APR

ஆன்மீகமும், தேசிய உணர்வும் சமூகப் பற்றும் ஒருங்கே கொண்ட தெய்வத் திருமகனார் ஐயா பசும்பொன் முத்துராமலிங்கத் தேவர் அவர்களின் குருபூஜை தினம் இன்று. சுதந்திரப் போராட்ட வீரராகவும், ஒடுக்கப்பட்ட மக்களின் உரிமைகளுக்காகக் குரல் கொடுத்த மக்கள் தலைவராகவும் விளங்கியவர் ஐயா பசும்பொன் முத்துராமலிங்கத் தேவர். தன்னலமற்ற பொதுவாழ்வு, அஞ்சாத நெஞ்சம், உறுதியான கொள்கைப்பற்று, தெய்வ பக்தி ஆகியவற்றின் அடையாளமாகத் திகழ்ந்த தேவர் பெருமகனாரின் வாழ்க்கை வருங்காலத் தலைமுறையினருக்கு என்றும் வழிகாட்டியாக இருக்கும்.

கரூர் மாவட்டம், அரவக்குறிச்சி தொகுதியில், கடந்த பத்தாண்டுகளாகத் தண்ணீரின்றி, ஆக்கிரமிப்புகளாலும் கழிவுகளாலும் சீரழிந்து கிடந்த நங்காஞ்சி (நல்காசி) ஆற்றை, நமது @WTLFoundation தன்னார்வலர்கள் கடந்த 45 நாட்களாகத் தொடர்ந்து மேற்கொண்ட சீரமைப்புப் பணிகளின் முதற்கட்டப் பணிகளை நிறைவு செய்து, இன்று நங்காஞ்சி ஆற்றில் மீண்டும் தண்ணீர் வருவதற்கான பாதையை உருவாக்கியிருப்பது பாராட்டுக்குரியது. ஒரு குழுவாக இணைந்து, உறுதியுடன் செயல்பட்டால் எவ்வளவு பெரிய பிரச்சினையையும் தீர்க்க முடியும் என்பதற்கு நங்காஞ்சி ஆற்றின் மறுசீரமைப்பே சிறந்த எடுத்துக்காட்டு.

இன்று, கரூர் மாவட்டம், அரவக்குறிச்சி தொகுதியில், நமது @WTLFoundation சார்பில் நடைபெறும், நல்காசி ஆற்றைத் தூய்மைப்படுத்தும் பணிகளைப் பார்வையிட்டதுடன், ஆற்றுப்படுகையில் மரக்கன்றுகள் நடும் நிகழ்விலும் பங்கேற்றதில் பெருமகிழ்ச்சி அடைகிறேன். சுற்றுச்சூழல் பாதுகாப்பு என்பது நம் ஒவ்வொருவரின் பங்களிப்பின் மூலம் மட்டுமே சாத்தியமாகும். நமது நீர்வளத்தையும் இயற்கை வளங்களையும் பாதுகாத்து, வரும் தலைமுறைக்கு பசுமையான சூழலை விட்டுச் செல்வோம். மக்கள் பங்கேற்புடன் இயற்கையைக் காக்கும் நற்பணிகளைத் தொடர்ந்து முன்னெடுப்போம்.

இன்று மாலை, கரூர் மாவட்டத்தில், 'தாதம்பாளையம் ஏரியை மீட்போம், கரூரைக் காப்போம்' விழிப்புணர்வு நடைபயணத்தில் பங்கேற்றதில் பெருமகிழ்ச்சி அடைகிறேன். நீர்நிலைகளைப் பாதுகாப்பது, ஆக்கிரமிப்புகளை அகற்றுவது, மழைநீரைச் சேமிப்பது ஆகியவை எதிர்காலத் தலைமுறைக்கான நமது கடமைகள். தாதம்பாளையம் ஏரியை மீட்டெடுத்து, நீர்வளத்தை மேம்படுத்த மக்களிடம் விழிப்புணர்வு ஏற்படுத்துவதே இந்த நடைபயணத்தின் முக்கிய நோக்கம். மேலும், வனத்துறையின் கைவசம் உள்ள எரியின் பகுதிகளை பொதுப்பணித்துறை மீட்டெடுக்க தமிழக அரசு நடவடிக்கை எடுக்க வேண்டும் என்பதே நமது பிரதான கோரிக்கையாகும். நமது @WTLFoundation சார்பில், தமிழகம் முழுவதும் நீர்நிலைகள் பாதுகாப்பு, சுற்றுச்சூழல் மேம்பாடு மற்றும் மரக்கன்றுகள் நடுதல் உள்ளிட்ட மக்கள் நலப் பணிகளை முன்னெடுத்து வருகிறோம். மக்கள் பங்கேற்புடன்  நீர்நிலைகளை மீட்டெடுத்து,  நீர்வளத்தைப்  பெருக்கி, வளமான தமிழகத்தை உருவாக்குவோம். (1/2)

“அறம் செய்ய விரும்பு” என்பதே நமது @WTLFoundation அமைப்பின் தாரக மந்திரம். அரசியல் பின்புலமில்லாத பெண்களையும் இளைஞர்களையும் தலைமைத்துவத்திற்குக் கொண்டுவருவதுமே நமது நோக்கம். தாரகை திட்டத்தின் கீழ், ஏற்கனவே இணைந்துள்ள 8 மகளிர் சுயஉதவிக் குழுக்களுடன், அடுத்த 6 மாதங்களில் மேலும் 25 மகளிர் குழுக்களை உருவாக்கி, பெண்களுக்கு நிதிச் சுதந்திரம் அளித்து, அவர்களைச் சுயசார்புடையவர்களாகவும் தலைவர்களாகவும் உருவாக்குவோம்.

நமது கைகளின் வலிமை, அதன் பத்து விரல்களும் ஒரே மாதிரியாக இருப்பதில் இல்லை. வெவ்வேறு வடிவமைப்பில் இருந்தாலும் ஒன்றிணைந்து செயல்படுவதில்தான் இருக்கிறது. மாறுபட்ட சித்தாந்தங்களிலிருந்து வருபவர்களின் கருத்துகளையும் மதித்துக் கேட்டு, சரியானதை ஏற்று, தவறானதைச் சுட்டிக்காட்டி, அனைவரையும் அரவணைத்து மாற்றத்திற்காகச் செயல்படுவதே நமது அரசியல் பயணம்.

நாட்டின் பல மாநிலங்களில் வாழ்ந்து, பணியாற்றிய அனுபவம் எனக்குண்டு. இந்தியாவின் ஒற்றுமையும் இறையாண்மையும் எனக்குத் தெரியும். அதனால், எனக்கு யாரும் தேசபக்தி பாடம் எடுக்க வேண்டாம். தமிழ்நாடும் வளர வேண்டும், இந்தியாவின் ஒவ்வொரு மாநிலமும் வளர வேண்டும். எல்லோருக்கும் சமமான வாய்ப்பு, ஜனநாயக உரிமைகளுக்கு மதிப்பு, நாட்டின் இறையாண்மைக்குப் பாதுகாப்பு, இதுவே நமது நோக்கம்.

நாட்டிற்கு நல்லது செய்யும் பிரதமர் திரு. மோடி அவர்களுக்கு ஆதரவளிக்கும் அதே நேரத்தில், தவறு என்று தோன்றுவதைத் தட்டிக்கேட்கவும் தயங்க மாட்டோம். CJP கட்சியை நாம் ஒருபோதும் ஆதரிப்பதில்லை. அவர்களின் நோக்கம் வேறு. நமது நோக்கம் வேறு. ஜனநாயகத்தில் ஒவ்வொரு கட்சிக்கும் போராடும் உரிமை உண்டு. ஆனால், தேர்தல் ஆணையம், உச்சநீதிமன்றம் உள்ளிட்ட ஜனநாயக அமைப்புகள் மீதான நம்பிக்கையைச் சீர்குலைப்பதை ஏற்க முடியாது. அதே நேரத்தில், கைது நடவடிக்கைகள் சட்டப்படியும் முறையாகவும் இருக்க வேண்டும் என்பதுதான் நமது கருத்து.