Ahmed Fayed

اللي بيشوف ليفربول دلوقتي يفهم حاجة واحدة... مش محمد صلاح اللي كان محتاج ليفربول... ليفربول هو اللي كان محتاج محمد صلاح. من يوم ما غاب... الفريق بقى تايه... وكأن العصر الذهبي كله كان لابس رقم ١١. صلاح صنع تاريخ ليفربول... وغيابه كشف حجمه الحقيقي. وحتى الحجر... الصخرة اللي الأتراك سموها...صلاحتاشي... شاهدة إنك مش مجرد لاعب عظيم... إنت إنسان ترك أثره في الناس قبل الملاعب....🇪🇬

🇪🇬 مع الحرب إذا فرضت علينا دفاع عن أرضنا... لكن قبل ما تطلبوا حرب مش حربنا... بصوا للصورة دي. الصورة دي لوالدتي... حرم الشهيد أحمد حمدي. اتصورت بعد الحرب بشهور قليلة... خلال مناسبة تخريج أول دفعة من الكلية الحربية حملت اسم الشهيد أحمد حمدي. بعد أكتر من ٤٧ سنة سلام... بقى سهل على ناس كتير تتكلم عن الحروب... وكأن عادي ندخل حرب ورا حرب... ونبعت أولادنا لصراعات وخناقات لا تمس أرضنا ولا حدودنا ولا تهدد بلدنا. اللي دفع الثمن فعلا يعرف إن حياة الجندي المصري مش رقم... وإن الحرب قرار ثمنه أمهات وأطفال وأسر بتتغير حياتها للأبد. بصوا كويس للصورة دي... بصوا لسيدة ترملت قبل ما تكمل ٣٠ سنة... ولقت نفسها فجأة مسؤولة عن ٣ أطفال لوحدها، بعد ما دفعت أسرتها أغلى ثمن ممكن. بصوا لنظرة المشير الجمسي... القائد العظيم اللي كان عارف معنى النصر أكتر من أي حد... وعارف كمان إن ورا كل انتصار أسر دفعت ثمن غالي... وبصوا للمشير العظيم أحمد إسماعيل وهو بيسلم والدتي سيف الشرف ويواسيها، وقال لها وقتها بما معناه: أحمد حمدي بطل بكل معنى الكلمة... النصر نصره... لكننا نعرف أن الخسارة فادحة عليكم... ولا توجد كلمات تكفي للمواساة.... القادة اللي بجد كانوا يعرفوا قيمة النصر... لكن كانوا يعرفوا ثمنه كمان... الحرب مش نزهة... ومش بطولة في الكلام... ومش منشور على الإنترنت. الحرب زوجة فقدت زوجها... وأطفال كبروا من غير أب... وبيوت اتغيرت حياتها للأبد. طبعا لو اتفرضت علينا دفاع عن أرضنا وكرامتنا وحدودنا... فالمصريين عمرهم ما اتأخروا عن واجبهم، ولن يتأخروا. لكن في النهاية... الحرب بتنتهي على الجبهة في يوم... إنما عند بعض الأسر بتستمر عمر كامل... وفي مصر... هم كثيرون أوي... كثيرون جدا. 🇪🇬

لحن ..الشتاء... لفيفالدي... من أعظم ألحان الباروك.. عملوا اللحن مرئي على نوتة ثلاثية الأبعاد... وبتشوف عظمة مع اللحن بل بتفهم عظمة اللحن

بعيد عن أي كلام عن طبقية أو غيره.... مشروع مارينا العلمين ....كانت درس مهم جدا... بناء مدينة سياحية سهل... الحفاظ عليها هو التحدي الحقيقي. أنا شايف إن مارينا العلمين كانت من أنجح مشروعات الساحل .... المشروع كانت أسعاره معقولة نسبيا... وقدر يخلي آلاف الأسر من الطبقة المتوسطة تمتلك شقق وشاليهات وتقضي الصيف في مكان محترم.... والإدارة التابعة للدولة كانت عاملة شغل معقول جدا بإمكانيات الزمن ده. لكن لو فيه عيب مزمن صاحب مارينا من مارينا ١ لغاية مارينا ٧.... هو التسيب في دخول غير الملاك والزوار والايجار المفتوح ان شقة غرفتين تتأجر ويقعد فيها ١٥ شخص ويمكن اكثر.... ومع الوقت بقت الشواطئ تستقبل أعداد كبيرة بدون ضوابط كافية.... وده نتيجتة ايه بقي.... معاكسات...مضايقات...خناقات خلت ناس كتير تبطل تنزل البحر أصلا....او تنزل البحر في عز الشمس علشان يتفادوا ساعات الزحمة.... والقادرين بدأوا يبيعوا وحداتهم ويدوروا على أماكن تانية.... ودا اللي خلي اسعار مارينا تتهبد... حظك الاسود... لو بيتك قريب من البحر... ممكن تلاقي ناس بتخبط عليك عشان تستخدم الحمام أو تشطف نفسها بخرطوم الجنينة... وأحيانا يدخلوا يفتحوا الخرطوم كأنه حق طبيعي.... ولما تسألهم، يكون الرد....معانا أطفال..... رغم وجود أدشاش على البحر. ودي مش مبالغة... دي مواقف حصلت فعلا... المشكلة عمرها ما كانت في الطبقة الاجتماعية لأي حد... المشكلة في غياب القواعد واحترام خصوصية الآخرين. أي مكان... مهما كان ناجح... لما تختفي فيه الضوابط بيبدأ يفقد جزءا من قيمته.... لما تسمح ان شقه غرفتين يسكن فيها ١٥ او ٢٠ وكل الشقق تتأجر كدا النتيجة ان الخدمات لا تتحمل... وللأسف النتيجة واضحة النهارده. مشروع كان من أفضل مشروعات الساحل الشمالي... لكن تأثر مقارنة بمشروعات حافظت على النظام وإدارة الدخول والخروج. مارينا العلمين ....لم تسقط بسبب العمر أو الزمن.... ولا لأن الناس بقت أفقر أو أغنى... مارينا بدأت تخسر يوم ما غابت القواعد... وبقى احترام المكان وخصوصية الناس اختيار... واللي بيحترم غيره هو الاستثناء بدل ما يكون القاعدة....