عبدالرحمن زنداح Abdulrhaman Zendah

"انا لله وانا إليه راجعون" كنت بمثابة الأخ الكبير والصديق.. الناصح في وقت النصح والقاسي في وقت القسوة. تعابير وجهك الي مرات تكون قاسية، تحمل وراها أجمل ابتسامة وأطيب قلب. كنت دايماً تسمعني لما اكون زعلان وتهون علي. كنت دايماً توبخني وتوقفني لما تشوفني تماديت بشي ممكن يضرني. مواقفك وكلامك ونصايحك عمري ماراح أنساهم. مكالماتنا الي بالساعات، الي فيها الغشمرة والعتب والمعاياة والصراخ والقطات والمواقف العامة الي كنت تقولها لي في الحياة بشكل عام والمواقف الخاصة في الرياضة.. كنت تناديني "حمنه" ، ادري انك تبي تضحك وتتحرش وتتغشمر. كنت تناديني "عبدالرحمن" ، ادري انك معصب وبتزفني زفة محترمة. كنت خير سند لي في كل شي. بظهري دايماً. وأكبر داعم لي. القلب الأبيض والأصيل الي ما غيرته لا الأيام ولا الظروف. أكتب هالكلمات وانا أرجف من صدمة خبر وفاتك. أكتب هالكلمات وانا مو قادر أسيطر على دموعي. لا كلمات رثاء بسيطة مثل هاذي تعطيك حقك ولا اي شي يوفيك حقك يا بو حمد. الله يرحمك ويحسن إليك ويجعل مثواك الجنة. والله ان القلب يعتصر ألماً على وفاتك ياحبيبي يا بو حمد. عمري ماراح انساك وراح أتم أدعيلك طول حياتي. الله يتقبلك في رحمته القبول الحسن ويكرم نزلك ويوسع مدخلك. نسألكم له الدعاء بالرحمة جميعاً.