه
خذيت اتطلّع فالهوى من زمانٍ طاف
لقيت اوله نشوه و فآخرته حسوفه
و انا قلبي اللي هاب له فارعٍ ميلاف
لو انه يقابل جيش و يشتت وقوفه
حروب الهوى اقسى من مقابل جيوش آلاف
الا ليتها ب مقابل الجيش و صفوفه
يامالك حشاي و بهجتي بك بدون اسراف
هنا جرحي القتّال و عيونك تشوفه
على معركة حبّك ظهر ب ان معك احلاف
مفاتنك جيشٍ تورد العاشق حتوفه
انا كيف بسلم و المواجه بدون انصاف
"عيونك رماح الحرب و رموشك سيوفه"
اجيك بكلام محضّره لك وراه اهداف
واروح و كلامي فالصدر ساجن حروفه
تعاليت من كبر و تركت الهوى نكّاف
ضربت الهوى والوصل في عارض الطوفه
وش تفيدني كلمة عتب و الكلام الجاف
ضهر من ضميرك و الغلا تعلن نكوفه
قسيت فكلامك يالغضي من طغى واجحاف
مثل قسوة الحجّاج في خطبة الكوفه
خالد بن كريفيس
على الدارج المعتاد ماني بـ اسوق اخطاي
دهاليز فكري جابت اغلا من الدرّه
ما اجيب القصيد اللي ما ياتي على شرواي
على قمّة الابداع و تزيده الجره
انا ما اطرب لـ فيروز و لا لـ عزف الناي
شعاني القصيد العذب مع جرة المرّه
على العزله اللي راق بالي لها بـ غناي
اببعد عن العالم زمن و اترك الفرّه
و ازيّن لي الرسلان دلّه على ليلاي
تجالي عماسي هذّبت نفس محتره
لو يزيد همّي مستحيل افضحه بحكاي
ولاني بـ راجي لي بشر و ادبل الحرّه
انا مالي الا الله عليه ارتجي شكواي
لو ان نار همي شبّته تغني الكرّه
تزيد الهموم ف قلبي و ثم ازيد ادعاي
ياملجى لعبدك لا شكى الضيق والضرّه
انا ودّي اشري بال دايم يجي نسّاي
تشوف الهموم ف قلبي اصغر من الذرّه
هواجيسي افواجٍ تجيني على مسراي
تحد الطريق امن البحر تاصل لـ برّه
على اللي لا طوّل غيبته معه زاد غواي
تسلطن على قلبٍ حلف بإنه يبرّه
على روحته حرف الوله حشرجه بحشاي
و لحنٍ يجر من الصبا الخافق يقرّه
عروق المحبه دمّها الوصل غيث لـ داي
لو ان نفقده بيموت عرق و بدى شرّه
مصيبه لو ان مسبب الداء هو ادواي
بدونه لو انّه طاقم الطب ما برّه
وانا المشكله مااسري ورا المقفي برجواي
لو ان دارت الفكره ترى الساق مبترّه
خالد بن كريفيس












