FAISAL

الاستغناء عن الموظفين بسبب التقنية مب شيء جديد، من يوم عرف الإنسان الآلة والأتمتة ووظائف كاملة تندثر وأخرى تتغير. الفرق أن التغيير كان غالباً أبطأ، فكان عند الناس وقت أطول يتأقلمون معه. أما اليوم فالذكاء الاصطناعي قاعد يدخل في مجالات كثيرة وبسرعة تخليك تشوف أثره على وظائف كانت قبل سنوات بعيدة جداً عن فكرة الأتمتة. بذكركم بوظيفة كانت موجودة تقريباً في كل شركة ومؤسسة اسمها معقب. غالباً ما كانت تحتاج شهادات، لكنها كانت متعبة ورواتبها نقدر نقول جيدة - كانت فاتحة بيوت - بعض اللي استمروا فيها سنوات فتحوا مكاتب خدمات أو طوروا أنفسهم. ثم جاء أبشر والمنصات الحكومية، واختفت كمية كبيرة من هذه المهام، وانتقل بعضها لموظفي الموارد البشرية، واللي طور نفسه انتقل لمسمى ثاني، واللي ظل مكانه بدون ما يتغير فقد وظيفته. نفس القصة تتكرر اليوم، لكن بوتيرة أسرع. يمكن أهم شيء ما أحد قاله لي في أول وظيفة أني في يوم من الأيام ممكن أمسك الباب، حتى لو كنت أفضل موظف في المكان وحتى لو كنت مرتاح وتحس أنك بتجلس فيه إلى التقاعد. الوظيفة علاقة اقتصادية تنتهي متى ما تغيرت حاجة الشركة، ولذلك الإنسان يحتاج دائماً يكون عنده شيء آخر يبني عليه، مهارة أو معرفة أو مشروع أو حتى قدرة على الانتقال لمجال جديد. وعشان كذا خبر مثل هذا هو تذكير بأن سرعة التغيير نفسها تغيرت. وبالمناسبة لا تتوقعون أن الموضوع بس على الأفراد، أنت بكرة كشركة ممكن يستغنون عنك أنت أيضاً. لأنك إذا بنيت شركة على عمل يمكن للذكاء الاصطناعي القيام به، فمع الوقت ممكن يصبح نموذج عملك نفسه جزء من الشيء اللي تقدر شركات الذكاء الاصطناعي تبنيه داخل نماذجها أو أدواتها. واحد من الشباب اللي تناقشت معهم بالخاص لخصها بشكل جميل، وقال إن هذا معناه أن شركتك ونموذج عملها ممكن تكون أحد الميزات البرمجية عند شركات الذكاء الاصطناعي داخل نماذجها. اليوم مثلاً وأنا أفر باليوتيوب طلع لي فيديو لشاب صيني فقد وظيفته بسبب الـ AI أنصحكم شوفوه وشوفوا كيف يتكلم عن أحاسيسه بعد فقد الوظيفة تحس أنه يتكلم عن حال كثير اليوم. الرجل قضى خمس سنوات يبني بيئات ومشاهد ثلاثية الأبعاد باستخدام Unreal Engine، ومجاله إبداعي جداً، ومع ذلك صار جزء كبير من العمل اللي كان يأخذ منه أسبوع أو أكثر يعطيه الـ AI نتيجة أولية خلال دقائق. المهم في قصته أن الرجل كان يستخدم أدوات AI بنفسه ويعرف أنها تغير مجاله، لكنه ما توقع أن يصل التغيير إليه بهذه السرعة. أنت ممكن تشوف التقنية وهي تغير العالم حولك وتفهمها كويس، وتعرف أن بعض الوظائف راح تختفي وبعضها راح يتغير، ويمكن حتى تكون أنت من الناس اللي تستخدم هذي التقنية يومياً، ثم تكتشف فجأة أنها وصلت إلى وظيفتك أنت. المعرفة بالتغيير ما تعني أنك محصن منه. وهذا ينطبق على أشياء كثيرة في الحياة، مب بس الوظيفة. أحياناً الواحد يتعامل مع حياته وكأن وضعه الحالي هو الوضع اللي بيستمر عليه للأبد. فإذا كان مرتاح يحسب أن الراحة بتستمر، وإذا كان متعثر يحس أن التعثر هذا بيستمر معه. بينما الواقع أن حال الإنسان يتغير باستمرار، وأحياناً يتغير بطريقة ما كان يتوقعها أبداً. وأعرف أن بعض الناس يقرأ هذا الكلام وهو أصلاً ما حصل خط البداية، ضايع ومشتت، يحس أن العمر يمشي وهو ما حقق شيء، ويشوف الناس حوله تتقدم وهو للحين يحاول يعرف وش يبي يسوي بحياته. أعرف هذا الشعور لأني مريت فيه ويمكن ما زلت أمر فيه وأنا أكتب هذا الكلام. لذلك مب جاي أقول لك كلام من نوع طور نفسك وخطط لمستقبلك وكأن الحياة كلها تمشي بخطة واضحة، لأن أحياناً الواحد يبذل اللي يقدر عليه وما يشوف النتيجة اللي كان يتوقعها. لكن أبغى منك شيئين، خل إيمانك بالله عز وجل وحكمته كبير، وإيمانك بأن حال الدنيا متبدل. شفت ناس تبدل حالهم تماماً، وشفت أشياء كنت أقول مستحيل تصير ثم صارت. وهذا لحاله يخليك ما تحكم على حياتك من المرحلة اللي أنت عايشها الآن. فإذا كنت للحين ما بدأت، ابدأ من المكان اللي أنت فيه. وإذا تأخرت، لا يعني أن الفرصة انتهت. وإذا خسرت شيء كنت تحسب أنك بتكمل فيه سنين، حاول تقوم وتشوف وش تقدر تسوي بعده، لأن هذا اللي عليك. و في النهاية يمكن أهم شيء أنك إذا حطيت راسك على المخدة تعرف أنك أخذت بالأسباب اللي تقدر عليها، وتعلمت وحاولت وسعيت وما تركت نفسك لليأس، وبعدها تعرف أن النتيجة مب كلها بيدك. أمرك بيد رب العالمين، وحال الدنيا يتغير، ويمكن الشيء اللي تحسبه اليوم نهاية يكون مجرد انتقال لشيء ما كنت تتوقعه.