Karim Said- كريم سعيد

ان شاء الله .. نتقابل ٢:٣٠ عصرا عبر شاشة مودرن وحديث عن خناقة السوشيال ميديا بين " التراس" حسام حسن .. و"التراس" محمد صلاح ... وبرأيك .. هل ظلم حسام حسن بطريقة خروجه من المنتخب .. ام.. كانت نهاية طبيعية ومتوقعة لتصرفاته خلال الفترة الاخيرة؟!

هل تعكس الصورة روح معنوية عالية لبطل يستعد للانقضاض على صدارة هدافي منتخب مصر عبر التاريخ اذا ما استطاع تسجيل هدفين فقط خلال مباراتي مصر امام مالاوي يومي الجمعة والثلاثاء؟!.. محمد صلاح صاحب ال٦٨ هدف دولي مع المنتخب يفصله فقط هدفين عن تحطيم وكسر الرقم المسجل بأسم حسام حسن - ٦٩ هدف.. فعل يفعلها الملك المصري خلال مباراتي الجمعة والثلاثاء؟!.. نستنى ونشوف...

شفت فيديو لبرنامج على قناة اوربت .. فيه الاستاذة بتحذر الناس من برج الاسد (اللي انا منهم) من اقتراب كوكبي المريخ والمشترى من بعض تقريبا يوم ١٦ نوفمبر .. وانه ده بقى هيتسبب في مشاكل اقتصادية وعاطفية ومش عارف ايه 🙄🙄🙄... وطبعا الفيديو ده اقل ما يقال عليه انه مثال صريح لنشر الجهل بين الناس... لان الاستاذة فيه بتدعي علم الغيب وهو امر منهي عنه تماما في القرأن الكريم سواء لرزق الانسان نفسه او اي امور خاصة بمصيره... الدليل ✅ : ﴿وَمَا تَدْرِي نَفْسٌ مَّاذَا تَكْسِبُ غَدًا﴾ (لقمان 34).. ✅ ﴿قُل لَّا يَعْلَمُ مَن فِي السَّمَاوَاتِ وَالْأَرْضِ الْغَيْبَ إِلَّا اللَّهُ﴾ (النمل 65)... يعني المستقبل غيب، والغيب عند الله وحده. محدش يقدر يتكلم عن مستقبل البشر من خلال مواقع النجوم أو “الخريطة الفلكية”... والكارثة بقى .. انهم بيستنوا حدوث اي مصيبة في اي حتة في العالم عشان يبرهن لحضرتك ان كلامه كان صح .. واصلا طبيعي ان في كوارث بتحصل عالميا ودوليا كل يوم .. بس الناس ديه بتستغل ترهيب وتخويف الناس اللي بتحب تسمع الفيديوهات اللي من النوع ده... علمياً كمان.. مفيش أي دليل علمي يثبت إن حركة الكواكب أو الأبراج بتأثر على شخصيتك أو مستقبلك. الدراسات العلمية اللي اتعملت على الموضوع ده طلعت بنتيجة إن التنجيم مش أحسن من الصدفة. الجاذبية اللي جاية من الكواكب أضعف بمراحل من تأثيرات يومية عادية حوالينا.... ولازم كل واحد يبقي عارف ان مفيش اي حاجة فلكية هتاثر عليك او على نفسيتك او على امورك الاقتصادية او العاطفية الا تصرفاتك انت .. الدليل ✅: ﴿وَأَن لَّيْسَ لِلْإِنسَانِ إِلَّا مَا سَعَىٰ﴾ .. (النجم 39) ✅: ﴿إِنَّ اللَّهَ لَا يُغَيِّرُ مَا بِقَوْمٍ حَتَّىٰ يُغَيِّرُوا مَا بِأَنفُسِهِمْ﴾.. (الرعد 11) اما بالنسبة للنجوم وحركتها.. فالله تعالى خلقها علامات للاهتداء سواء ملاحيا او زمنيا (﴿وَبِالنَّجْمِ هُمْ يَهْتَدُونَ﴾)، مش عشان نعرف بيها مصير الناس او نتنبأ بالمستقبل والعياذ بالله.. الكلام ده فعلا زاد عن حده .. ولازم يقف تماما لانه بيساعد في نشر الجهل والخرافات بين الناس .. وعيب على مؤسسة كانت كبيرة زي اوربيت انها تقدم اعلام بالمنظر ده !!! اتمنى من المجلس الاعلى للاعلام التدخل ومنع محتوى الدجل والشعوذة ده من الوصول للبيوت وعقول الناس!!!

#وجهة_نظر_شخصية أمور لازم على ماهر يعملها عشان تجربته مع المنتخب ما تروحش لنفس الشوارع المقفولة اللي راحت لها تجربة الراحل إيهاب جلال وأدت إلى انتهائها بسرعة الصاروخ… ١- علي ماهر من أول يوم شغل مع المنتخب لازم يحترم النقد بكل أنواعه سواء الموضوعي أو اللاذع.. وأي كان منبعه سواء إعلام أو جمهور.. ٢- خير الكلام ما قلّ ودلّ.. الأفضل لعلي ماهر في البداية عدم الإدلاء ببيانات أو آراء من تلقاء نفسه.. والإجابة فقط على الأسئلة من الإعلام والصحافة… ٣- إعطاء مساحة العمل لكل أفراد الجهاز الفني.. وأهم ٣ أفراد في الجهاز حالياً هم: الدكتور محمد أبو العلا اللي معاه كل بروفايلات اللاعبين الصحية + تياجو مدرب الأحمال اللي معاه كل بروفايلات اللاعبين البدنية + محمود سليم محلل الاداء اللي معاه كل بروفايلات اللاعبين الرقمية.. ده الهيكل الأساسي للشغل.. وبإذن الله كابتن علي ماهر يبني عليه ويزوّده بتدخلاته الفنية… ٤- البعد تماماً عن التراشقات مع أي أطراف أخرى.. والتركيز فقط على العمل.. وعدم الانجراف خلف أي “كمين” ممكن يتنصب خلال الفترة الحالية بهدف عمل مقارنات بين الجهاز الفني الحالي والسابق.. وده كده كده هيحصل… ٥- تطوير منظومة العمل داخل المنتخب لرفع نسبة استخدام تكنولوجيا الأرقام.. وزيادة الاعتماد على أجهزة الإعداد البدني والاستشفاء.. إضافة إلى استمرار الاعتماد على أخصائي التغذية اللي كان مع المنتخب خلال المونديال… ٦- وأخيراً.. وللمرة المليون.. البعد تماماً عن الشخصنة مع اللاعبين أو تعزيز “الأنا” في نسب أي نجاح يحققه المنتخب لشخص المدير الفني.. النجاح نجاح الكل.. والفشل لا قدّر الله فشل الكل…

اهلا يا محمد... لا ممشيش من النادي خالص .. هو عضو مجلس ادارة ومسوول حالي لكن ساب منصب المدير الرياضي من شهرين.. لكنه مسوول رسمي في النادي ونزلنا توضيح بكدة

#حقيقة_اليوم اي محب للكابتن حسام حسن زعلان عشان الاقالة وهيحاول يدخله في اي مقارنة فنية او بطولات او انجازات تاريخية مع محمد صلاح .. فاعرف انك بتضر وبتحرج حسام حسن اكتر ما انت بتفيده ... مفيش اي اسم لاعب مصري في التاريخ كله يتنافس مع صلاح كانجازات لاعب كرة قدم .. صلاح قفل اللعبة حرفيا .. واي حد هيخونه عقله في لحظة ضيقة او زعل عشان يعمل المقارنة ديه .. فهو ببساطة دخل في الحيطة!!!

اهلا يا سامي ... قريتها طبعا وديه وجهة نظره وهو حر فيها لكن يبقي مصطفى محمد خامة ممتازة واحنا عارفين قدراته ونقدر نساعده انه يرجع تاني ان شاء الله لانه مهاجم قوي .. وياما لاعيبة مستواها نزل بسبب ظروف مروا بيها ورجعوا تاني ... افتكر ايام كابتن جوهري كان بيضم مجدي طلبة وهو مش مقيد في نادي اصلا لغاية لما رجع على الاهلي...

أول وأهم رسالة لازم تخرج من علي ماهر في أول مؤتمر صحفي له مع المنتخب.. “لا إقصاء لأي لاعب لأي أسباب شخصية أو خارج الملعب. المنتخب مفتوح لكل اللاعبين بناءً على مستواهم الفني والبدني داخل الملعب فقط.” المنتخب محتاج يفتح الباب تاني لكل اللاعبين اللي تم اقصائهم في الفترة السابقة لأسباب شخصية، وعلى رأسهم مصطفى محمد اللي المنتخب محتاج يكسبه تاني في وقت بنشحت فيه مركز ٩ حرفيا...

هو انا يعني اللي الفت الاحداث ديه .. مهو اللي عملها بنفسه 🙄🙄🙄

#وجهة_نظر_شخصية كما كان متوقع خلال الأشهر القليلة الأخيرة، وبالتحديد من بعد المونديال وكثرة أزمات حسام حسن سواء داخل الملعب أو خارجه.. انتهت حقبة التوأم على رأس الجهاز الفني لمنتخب مصر.. ووسط ما يحاول البعض للأسف إظهار حسام في موقع “المظلوم أو المجني عليه”، إضافة إلى تحميل محمد صلاح مسؤولية رحيل الجهاز الفني بالكامل.. أحب أن أوضح عدم حقيقة كل هذه الادعاءات.. والتأكيد على أن حسام حسن هو من ظلم نفسه بنفسه بدون أي مؤامرات أو ترصد من أحد تجاهه.. بل والأكثر من ذلك أن صلاح نفسه، بعيدًا عن دوره الفني داخل الملعب، ساهم في إنجازات المنتخب في حقبة حسام بتدخلات إدارية من خارج الملعب وقام بدفع بعض من ثمنها من جيبه الخاص.. وكل ده بالدلائل والبراهين 👇👇👇: ١- حسام هو اللي ظلم نفسه بنفسه.. لما رفض استمرار حالة العمل الجماعي اللي كانت موجودة في وقت المونديال.. وبدأ بتصرفات غريبة وعجيبة يرفض نسب أي شيء من الإنجاز لأي فرد في الجهاز بعيد عنه.. وقراره بمنع أي فرد في الجهاز من الظهور الإعلامي بعد البطولة، خصوصًا بعد لقطة محلل الأداء محمود سليم الشهيرة قبل ركلات ترجيح مباراة أستراليا.. واللي بسببها محمود خد “سوكسيه” نجاح المنتخب في ركلات الترجيح، وبعدها حسام أصر أن محمود يمشي من المنتخب لولا تدخل بعض الوسطاء… ٢- المشاكل والأزمات الشخصية لحسام واللي امتدت لأكثر من اربع شهور دلوقتي.. محدش كان السبب فيها ولا حد ترصدله.. ووصلنا في النهاية لحد ما المجلس الأعلى لتنظيم الإعلام منعه من الظهور الإعلامي في سابقة تاريخية إن مدرب منتخب مصر يبقى ممنوع يظهر إعلاميًا بسبب خلافات شخصية؟ وطبعًا ديه إهانة لمنصب المدير الفني ومكانش ينفع تعدي كدة… ٣- لو كان في اي مساحد ترصد شخصي لحسام من اي شخص.. كان المفروض تكون من هاني الوريدة بعد ما حسام كان غتح عليه النار قبل انتخابات اتحاد الكرة وقال جملته الشهيرة " مترجعوش الوشوش القديمة".. ورغم ان اي حد ممكن يشوف انه كان من حق ابوريدة اول ما يكسب الانتخابات وقتها يمشي حسام بسبب التصريح ده .. ابوريدة معملش كدة .. وكان عقلاني الى اقصى درجة في التعامل مع حسام وابراهيم والتزم بالعقد الممضي معاهم حرفيا... ٤- تعمد حسام صنع الأزمات مع نجوم المنتخب.. بدأ بحجازي وبعده مصطفى محمد وبعدهم الشناوي لغاية لما وصل لصلاح، واللي تعمد يهينه لما قال إن تغييره في ماتش أنجولا في الدقيقة 60 كان فني!!! ٥- ونقطة صلاح على وجه التحديد كانت إنكار جميل واضح من حسام لكل المساعدات اللي عملها صلاح للمنتخب سواء قبل كأس الأمم أو قبل المونديال.. وفي الآخر كانت الإشادات بتروح لحسام.. ونوثقها تاني… صلاح قبل كأس الأمم الإفريقية عمل خناقة كبيرة جدًا وصلت لوزارة الشباب والرياضة عشان يستقدم مدرب أحمال كويس بدل من المدرب البرازيلي “المغشوش” اللي كان موجود.. وبسبب الخطوة ديه معدلات اللياقة والأحمال للمنتخب اتحسنت جامد جدًا في البطولة وقتها… برضو قبل المونديال.. صلاح اتدخل إداريًا ومن جيبه الخاص استقدم 2 أخصائيين تغذية محترفين بعد موافقة الجهاز الطبي، وكان لهم دور كبير مع اللاعبين في البطولة… أخيرًا.. بكل إنصاف حسام حسن اجتهد وعمل اللي عليه مع الفريق.. لكنه بعد المونديال قرر إنه ينسب كل حاجة لنفسه بس وصور لنفسه إنه الآمر الناهي في كل شيء وعلى أي حد.. في مشهد شبيه جدًا لسيناريو فيلم “الشادر” لأحمد زكي.. نفس البداية.. ونهاية متوقعة بسبب كل المعطيات اللي أدت لهذه النهاية الحتمية!!!

اسبانيا والمانيا .. مش ايطاليا .. اسمع كويس وبلاش نقل بدون تركيز .. ركز شوية 👌👌

من الاخر فيما يخص شركة الكرة لنادي الزمالك .. وضروري جدا ادارة الزمالك متعملش الغلطة ديه 👇👇👇

يا راجل بتقول ايه بس 😃😃 كل اللي بيحصل ده من وقت الصيف في الساحل مش مسمع عندك اي حاجة 😂😂

للمرة الاولى تاريخيا .. يمنع المدير الفني لمنتخب مصر من الظهور في اي وسيلة اعلامية .. قرار بكل تأكيد هينتقص من هيبة المدرب امام لاعبيه .. في وقت هو نفسه عنده مشاكل مع اكتر من لاعب خصوصا " كبار المنتخب حاليا"... حسام حسن لم يصن منصبه .. ولم يحافظ على الفرصة التي اتيحت له من العدم حرفيا.. اعتقد وبنسبة كبيرة .. مسألة منع حسام حسن بقى من " كرسي المدير الفني نفسه".. يتم التحضير لها على نار هادئة...