من الخاص 📩 أنا موظفة عمري 32 سنة وغير متزوجة راتبي 21400 ريال وأشتغل في جهة شبه حكومية لي 7 سنوات على رأس العمل وما عندي أي قروض أو أقساط المشكلة إني طول السنوات الماضية أصرف بدون حساب سفرات كل إجازة ومشتريات وطلعات وهدايا وأحيانًا ينزل الراتب الجديد وما بقي من اللي قبله حتى ألف ريال قبل شهرين جلست أحسب مجموع رواتبي من يوم توظفت واكتشفت إني استلمت أكثر من مليون ونص خلال السنوات الماضية ومع ذلك كل اللي أملكه حاليًا 83 ألف ريال وسيارة قيمتها تقريبًا 65 ألف الحين جاني قبول ببرنامج ماجستير خارج السعودية مدته سنتين وتكلفته مع المعيشة تقريبًا 310 آلاف وبنفس الوقت أفكر أشتري شقة صغيرة بالرياض بدل ما تروح فلوسي على أشياء ما لها قيمة أهلي يقولون استغلي عمرك وكملي دراستك وصديقاتي يقولون اشتري عقار قبل ترتفع الأسعار أكثر أنا مو متضايقة من قلة الفلوس أنا متضايقة إني أضعت سنوات وأنا أقدر أبني فيها مستقبل أفضل لو كنتوا بمكاني هل تقدمون الدراسة وتطوير النفس أو تبدأون بتكوين أصل مالي حتى لو تأخرت الدراسة؟

من الخاص 📩 متزوج من 7 سنوات وزوجتي موظفة وراتبها 11 ألف ريال وأنا راتبي 6900 من بداية زواجنا متفقين إن مصاريف البيت علي وهي راتبها لها قبل شهرين أبوي احتاج مبلغ 28 ألف ريال لعلاج أسنانه وطلبت من زوجتي تسلفني 15 ألف وأرجعها لها على دفعات رفضت وقالت عندك إخوان المفروض يساعدونك مو أنا الموضوع مو موضوع فلوس قد ما هو موقف ما قدرت أتجاوزه شرايكم بالله وش اسوي فيها ؟؟

من الخاص 📩 لي 11 سنة بشركة وراتبي 13400 وجاني عرض من شركة جديدة براتب 20500 لكن الشركة الجديدة عقدها سنة ويتجدد حسب المشاريع وعندي قرض عقاري وقسط سيارة ومصاريف شهرية توصل 8900 فرق الراتب مغريني بس لو انتهى العقد بخسر الاستقرار اللي بنيته طول هالسنين

من الخاص 📩 قبل أربع سنوات أقنعت زوجتي تترك وظيفتها وننتقل من تبوك للدمام عشان فرصة وظيفية جتني وقتها كان راتبي 8700 ريال والعرض الجديد 13700 ريال زوجتي كانت موظفة براتب 6400 ريال وقالت لي أخاف أستقيل وأنتقل معك وبالنهاية ما أحصل وظيفة قلت لها الفرصة تستاهل وإن شاء الله تتعوض وظيفتك وفعلًا انتقلنا أول سنة كانت صعبة علينا الإيجارات مرتفعة وزوجتي جلست 11 شهر تدور وظيفة بعدها توظفت والحمد لله وتحسنت أمورنا اشترينا أثاث جديد واستقر عيالنا بمدارسهم وصار لنا علاقات ومعارف قبل أسبوعين استدعاني المدير وبلغني إن الشركة بتقفل القسم اللي أشتغل فيه بالدمام وعرضوا علي خيارين إما أنقل للرياض بنفس راتبي الحالي اللي وصل 15200 ريال أو أنهي عقدي وأستلم مستحقاتي وأبحث عن فرصة ثانية رجعت البيت وكلمت زوجتي قالت لي أنا ما راح أترك وظيفتي مرة ثانية قلت لها طيب وش الحل؟ قالت أنت تروح الرياض وتسكن هناك وإحنا نجلس بالدمام حسبت التكاليف وطلعت إني بحتاج تقريبًا 4300 ريال شهريًا لسكني ومصاريفي بالرياض غير مصاريف بيتنا بالدمام قلت لها المبلغ كبير وبيأكل جزء من راتبي قالت أنا قبل أربع سنوات ضحيت بوظيفتي عشان مستقبلك والحين دوري أحافظ على وظيفتي قلت لها لكننا عائلة والمفروض نعيش بمدينة وحدة ردت علي بكلام ما قدرت أنساه قالت يوم كان مستقبلك الوظيفي على المحك اعتبرنا الانتقال تضحية ضرورية والحين يوم صار مستقبلي أنا على المحك صرت تقول العائلة لازم تكون بمكان واحد سكت لأني عرفت إنها للحين متأثرة من تجربتها الأولى المشكلة إن عندنا طفلين وأكبرهم عمره 10 سنوات ومتعلق فيني بشكل كبير ولو انتقلت لحالي ما راح أشوفهم إلا بنهاية الأسبوع ويمكن بعض الأسابيع ما أقدر أرجع بسبب ضغط العمل وأنا ما أبي أخسر وظيفتي خصوصًا إن عندي التزامات شهرية تقارب 6900 ريال لكن بنفس الوقت ما أبي أكون سبب في خسارة زوجتي لوظيفتها للمرة الثانية أمس قالت لي إنها مستعدة تتحمل جزء من مصاريف سكني بالرياض لكن ما راح تقدم استقالتها والحين قدامي قرار ما كنت أتخيل إني بواجهه أول مرة أحس إن الفرصة الوظيفية اللي حسنت حياتنا قبل أربع سنوات ممكن تكون هي نفسها السبب اللي يفرقنا بين مدينتين لو كنتوا بمكاني كيف بتتعاملون مع هالموقف خصوصًا إن كل طرف عنده أسباب منطقية يتمسك فيها بقراره؟

من الخاص 📩 قبل شهر اكتشفت إن زوجتي تحول لأمها 2200 ريال شهريًا من راتبها بدون ما أعرفمتزوجين من 14 سنة وعندنا أربعة أطفال وزوجتي موظفة وراتبها 9400 ريال أنا أتكفل بالإيجار والفواتير والمقاضي وأغلب مصاريف العيال وقبل سنة اتفقنا إنها تتحمل رسوم أنشطة الأطفال وبعض مصاريفهم الدراسيةلكن من بداية الفصل وهي تقول ما عندي سيولة كافية وتطلب مني أغطي المصاريف بدلها قبل أسبوع عرفت بالصدفة إنها تحول لأمها مبلغ شهريسألتها ليش ما قلتي لي؟ قالت هذي أمي وأنا مسؤولة عنها وما أحب أحد يعرف إنها محتاجة قلت لها أنا ما أعترض على مساعدتك لأمك لكن ليش نتفق على مصاريف وبعدين أتحملها لحالي؟ ردت وقالت أنت أبو العيال ومصاريفهم مسؤوليتك بالأصل قلت لها صحيح لكن الاتفاق كان بيننا برضاك وأنا رتبت التزاماتي عليه قالت يعني تبي أوقف مساعدتي لأمي عشان أدفع رسوم عيالك؟ هنا حسيت إن الموضوع تحول من نقاش مالي إلى اتهام إني ضد برها بأمها قلت لها طيب ليش ما صارحتيني من البداية عشان نعيد ترتيب مصاريفنا؟ قالت لأني كنت عارفة إنك بتفتح معي نفس هالنقاش وبتخليني أحس إني مقصرة بحق أمي قلت لها يعني كنتِ تفضلين إني أتحمل المصاريف وأسكت بدون ما أعرف السبب؟ قالت أنت زوجي والمفروض توقف معي مو تحاسبني على كل ريال سكت وقتها وما كملت النقاش لكن بعد يومين جاني إشعار من المدرسة بوجود رسوم متأخرة على اثنين من عيالنا قلت لها لازم نسددها هالأسبوع لأن التأخير طال قالت ما عندي شيء بحسابي حاليًا ودبرها أنت قلت لها أنا بعد عندي التزامات وما أقدر أغطي كل شيء كل مرة ردت علي بكلمة للحين ما قدرت أنساها قالت إذا مساعدة أمي بتسبب كل هالمشاكل بيننا فأنا مستعدة أتحمل مصاريف عيالي لكن لا تطلب مني بعد اليوم اي شي ومن رجال اذا ماصرفت على عيالك قلت لها يعني بعد 14 سنة زواج بنصير كل واحد يحسب فلوسه لحاله؟ قالت يمكن هذا أريح لنا من إنك تحسسني إني مدينة لك ومن يومها صارت تعاملني ببرود وكل ما فتحت موضوع المصاريف تقول أنت المسؤول وتصرف بالطريقة اللي تشوفها أنا ما أبي ريال من راتبها ولا أبي أمنعها تساعد أهلها لكن اللي كسر خاطري إن اتفاق بيننا انتهى وكأني أنا الغلطان لمجرد إني طلبت الوضوح والأصعب إن عيالنا صاروا يسألون ليش ما سددنا رسومهم وليش ألغينا بعض أنشطتهم الحين قدامي خيارين وكل واحد أصعب من الثاني يا اني اسكر عالموضوع وامشيه يا اني بمنعها من انها تعطي امها فلوس شهرياً بس رح تزيد المشاكل

من الخاص 📩 ياخوان والله ابي شوركم انا رجل معي ماجستير MBA بمعدل عام ٤.٩٢ من ٥ ودبلوم عالي ذكاء اصطناعي معدل ٥/٥ ودبلوم عالي ادارة مشاريع معدل ٤.٨٨ من ٥ وقدرات جامعيين ٨٨ وقدرة معرفية ٩٠ وستيب ٧٧ وخبرتي ٣ سنوات تقريبا مابين مشاريع حكوميةوخاص وعندي شهادات احترافية مثل PMP, RMP, PMO-CP, ACP, CPMAI, CSPP, PMI-CP, KPI's, PL-300 راتبي ١٣٢٠٠ هل ممكن احصل راتب اعلى لو لا قدر الله ماتجدد عقدي؟ وش السواه؟ وهل وضعي مضبوط ولا مقصر ولازم اتطور اكثر؟ وهل صحيح ان اغلب الناس رواتبهم ١٥ الف وفوق؟ وبالراحه

من الخاص 📩 أنا متزوج وعندي 3 بنات وراتبي 7930 زوجتي تبي تسجل البنات بمدارس أهلية بـ 41 ألف بالسنة أنا أشوف الحكومية تكفي خصوصًا إن علينا إيجار 2700 هل أضغط على نفسي عشان تعليمهم ولا اوافق بس دخلي ضعيف ؟؟

من الخاص 📩 أمس اكتشفت إن زوجتي من ستة شهور وهي تستلف من أختها عشان تغطي مصاريف البيت ما كنت أدري عن الموضوع أبد أنا موظف وراتبي 11800 وعندنا خمسة أطفال علي قسط عقاري 4350 وقسط سيارة 1420 ومن بداية السنة صارت مصاريفنا تزيد بشكل ملحوظ كنت أعطي زوجتي 2800 شهريًا للمقاضي واحتياجات البيت وكل ما قالت المبلغ ما يكفي أقول لها حاولي ترتبين المصاريف قبل يومين اتصلت علي أختها وقالت أبيك تعرف إن أختي عليها لي 19 ألف ريال استغربت وسألتها من وين جاء هالمبلغ قالت زوجتك كل شهر تطلب مني ألفين أو ثلاثة عشان تكمل مصاريف البيت والعيال واجهت زوجتي بالموضوع قالت والله ما كنت أبي أثقل عليك وأنت شايل أقساط البيت والسيارة قلت لها طيب ليش ما علمتيني بدل ما تتراكم عليك الديون قالت كل مرة أقول لك المقاضي غليت تقول إني ما أعرف أدبر الفلوس هنا سكت لأني تذكرت فعلًا إني كنت أردد هالكلام لكن اللي صدمني أكثر إنها قالت إنها باعت ذهب لها قبل أربعة شهور بمبلغ 13 ألف وصرفته على احتياجاتنا قلت لها ليش وصلنا لهالمرحلة وأنا ما أدري قالت لأنك تحسب إن كل شيء بالبيت ينتهي بمجرد ما تحول لي المصروف جلست بعدها أراجع حساباتي اكتشفت إني أدفع شهريًا اشتراكات وطلعات ومصاريف شخصية تتجاوز 1600 ريال وبنفس الوقت كنت ألومها إذا طلبت زيادة 500 ريال للمقاضي أمس قلت لها من الشهر الجاي بنجلس سوا ونحدد ميزانية واضحة للبيت قالت الميزانية مهمة بس الأهم إنك تصدقني يوم أقول لك ما يكفي والله إن كلامها للحين في بالي أنا طول الفترة الماضية كنت مقتنع إني مو مقصر مع بيتي لكن يوم عرفت إنها تستدين وتبيع ذهبها عشان ما تطلب مني زيادة حسيت إني ما كنت شايف الصورة كاملة والحين أول شيء أبي أسويه أسدد دين أختها وأرجع لها قيمة ذهبها لكن عندي سؤال شاغلني كيف الواحد يعرف إنه فعلًا يعطي بيته كفايته مو بس يعطي المبلغ اللي هو يشوفه مناسب؟

من الخاص 📩 بنتي عمرها 19 سنة وتدرس بالجامعة ومن يوم توظفت جزئي وهي تجمع من مكافأتها وراتبها أبوها طلب منها تشاركنا بمصاريف البيت بـ900 ريال شهريًا لأنها صارت تشتغل قلت له خل البنت تجمع لمستقبلها قال لازم تتعود على المسؤولية من الحين البنت سمعت نقاشنا وقالت بعطيكم اللي تبونه بس لا تحسسوني إني صرت عبء عليكم

من الخاص 📩 زوجتي ولدت قبل 5 شهور وقررت تمدد إجازتها بدون راتب راتبي 7850 وإيجارنا 2600 وقسط السيارة 1190 أم زوجتي عرضت تهتم بالطفل عشان ترجع زوجتي لدوامها وانا ماودي الطفل يتعود على غيرنا وبالاخص خواله ودي انه معنا فا ما اعرف وش اسوي

من الخاص 📩 فتحت بقالة قبل 3 سنوات برأس مال 92 ألف مبيعاتها بالشهر 31 ألف لكن الصافي ما يتعدى 3400 جاني واحد يشتريها بـ 125 ألف شامل البضاعة أبيع وأطلع بفلوسي أو أستمر وأحاول أرفع الأرباح مع اني خسران عليها واجد ديكورات وحوسه بس اكلتني رواتب العمال والبضائع افيدوني انتم وش رايكم بالعرض ؟؟؟

من الخاص 📩 أنا موظف في شركة شبه حكومية وعمري ٣٤ سنة راتبي الحالي ١٦٨٠٠ ريال ولله الحمد معي بكالوريوس هندسة وماجستير إدارة أعمال وعندي ٨ سنوات خبرة وكم شهادة مهنية أخذتها على حسابي قبل أسبوعين جاني عرض من شركة كبيرة براتب ٢٧٥٠٠ ريال ونفس تخصصي تقريبًا الفرق بالشهر أكثر من ١٠ آلاف ريال يعني بالسنة فوق ١٢٠ ألف المشكلة إن وظيفتي الحالية مستقرة والدوام مريح ومديري متفاهم وعندي وقت لزوجتي وعيالي أما الشركة الجديدة دوامها طويل وفيها ضغط وسفر بين المدن والعقد سنوي يتجدد يوم علمت زوجتي بالعرض فرحت وقالت هذي فرصة ما تتعوض خصوصًا إن علينا تمويل عقاري وقسط سيارة ومصاريف ثلاثة أطفال لكن أبوي يوم شاورته قال لي كلمة للحين أفكر فيها قال لا تبيع راحة بالك بعشرة آلاف وتندم يوم ما ينفعك الراتب واللي زاد حيرتي إن واحد من الشباب كان يشتغل عندهم وقال لي رواتبهم ممتازة بس الموظف عندهم ما يضمن بكرة أنا الحين محتار بين وظيفة مرتاح فيها ومستقبلي واضح وبين راتب ممكن يغير وضع عائلتي بالكامل هل فعلًا الاستقرار الوظيفي يستاهل أتنازل عشانه عن فرق راتب يتجاوز ١٢٠ ألف بالسنة؟