Manito Nation

Mwen pran dènye jou yo pou m koute ak apresye dènye albòm GWOLOBO a, "Lobocity : Tout yon Inivè". Premye bagay mwen ka di, se pa yon albòm ki kontante l aliyen mizik youn dèyè lòt, se yon eksperyans mizikal sa ye, albòm nan transmèt sansasyon, vibrasyon, souvni ak emosyon atravè chak son, chak enstriman, chak pawòl. Se yon vwayaj kote mizik la pa sèlman rantre nan zòrèy ou, li travèse kò a epi li rive touche anndan tchè w. Lobocity : Tout Yon Inivè abòde divès sijè sou lavi, men sitou sou lavi pa nou kòm Ayisyen. Li pale sou migrasyon, sou distans ki separe nou ak lakay, men tou sou responsablite nou genyen pou nou konstwi peyi sa epi prepare yon demen miyò pou timoun yo. Li mennen nou tou nan yon seri gwo moman nostalji pou tout sa ki te konn bay lavi ann Ayiti yon gou espesyal. Yon mizik tankou “Gran Dou” raple nou plezi senp lè nou te timoun, ti jwèt nou yo, libète nou ak tout ti moman ki te konn fè nou kontan san nou pa t menm rann nou kont valè yo. Albòm nan selebre relasyon nou ak lanati, lanati nou chwazi kòm alye, men li selebre tou kominote a nan tout fasèt li. Li rann omaj ak machann akasan an, ak chofè kamyonèt la, ak tout moun sa yo ki fòme dekorasyon lavi chak jou nou yo. Se moun pa nou, figi pa nou, vwa pa nou ak listwa pa nou. Li pale tou sou lanmou ant de moun: yon lanmou kote youn pa sèlman renmen lòt la, men li vin tounen fòs li, refij li, sipò li ak rezon li pou l kontinye vanse. Se youn nan rezon mwen renmen mizik “Fòs” la anpil. Se yon bèl mizik lanmou sou fason prezans yon moun kapab sèvi kòm poto mitan pou yon lòt. Men albòm nan pa rete sèlman nan nostalji ak lanmou. Li antre tou nan kestyon chanjman sosyal ak byennèt kolektif. Nan entwodiksyon mizik "Kase Zo A", Kabysh reprann pawòl selèb Gil Scott-Heron yo: “The revolution won’t be televised.” Se yon rapèl enpòtan: vrè chanjman sosyal la pa yon espektak. Li p ap fèt sèlman nan diskou, sou ekran oswa nan sa moun ap poste sou rezo sosyal. Li fèt nan lavi reyèl, nan aksyon nou, nan fason nou òganize nou, nan solidarite nou ak nan angajman nou pou nou transfòme kondisyon lavi tout moun pou n atenn #byennetkolektif la. Apre sis ekout, mizik mwen pi renmen sou albòm nan se “Se pa Sa.” Se yon mizik ki raple nou gen plis bagay nan lavi, epi gen plis bagay ki ini nou, pase tout goumen n ap fè youn ak lòt yo. Gen plis leson pou nou aprann, plis bagay enpòtan pou nou pwoteje, epi pi gwo objektif pou nou mete tèt ansanm pou nou reyalize. “Se pa Sa” a se tankou yon envitasyon pou nou pran yon ti tan, fè yon ti bak, gade sa ki vrèman enpòtan epi sonje nou pa la sèlman pou nou divize, konfwonte oswa detwi youn lòt. Nou la tou pou nou konstwi, aprann, renmen epi avanse ansanm. E tout linivè sa a chita sou yon eksperyans enstrimantal ki vrèman san parèy. Nou jwenn eleman twoubadou, mizik rasin, bèl kout tanbou ak pèkisyon, wòk altènatif ak bèl riff gita ki bay pwojè a anpil pwofondè. Tout sa melanje ak son elektwonik ki pran enspirasyon nan afro house, amapiano, raratech ak trance. Se yon vrè melting pot mizikal. Yon rankont ant tradisyon ak modènite, ant Ayiti nou sonje a ak Ayiti nou ta renmen konstwi a, ant rit tanbou yo ak son elektwonik yo, ant nostalji, konsyans sosyal, lanmou ak lespwa. Lobocity : Tout Yon Inivè se yon albòm ki gen nanm. Se yon pwojè ki mande pou nou pran tan nou, antre ladan l, viv li epi kite l mennen nou kote li vle. Mwen vrèman envite nou al tande kokennchenn albòm sa a. Se pa sèlman mizik n ap dekouvri; se yon linivè an antye n ap antre ladan l. Vrèman felisitasyon @ManitoNation @Kabysh_ @badio_official @im_k0l0 @PaulBeaubrun Tande l la open.spotify.com/album/5M8bp…