Kid Kass🔻

من اكبر المصايب في السياسة هو داء التطهرية. الترفع عن الاشتباك السياسي بغرض التطهر والنقاء الثوري ومساواة كل الحاجات ببعض على طريقة احمد ذكي كلنا فاسدون ، ويا عم كلهم أوساخ. دا بيدي شعور جميل مريح بالتفوق الأخلاقي ولكن بيتسبب في كوارث في المجتمع والسياسة لأن مفيش حاجة صفرية ومش كل حاجة زي التانية. والسياسة هي فن الممكن. بنشوف دا في التعليقات على الانتخابات الأمريكية ، شوفنا دا وقت الثورة المصرية ودي كانت من أسباب هزيمتها وشعارات زي "يسقط كل من خان ، عسكر فلول اخوان" فبقيت تساوي العسكر بالإخوان فلبسنا في حكم عسكري. وترفع عن السياسة باعتبارها نجاسة او حاجة مختلفة عن طريق الثورة ، مع ان السياسة وسيلة من الوسائل لتحقيق أهدافك ، المعيار بس عدم التخلي عن مبادئك. لينين كان له كتاب جميل اسمه "مرض اليسارية الطفولي في الشيوعية" كان بيهاجم فيه الأحزاب الشيوعية الأوروبية الي بتهاجم فكرة العمل داخل البرلمان والنقابات والانتخابات عشان شايفين دا خيانة ورافضين اي تحالفات مع اي قوى سياسية تانية ، وكان شايف دا انتحار سياسي وهيتسبب في عزلتك عن الجماهير أصلا والأحسن هو استخدام الحاجات دي كمنصات تفضح فيها النظام البرجوازي من الداخل وتقدر تتواصل مع الجماهير بشكل اكبر وإن دي طفولية ومش دليل على الثورية ولا نيلة وانتقد مبدأ "لا مساومة أبدا" وقال ان عادي تحصل مساومات تكتيكية مرحلية. المسلمين فرحوا بإنتصار الروم على الفرس ، محدش طلع قال كلهم أوساخ شبه بعض ملناش دعوة ، لأ احيانا انتصار طرف على التاني بيقوى شوكتك وموقفك ، وتشوف مين اقربلك دلوقتي. التطهرية والطفولية دي مرض موجود عند اليساريين والإسلاميين بشكل ضخم ، فتلاقي ناس بتسأل احمد طنطاوي ايوة فين تمثيل بقى المثليين والترانس في حملتك. الفكرة ان تاريخيا دا بينتج عنه نتائج كارثية ، يعني بسبب موقف الشيوعيين في ألمانيا الي انتقده لينين هتلر وصل للسلطة بعد كدا وفي مصر لبسنا في انقلاب عسكري. عشان للمفاجأة مفيش في الحياة ابيض واسود.

فيه التفرقة بين نقطتين بخصوص مكسب عبد الرحمن السيد في ميتشيجن أهمية الانتصار دا مش انه انتصار للديموقراطيين ، الديموقراطيين في امريكا هما الي دعموا إبادة غزة وقت جو بايدن ، ولا الانتصار في انه يبقى اول سيناتور مسلم في تاريخ امريكا ، عشان ممكن يبقى الرئيس الخمسين لأمريكا مجرم حرب مسلم ومن أصول عربية ويدعم اسرائيل عادي جدا بالمناسبة. الانتصار هو في هزيمة التيار اليميني في امريكا وفي فاشية ترامب وهزيمة التيار اليميني داخل الحزب الديمقراطي نفسه. والانتصار الأكبر هو ليه الجمهوريين انهزموا وليه تم انتخاب عبد الرحمن السيد ، كل استطلاعات الاراء وكل التعليقات ان الناس زهقت من دعم امريكا غير المحدود لإسرائيل ومن مدى تدخل ايباك في السياسة الأمريكية. لأول مرة في التاريخ ان يبقى المزاج العام معادي لإسرائيل ومؤيد لفلسطين لدرجة خلت ترامب يحاول يلحق نفسه ويقول هنوقف مساعدات اسرائيل. هو مش بس كدا عبد الرحمن السيد ٦٠٪ من الجالية اليهودية انتخبته أصلا. قبل ٧ اكتوبر كان لازم تقديم صكوك الولاء لإسرائيل عشان اي سياسي ينجح ، دلوقتي العكس تماما لازم تتبرا من اسرائيل ، دا في رأيي الانتصار الأعظم والي هيؤدي لتغيير خطاب وسياسيات الديموقراطيين والجمهوريين على حد سواء لأنهم قصاد كارثة. ثانيا هزيمة الخطاب اليميني الشعبوي المعادى للمسلمين ، الخطاب بتاع الحقوا امريكا هيطبقوا الشريعة وهتتعلموا عربي وامك هتلبس الحجاب كل دا مع كل مكسب الناس بتكتشف انه كلام فشنك ، لأن زهران ممداني كسب عمدة نيويورك وسمعنا نفس الكلام وبعدها كل امريكا مبهورة بانخفاض معدل الجرائم وانخفاض أسعار السلع وطلع كل الكلام الاسلاموفوبيك كلام فاضي.