Malak

يلفتني الرجل الشجاع، اللي كلمته و موقفه واحد، ما يخاف يواجه، و ما يتخلى عن مبادئه حتى لو يوقف وحده. أحب الرجل اللي عنده نخوة و ثبات.

المشاهير من يتزوجون، يحولون السوشيال ميديا لبث مباشر؛ صور و فيديوهات و هدايا غالية و كلام عن الحب الأبدي، و حتى أثاث غرفة النوم ما يسلم من النشر. و من ينفصلون، ينزلون بوست: "رجاءً احترموا خصوصيتنا و لا تتدخلون بحياتنا"🙃

ابداع و جمال كلمات كريم العراقي❤️

لتنطي لأحد وعود ما رح تسويها، لأن اكو ناس ترتب حياتها على چذب حضرتك.

عبالهم الحياة بالخارج كلها وناسة و حفلات و طلعات، ما يدرون الناس هنا تركض بين الشغل و المسؤوليات، و تشتغل حتى تلحگ على مصاريفها، و مرات ما يبقى عدها وقت حتى تعيش حياتها الاجتماعية. مو مثل العراق من ناحية اللمة و العلاقات الاجتماعية. كل مكان بيه إيجابيات و سلبيات، الخارج بيه أمان و استقرار و فرص، بس هم بيه غربة و وحدة وضغط عمل و قلة تواصل اجتماعي. مو كل شي نشوفه من بعيد يعكس حقيقة الحياة. و من يشوفونه نحچي عن الصعوبات يكولون رجعوا لعد! عبالك الغربة قرار سهل، و كأن الإنسان ما عنده التزامات و مسؤوليات و أسباب خلته يختار يعيش بره. مو كل واحد يحچي عن صعوبات الغربة معناها نادم على قراره، و لا لازم نجمل التجربة حتى نرضي الناس. من حقنا نحچي عن الحلو والمُر، لأن الحياة مو أبيض و أسود، و كل مكان إله ضريبته، و إيجابياته و سلبياته. ماكو مكان مثالي بالعالم.

يعني المرأة العراقية اللي دتنتقص منها مو أمك و أختك و گرايبك؟ مفتخر بنفسك و عاجبك من دتختزل نساء بلدك بهالصورة و تحچي عنهن بهالطريقة؟ هو هذا اللي تعلمته من السفر؟ عفيه المرأة العراقية مو أقل أنوثة ولا جمال و لا ثقافة من أي مرأة بالعالم. بيها رقة و قوة، و ذكاء و حضور، و عندها شخصية و تعرف تعبر عن نفسها و تفرض وجودها رغم كل القيود والضغوط اللي عايشتها. أنوثتها مو محتاجة اعتراف من رجل سافر حتى يكتشفها ولا محتاجة تقارن نفسها بنساء مجتمعات ثانية. المرأة العراقية غنية بشخصيتها و هويتها، و المشكلة مو بيها أبد، المشكلة بطريقة تعامل المجتمع الذكوري وياها و بالمعايير المزدوجة اللي يحاكمها بيها.

حسيته راد يفشر بس بعدين لزم نفسه😶

بعيداً عن الجملة، بس التعليقات تحسسك ماكو و لا رجال عراقي زين بهالدنيا🙅🏻‍♀️

محد راح يشكرك على اشياء سويتها فوگ طاقتك بس الكل مستعد يلومك على اول تقصير تسويه

موضوع دجلة بصراحة لحد هسه مصدومة من الخبر، و دشوف منشورات تشكك بالموضوع. ممكن موقف أختها هو اللي خلّى البعض يشك بس الحساب انغلق و اذا السالفة مجرد اتنشن وطشة، شنو ممكن تستفاد من وراها؟ خصوصاً إن البنية مو معروفة عنها هيچ سوالف و حسابها معروف و عليه تفاعل. معقولة تگعد تفاول على نفسها لهالدرجة؟ دجلة إنسانة خلوقة و مثقفة و طيبة جداً، و من صار ويايه موقف و دخلت أمي المستشفى و اني اختفيت عن المنصة، چانت أول وحدة تراسلني و تسأل عني وعن وضع أمي و بقت تدعيلها. هذا موقف ما أنساه إلها، و هواية ناس هم ذكروا مواقفها الطيبة وياهم. ما اگدر أجزم بشي ما عندي عليه دليل، بس هم ما احب اشوف إنسانة بهالصفات ينحكم عليها بالتشكيك من دون ما احد يكون متأكد من الحقيقة. و بالنهاية، كلنا ممكن نموت بيوم و يكون رحيلنا مفاجئ تخيلت نفسي مكانها، شلون ممكن اكون مو موجودة وفوك هذا كُله تجي ناس تشكك بوفاتي وتحچي عليه بهاي الطريقة؟ اي شخص يحط نفسه مكانها رح يشوف مجرد التفكير بالموضوع يوجع. لذلك ياريت ما نحكم على أحد من دون ما نعرف الحقيقة. اذا فعلاً غادرت الحياة الله يرحمها برحمته الواسعة و اذا الخبر مو صحيح الله يطمن أهلها و محبيها عليها.و بكل الاحوال اتمنى نحفظ الها طيب ذكرها و نبتعد عن التشكيك و التجريح.

هسه اني ليش قلبي وجعني من شفت النخلة واگعة😔 المنظر مؤذي💔

لا تناقش القطيع بالمنطق، ناقشهم بسعر العلف؛ فالمنطق يزعجهم، و العلف يقنعهم.

شلون رزاله غسل و لبس يستاهل😂😂

من يومين زوج اختي صارت عنده إصابة برجله بالشغل و راح للمستشفى گالوله صاير عندك تمزق و لازم ترتاح فترة و ما تشتغل. و هو خطية يتخبل من گعدة البيت.فاليوم چنت أسولف ويه صديقتي الأجنبية بالشغل، و صادف اختي دتشتكيلي إن زوجها ما يسمع كلام الطبيب و كل شوية يريد يصلح شغلة بالبيت و آخر شي طالع يذب الزبالة برا قبل لا هي تذبها، لأن يكول ما يصير إنتي تذبيها. گالت حتى الزبالة رح اغير مكانها بعد حتى لا يطلع و يذبها😂 فصديقتي من عرفت بالتفاصيل گالت اختچ متزوجة a real man (رجل حقيقي) أني زوجي من دون إصابة و بعز البرد اگوله اطلع اشمر الزبالة، و بعد كم ساعة يگولي نسيت، و بالأخير مثل كل مرة أني أطلع أشمرها💔😂

اكو بنات من ألاحظ طباعهن و اشوف بيهن حقد و تعالي، و بعدين اسمع وحدة منهن انخطبت لو تزوجت، أگول بيني وبين نفسي خطية، الله يعينه للي راح يعيش وياها، شلون رح يتحمل؟ و بعد فترة أسمع انفصلوا، و ما أستغرب، لأن من البداية چان عندي إحساس إن العِشرة وياها مو سهلة. هالموضوع تكرر ويايه اكثر من مرة، لدرجة صرت احس أحياناً إن طباع الشخص تبين من البداية أكثر مما نتوقع.

ثورة تشرين... شباب بعمر الورد راحت أرواحهم هدر، و أمهات انفجعت وانكسر گلبها على أولادها، و أحلام انطفت قبل لا تشوف النور. كل هالتضحيات، كل هالدم، و كل هالوجع، حتى يبقى العراق يدور بنفس الدائرة. أكثر شي يوجع إن أحلامهم كانت بوطن يستحقهم، بوطن بيه عدالة و كرامة و مستقبل أفضل، ولحد اليوم هوايه من المطالب اللي طلعوا علمودها ما تحققت. سلاماً لمن رحلوا وهم يهتفون: نريد وطن و الرحمة و الخلود لشهداء ثورة تشرين💔🇮🇶

ما اعرف اذا لأني عراقية و أتحيز للهجتنا بس اكو شي يشدني بطريقة حچي العراقيين، سواء بالبودكاستات او بالخطابات.خليط من اللهجة و الثقافة و سلاسة التعبير و سرعة البديهة، و حتى بطريقة طرح الأفكار اكو نكهة مميزة و حضور يخليك تنجذب للحچي و تستمتع بيه حتى لو الموضوع اصلًا مو من اهتماماتك

من أجمل الاعترافات♥️👑 #كاظم_الساهر 🎶

مواقع التواصل خلت الناس تحسد بعضها على أشياء وهمية، صاروا يحسدون غيرهم على علاقات و حياة و أسلوب عيش يمكن أصلًا ما موجود بالحقيقة.

🌓