
🇦🇪 │ #FMHM7 │ شاعـره ︎
الدايركت للتعاون والإستفسار
Joined November 2016
- Tweets17.2K
- Following274
- Followers10.9K
- Likes10K
في ظل الأزمة وانتكاسات الأوضاع
شعبك يا بو خالد لقى اليوم عيده
شوفَتْك تتقهوى معَ الشيخ فزَّاع
ما بين شعب الدار لحظة سعيده
كنَّك تقول لْكلِّ حاسد وِ خدَّاع
احلامكم يا اهل المكايد بعيده
#FMHM7 🇦🇪
في ضفافك جيت انا كلي وغرقت
يا نهر جاري رفض يروي ضماي!
وفي نهارك جيت لك شمس وشرقت
وما لقيت الا كسوفك في سماي
باب خفّاقك من اللهفه طرقت
واقف وقلبي بعد واقف معاي
جيت احبك .. مادريت انك سرقت
المشاعر كلها وقلبي وراي
ما اذكر اني قبل اعرفك يوم رِقت
ومن عرفتك والهنا كله هناي
الاكيد انك عن الباقي فرقت
بس ماظنّي فرق عندك غلاي
ومامداني الا اشوف انك برقت
في مدامع عبرتي وهلّيت ماي
انته اللي صدني وانته حرقت
ماتبقى من شعورٍ في حشاي
#FMHM7
إن بغيت البُعد يا سمح المحيّا
الدروب وْساع وأمرك في يدينك
أما أنا ما أحتمل زود الجفيّا
من بعد ما صار من بيني وبينك
جيت لك بالود وأثره ما تهيّا
وإن بغيت الصدق ما احنا غاصبينك!
كان قلبك عن دروب الحب عيّا
روح في دربك وِ حنّا مْسامحينك
#FMHM7
مغرم ولا لي فالهوى حد
صوب الذي يسكن فوادي
قلبي عليه يْون محتد
وقلبه على شرواي هادي!
فارق وِ مثله ما انوجد حد
لو طفت في كل البلادي
حاز الغلا والزين والود
وطبعٍ فريدٍ هوب عادي
ذربٍ حشيمٍ زاكي اليد
ومثله على القمه سيادي
لو بوصفه ما يوفي السد
وما بنصفه أول وِ بادي
أهوى وصاله وأبغض الصد
له شوق قلبي بازديادي
ماله بعيني فالعرب نِد
وحده على الخفّاق سادي
#FMHM7
على فال الغلا والصد وافكار الليالي السود
ذكرتك وانضوى داخل خفوقي بَدْرِ يشبه لك!
عليك الحب لو طال الغياب بْردتك معقود
واشوف الغير شي عادي لو انك للحشا مهلك
حبيبي من ينسّيني هواك اللي كبر ويزود؟
رغم طول الجفا لا زال مكتوبي ينوّه لك
أخط الشعر في غيرك والاقي شخصك المقصود
واذا مرتني طْيوفك اقول لها على مهلك
قصر الاحباب بفوادي من فْراقك غدى موصود
يمر الغير قدامه بْصعوبه وانت يا سهلك!
غلا دارك مثل ماهو وغرامك هو بليا حدود
على حطة يدينك … لو تحاول تصطنع جهلك
ابيك ان كنت تذكرني ولو تنسى ترا لعهود
الين اليوم تلزمني احبك واحتفي بأهلك
حبيبي يا بدر ضاوي ينوّر لي الليالي السود
تمر سنين وانت الغير مابه شخص يشبه لك
#FMHM7
باكر الدنيا على مثلك تدور
تنسقي كاسك وترجع تشربه
باكر تْدور على بابي شعور
واعتذارك فوق بحري تكتبه
غلطتك يوم اختلط فيك الغرور
ونور شمسك صرت عني تحجبه
غلطةٍ منها انبنى عالقلب سور
يمنعك بعد الخطا لا تقربه!
في غيابك داوت أيامي الكسور
تجربه يا مُرّها من تجربه!
وأصبح الخافق محطه للعبور
وكلِّ حبٍّ مر كاسه يسكبه
جرحك اللي ما تخفّيه السطور
له على اضلاعي رفوف ومكتبه
عيش من غيري سنينك والشهور
والله ان تبطي تلاقي لي شبه
#FMHM7
ما نساوم في وطنّا والقياده
حبهم فطره وطاعتهم فريضه
لابة نْهيان بيديها السياده
من يعاديهم يموت بنار غيضه
الشيوخ اللي خذوا بيد الرياده
شعبنا في بشتهم ما ذاق قيضه
في الرضى ولا الغضب ولا الحياده
ما تخالفهم سوى النفس المريضه
#FMHM7 🇦🇪
تغيب شوي وأشعر بالدقايق يالغلا ساعات
و تورطني معَ نفسي وِ روحٍ وين اوديها؟
عليك القلب يا كم بمسكه وماينمسك هيهات
ومشاعر خافقي كم لي وانا بالثقل اداريها؟
وقفت بكل مافيني وانا اللي رافض الوقفات
بيديني لك بقايا روحي ترفض من يداويها
أنا أدري الهوى بدري .. ولكن صدفتك بالذات
لفت تقلب موازيني من أولها لتاليها
تمادى داخل اضلاعي مدام إن تمدي اللحظات
أنا مهما حصل لحظات عمري مَعْك شاريها
#FMHM7
معاك العيد يصبح شي ثاني
عسى الأعياد ما تفقد وجودك
عليك يْسوق خفّاقي التهاني
قَبِلْ تلبس وِ قَبْل يْفوح عودك
بقربك يفرق العيد وزماني
مليته حب من زاهي ورودك
عسى كل عام يا حلو المعاني
يعود الحب وأعياده تعودك
#FMHM7
لو تغيب الشمس يتليها الشروق
سنة الله ما يطول بْها المغيب
وبالمثل دنياك مهما بك تضوق
لا بُد انها بَعْد قسوتها تطيب
وانت ياللي لك بحر مملاي شوق
ادعي الله ينكتب قربك نصيب
حيث حبك مسكنه وسط العروق
يالبعيد اللي بقى بْقلبي قريب
#FMHM7
نظرتي لْنفسي يلخَّصها كلامي
عاذلي كوكب وأنا كلِّ المجرّه
والمكان اللي ينزّل من مقامي
تنقطع رجلي ولا في يوم أمرّه
من تجمَّل بي لقى منّي احترامي
ومن تردّى بي تركته عند شرّه
كم ظروفٍ حاولت دون انهزامي
وآتجاوزها لو انها صدق مُرّه
#FMHM7
7 مـايـو 2O25
أودعتُ مِن عُمري عاماً
وابتدأ بعمري عامٌ جديد
فاللهم إني أسألك عامًا مشرق مزهر مطمئن محفوفًا بالتوفيق والبركة يملؤه اليسر والرضا وتحقيق الأمنيات في ديني ودنياي.
4
22
6,329
بوظبي هي دار خلاني
حبها في ضامري ضافي
من غلات اللي به الحاني
عذبةٍ يزهى بها قافي
ساكن بْها سيد غزلاني
لي غلاته فاقت اولافي
من عريب الساس ظبياني
لي طريته تزهر اوصافي
ماحدٍ شرواه فأوطاني
مولفي كاللولو الصافي
من غبيب الدار جيواني
راكدٍ ماهوب هزّافي
لو بِعَد عني وِ خلاني
حب مثله صعب ينعافي
حيث قلبي فيه وصاني
احفظه لو كان لي جافي
وما أبدّل حبه بْثاني
لو شكيت بْحبه اتلافي
فيه راح العمر مَ امداني
خذ شبابي وْ مَر خطافي
#FMHM7
كلِّ ليله تلفي طْيوفك ضيوف
والوله ياخذ خفوقي ويشعله
ليت مرَّه صدفتك فيني تروف
وبْحضورك تنطفي نار الوله
المشاعر معلنه حالة عزوف
والحشا يحرم لغيرك يدخله
وإن لفى مُعجب منعته لا يطوف
لو عطاني من شعوره أجمله
وانته لْذكراك عَ اضلاعي صفوف
جيش حبِّك كلِّ مايل يعدله
عايش وميّت مثل ما انته تشوف
قصِّتي بعدك بليّا تكمله
مايعيضوني الغواني والخشوف
يالوحيد اللي وصوفه مذهله
ردِّ لي مليت من شوف الطيوف
وارحم مْحبٍّ غيابك يقتله!
#FMHM7
يالقديم الحاضر وكل شي جديد
وين ما لديت لك صورة وصوت
الاغاني والرسايل والقصيد
كلَّها تحيا بك ودونك تموت
#FMHM7 ❤️🩹
عسى فال السعد دايم لزيمك
وعساك تعيش في خير وسعاده
وعسى ربي على الدنيا يديمك
سنين طوال ما تشكي النكاده
وأنا لو قد غدى قلبي نديمك
يِمِر عمري وِ حبك في زياده
جنان الغير ما تسوى جحيمك
ولا لي في محبتها اراده
أنا لو ما سكن شخصي صميمك
صميم الغير مايغري وداده
#FMHM7
تعداني الملام ولا بقى مني عتب وقصور
أنا سويت كل حاجه ولا به شي بيديني
فمان الله بَعَد ما كان لي داخل حياتك دور
غديت اليوم ذكرى ما تبكّيك و تبكّيني
عسى ربٍّ زرع لك داخلي حب وغلا وشعور
يردّك وإن تعذّر يا عسى ربي ينسّيني
ختام السالفة لو طال صدك يالغلا معذور
مدام اللي تبقّى من طواري الأمس يكفيني
ابد ماحد ع دروب المواصل والجفا مجبور
توكل في قرارك والذي يرضيك يرضيني
أنا في كل حالاتي بنفسي راضي ومسرور
سواءً كنت تهواني أو إنك كنت تجفيني
#FMHM7
ياللي قوامك غض ممشوق
صوبك يسير القلب سيده
حتى الخياشي فوقك تْلوق
هذا من اللي فيك احيده
والسادة اللي يمزر السوق
انته تحليه وتزيده
حتى المخور ودَّه يضوق
حول الجسم ويلف قيده
#FMHM7
العيد عيده كامل الذوق
لي وَصْلِته عني بعيده
خلٍّ عن الّعْتاب مرفوق
فيه التواصيف الفريده
له منزلٍ فاليوف مرموق
يا حظ من شَارَكْه عيده
اللي عليه إيفيض بي الشوق
وبحضوره إتزين القصيده
فيه الحسن وصفٍ ومنطوق
محشوم وِخصاله حميده
بين العرب له موقعٍ فوق
وإن ردِّ لي له ما يريده
#FMHM7
عن سواك القلب في حالة صيام
وإن لفاه الوصل من صوبك فطر
يا دُعائي ومنوتي وقت القيام
خلْني أفرح بِك قبل عيد الفطر !
#FMHM7

