الواحد بقي حاسس أنه في سباق ملوش نهاية.. رحلة اتجاه واحد.. سباق بتجري فيها زي المجنون مش عارف طريقك دا نهايته ايه.. بس بتجري.. عشان لازم تجري.. لانك لو وقفت لحظة تاخد نفسك، لا بلاش تاخد نفسك، لو وقفت لحظة عشان تفهم حتي أنت بتجري ناحية فين.. الدنيا هتدوسك المشكلة مش في زيادة الغلاء، ولا المشكلة في الفقر المشكلة انك بتفقد انسانيتك وانت بتحاول تجاري الأحداث الواحد بقي في سباق بتذوب فيه الأحذية، وبتتاكل فيه اجسامنا، بنجري عشان بس نشتري حق التنفس بكرة الجري والخوف من الفقر والخوف من فقدان الأحلام بيسرق منا حق ” الغلط ” .. حق ” المغامرة ”.. أقل قرار غلط هتدفع قصاده عُمر وشقى وفلوس إحنا جيل اتولد في غرفة الانتظار؛ بنستنى الدنيا تروق، أو الأسعار تهدى، والظروف تتحسن، ولما بنبص في المراية نكتشف إن الانتظار أكل ملامحنا وسابنا شيوخ في لبس شباب بنحرق خشب شجرنا وهو لسه أخضر عشان ندفّي خريفنا، ولما الخريف يجي بنكتشف إننا بقينا رماد... لله الأمر من قبل ومن بعد.. هو مولانا، نِعم المولي ونعم النصير