آبےـو مےـعےـآذ

اقلب الصفحة وماتبصش وراك .. اللي يبيعك بالرخيص، ماتديلوش من وقتك ولا حتى بنُص ثانية عتاب. اللي يخرج من حياتك بناقص منه، سيب مكان الفراغ بتاعه نضيف للي يستحقه✨🚪

✍🏻 سؤال وياريت حد من اللي زعلانين من الهجوم على محمد صلاح يتكرم ويرد علينا، ويمكن بالمرة يفهمنا المنطق اللي بيفكروا بيه 🤔 ليه كل ما تشوفوا حد بيدافع عن حسام حسن أو بينتقد محمد صلاح، تقولوا عليه إخوانجي؟! هو إيه علاقة الإخوان أصلًا بإن واحد مقتنع إن حسام حسن اتظلم، أو شايف إن محمد صلاح غلطان؟.. أو إنكم مقتنعين إن محمد صلاح مش غلطان؟!! هو الاختلاف بقى جريمة، ولا لازم كل الناس تشوف كل حاجة بنفس نظرتكم وتردد نفس كلامكم؟! طب معلش، أخواتنا المسيحيين، وكل الاحترام والتقدير ليهم، لو واحد منهم دافع عن حسام حسن وانتقد محمد صلاح، هيبقى هو كمان إخوانجي؟! ولا عندكم تصنيف تاني جاهز للحالة دي؟! 😅 ولا عشان مش لاقيين رد على الكلام، بتهاجموا اللي بيختلف معاكم بأي حاجة، عشان تداروا عجزكم عن الرد؟! بجد والله محتاجين حد يفهمنا تركيبة دماغكم دي شغالة إزاي، والصنف اللي بتشربوه إيه، عشان إحنا شكلنا محتاجين دروس مكثفة في طريقة التفكير بتاعتكم ... لأن بصراحة مش قادرين نستوعب العبقرية دي!! 🤨😅

النجومية ممكن تعمل منك نجم عالمي 👌 لكن اللي بيصنع الأساطير هو اللي بتقدمه لمنتخب بلدك، مش بس اللي بتقدمه لنفسك!! 🤚🇪🇬

هاني أبو ريدة يوضح سر وجود أحمد مجاهد في اتحاد الكرة: أحمد مجاهد صديقي، وموجود معانا بصفته واحد من الخبراء اللي بنستعين بيهم، ومينفعش نستغنى عنه، لأنه مفيد للكرة المصرية، وبنرجع له في مواقف كتير.بعيدًا عن المناصب 😏🤔😂

🔴 اختلافك معايا مش بيديك الحق تقل أدبك! 🔴 ✍🏻 كلمتين لدراويش المو صلاح بمناسبة هجومي عليه 👌 خليني أوضحلك حاجة .. مش شرط كل حاجة أكتبها تعجبك، ومش شرط كل رأي أقوله يكون على مزاجك أو متفق مع اللي إنت شايفه. وارد أكون صح وإنت غلط، ووارد العكس، ووارد كل واحد فينا يكون شايف الموضوع من زاوية مختلفة. ودي حاجة طبيعية جدًا ومفيهاش أي مشكلة. أنا معنديش مشكلة خالص إنك تختلف معايا، ولا إنك تنتقد كلامي، ولا حتى تقول إن رأيي غلط وتجيب ألف دليل يثبت وجهة نظرك. اتكلم معايا براحتك، وناقش، واعترض، واثبت إن كلامي غلط. إنما تيجي تدخل عندي تشتم وتغلط وتطلع كل الألفاظ الوسخة اللي في قاموسك، وتفتكر إنك كده بترد عليا أو بتثبت إنك فاهم أكتر مني، فاسمحلي أقولك إنك عاجز عن الرد! لأن اللي معندوش غير الشتيمة، واللي أول ما يختلف مع حد ينسى نفسه ويبدأ يوزع قلة أدبه على الناس، ده مش صاحب رأي. ده واحد مش عارف يفرق بين النقاش وخناقات الشوارع، ومتصور إن قلة الأدب ممكن تعوض عجزه عن الرد. والحقيقة إنك لما بتشتم، إنت مش بتقلل من اللي قدامك، إنت بتفضح نفسك، وبتكشف عن مستوى تفكيرك وأسلوبك وتربيتك الوسخة. لأنك لو محترم، حتى لو كنت مختلف معايا، هتقدر تقول رأيك بكل احترام، وأكيد كلامك هيتقبل بكل احترام. أنا مش فارق معايا توافقني ولا تعارضني، لكن اللي فارق معايا إنك تعرف حدودك وإنت بتتكلم معايا. مش معنى إني كتبت رأيي على صفحتي إني فتحتلك باب تستعرض فيه قاموس شتايمك، ولا معنى إني بسمح بالنقاش إني مضطر أتحمل قلة تربيتك وأسلوبك القذر. عايز تختلف؟ أهلًا بيك. عايز تنتقد؟ اتفضل. عندك رد أقوى من كلامي؟ قول. إنما داخل تشتم وتغلط وتعمل فيها أسد، ياريت توفر وساختك دي لنفسك. لأنك لو فاهم إن السفالة وقلة أدبك دي، وتربيتك اللي بتدل على وساختك، انتصار.. تبقى واهم نفسك. ولازم تفهم إنك لما تعجز تناقش وترد على الكلام، وتلجأ للإهانة والتجريح، فأنت مش بتقلل من قيمة اللي قدامك، إنت بس بتكشف عن نفسك وعن مستوى الحوار اللي إنت قادر تقدمه. اتفق معايا أو اختلف، وانتقد كلامي زي ما إنت عايز، لكن خليك محترم .. إنما وساختك دي وقلة التربية مش وجهة نظر. لأن الوساخة في الكلام مش شجاعة ولا جرأة .. إنت كده بتعرف اللي قدامك البيئة القذرة اللي عايش فيها وتربيتك الوسخة 🤚

🔴 طب ما تيجوا نحاكم محمد صلاح بنفس القواعد اللي حاكمتوا بيها حسام حسن!! 🤔 ✍🏻 لما اتكلمنا عن إن محمد صلاح كان سبب في أزمة حسام حسن ورحيله، خرج علينا أتباعه ودراويشه يدافعوا عنه، وكلهم تقريبًا متفقين إن حسام حسن مشي بسبب تصريحاته وتصرفاته غير المسؤولة، وإن اللي يقود منتخب مصر لازم يعرف يتكلم ويتصرف إزاي. تمام جدًّا جدًّا جدًّا .. ومفيش أي مشكلة 👌 بس بما إنكم اخترتوا التصريحات والتصرفات مقياس للحكم على الأشخاص، يبقى لازم نلتزم بنفس المقياس مع الجميع، ومينفعش نعمل استثناءات لمجرد إن الشخص ده نجم كبير أو بيلعب في أكبر أندية العالم. تعالوا بقى نفتكر شوية مواقف لمحمد صلاح، واللي كل واحد منها كان كفيل يفتح نقاش كبير حوالين تصرفاته وطريقة تعامله مع المواقف المختلفة. أولًا: وقت الأحداث في فلسطين، خرج صلاح بتصريح عن إن كل الأرواح مقدسة، في وقت كان فيه قطاع كبير من الجمهور منتظر منه موقف أوضح يتناسب مع حجم المأساة اللي كانت بتحصل!! ثانيًا: حديثه عن شرب الخمر، ولما اتسأل عن الموضوع قال إن نفسه مش بتروح ليها، بدل ما يكون رده واضح ومباشر من الناحية الدينية. وده كان محل انتقاد عند ناس كتير. ثالثًا: حضوره جنازة الملكة إليزابيث، في تصرف أثار استغراب وتساؤلات عند قطاع كبير من الجمهور!! رابعًا: ظهوره في جلسة استرخاء داخل معبد بوذي ومشاركته في طقوس المكان، وده برضه كان موقف مثير للجدل. وفتح باب كبير للنقاش والانتقادات حوالين الموقف!! خامسًا: مغادرة معسكر منتخب مصر خلال أمم أفريقيا 2024 بعد إصابته أمام غانا، والسفر لإنجلترا لاستكمال العلاج، بدل الاستمرار وسط زملائه في المنتخب باعتباره قائد الفريق!! سادسًا: دخوله في خلاف علني مع أسلوب اللعب تحت قيادة سلوت، وخروجه بتصريحات انتقد فيها طريقة إدارة الفريق!! سابعًا: المشادة الكلامية الشهيرة مع يورجن كلوب على خط التماس، وبعدها تصريحاته المثيرة للجدل، وعلى رأسها إن لو اتكلمت هتشتعل النيران!! ثامنًا: أزمته الأخيرة مع ليفربول بعد جلوسه احتياطيًا في 3 مباريات، وخروجه بعد مباراة ليدز بتصريحات اتهم فيها النادي بالتخلي عنه، وحمّل فيها الجهاز الفني مسؤولية الأزمة، وأعلن إن علاقته بسلوت انتهت، وإن فيه ناس داخل النادي مش عايزاه!! تاسعًا: أزمة شارة قيادة المنتخب، واللي صاحبها جدل كبير وقتها، بسبب طريقة انتقال الشارة من أحمد فتحي لمحمد صلاح، رغم إن فتحي كان الأقدم والأحق بيها وقتها!! عاشرًا: أزمة رفض اللعب على النجيل الصناعي مع المنتخب، رغم مشاركته في مباريات على نفس نوعية الملاعب مع فريقه. وأخيرًا: رد فعله بعد رحيل حسام حسن، والصورة اللي ظهر فيها بعلامة النصر وإخراج اللسان، واللي اتفهمت عند قطاع من الجمهور باعتبارها رسالة سخرية من المدير الفني السابق، في الوقت اللي اختار فيه لاعبين تانيين يودعوا الجهاز الفني بكلمات تقدير واحترام. 👈 دي مش قائمة اتهامات، ومش بقول إن كل موقف من دول بنفس درجة الخطأ، ولا إن كل تصرف لازم يتحاسب عليه بنفس الطريقة. لكن بطرح سؤال واضح جدًا: لو التصريحات والتصرفات غير المسؤولة هي المعيار اللي حاكمتوا بيه حسام حسن، يبقى ليه المعيار ده بيتوقف فجأة لما نوصل لمحمد صلاح؟! لو تصريحات حسام حسن وتصرفاته كانت سبب كافي لرحيله عن تدريب المنتخب، يبقى إيه المبرر إننا نتعامل مع مواقف محمد صلاح بمنطق مختلف تمامًا؟! هو الانضباط مطلوب من المدرب ومش مطلوب من اللاعب؟! هو احترام المنتخب والمنظومة واجب على المدير الفني، لكن النجم الكبير عنده حصانة؟! هو التصريحات المثيرة للجدل تتحسب على حسام حسن، لكن لما تصدر من محمد صلاح تتحول لاجتهادات شخصية وسوء فهم وتأويل؟! إنتوا اللي اخترتوا المعيار، وإحنا بس بنطالبكم تطبقوه على الكل من غير استثناءات. ولو هنمشي بنفس المنطق اللي حاكمتوا بيه حسام حسن، يبقى محمد صلاح كمان لازم يخضع لنفس التقييم، ومكانش المفروض يستمر في تمثيل المنتخب لو كانت دي فعلًا هي معاييركم!! إنما إننا نطالب برحيل مدرب بسبب تصرفاته، وندافع عن لاعب مهما كانت تصرفاته، فده مش عدل ولا مهنية.. ده اسمه ازدواجية معايير والكيل بمكيالين!! واضح إنكم بتترجموا المينتالتي على مزاجكم .. مع حسام حسن ليها حسابات، ومع محمد صلاح ليها حسابات تانية خالص!! 🤨 وسلام كبييييييير للمينتالتي 😏😅

🔴 الأهلي والسكة الحديد .. مباراة بعنوان: بداية رجوع الأهلي اللي نعرفه 🔴 ✍🏻 اللي شفناه النهارده من الأهلي يستحق إننا نقف عنده، مش لمجرد إننا كسبنا، لكن لأن الفريق ظهر بشكل مختلف، وكان فيه روح وإصرار وشخصية غابت عننا في مباريات كتير فاتت. واضح إن عموتة بدأ يستوعب طبيعة الأهلي بشكل أكبر، وإنه بدأ يقرب من اللي الجمهور مستنيه من الفريق، ودي خطوة مهمة نتمنى تكون بداية لتغيير حقيقي مش مجرد حالة مؤقتة مرتبطة بمباراة أو مباراتين. بس خلينا متفقين إن الطريق لسه طويل، وإن الأهلي محتاج شغل كتير عشان يرجع للمستوى اللي يليق باسمه وتاريخه. المطلوب مش إننا نقدم مباراة كويسة ونرجع تاني لنفس الأخطاء، المطلوب إن الأداء يتحسن من ماتش للتاني، وإن الروح اللي ظهرت في آخر مباراتين تبقى هي الأساس اللي الفريق يبني عليه. وعشان كده، المرحلة دي محتاجة مننا كلنا نكون على قدر المسؤولية. ندعم الفريق، نساند اللاعبين والجهاز الفني، ونسيبهم يشتغلوا في أجواء تساعدهم على التطور وتصحيح الأخطاء. لازم نفهم إن الدعم مش معناه إننا نتجاهل السلبيات، وإن النقد مش معناه إننا نقلل من أي خطوة إيجابية. إحنا ببساطة عايزين نشوف الأهلي بيتقدم، وعايزين كل مباراة تكون أحسن من اللي قبلها. آخر مباراتين شفنا ملامح من الأهلي اللي بنحبه، ودي حاجة تفرح وتدينا أمل، لكن الأهم من الفرحة إننا نشوف الكلام ده بيتكرر ويتحول لمستوى ثابت. خطوة كويسة في الاتجاه الصح .. وإن شاء الله تكون بداية رجوع الأهلي اللي نعرفه، بهيبته وشخصيته وقوته اللي بتفرض نفسها على أي منافس 🔴🦅❤️

أخطر حاجة ممكن تحصل إنك تفضل مشغول بإرضاء الجميع. لحد ما تنسى تسأل نفسك .. إنت مرتاح ولا لأ؟ 🤍 #ما_تتركه_الحياة #من_عُمْق_الأيام

🔴 منتخب مصر مش ملك لاعب .. والمدير الفني مش فوق المحاسبة!! 🔴 ✍🏻 بعيدًا عن اقتناعك بحسام حسن كمدير فني لمنتخب مصر من عدمه، وبعيدًا عن اتفاقنا أو اختلافنا مع شخصيته وطريقة إدارته، فيه مبدأ مهم لازم يكون واضح عند الجميع. مينفعش لاعب مهما كان اسمه أو حجمه أو تاريخه يتحكم في مصير مدير فني لمنتخب بحجم وقيمة منتخب مصر!! محمد صلاح اسم كبير في عالم كرة القدم، ونجح يصنع لنفسه تاريخ شخصي مميز، خصوصًا مع ليفربول، ووصل لمكانة عالمية يستحق التقدير عليها. لكن لما نتكلم عن منتخب مصر، لازم نفرّق بين إنجازاته الشخصية مع الأندية، وبين اللي قدمه للمنتخب على مستوى البطولات والإنجازات الجماعية. صلاح ماحققش مع المنتخب بطولات تضاف لتاريخ الكرة المصرية، وده مش معناه إننا بننكر قيمته كلاعب أو إنجازاته الشخصية، لكن في نفس الوقت مش منطقي إن مكانته العالمية تتحول لامتيازات استثنائية تخليه صاحب كلمة في مصير المدير الفني. المنتخب مش ملك لاعب، والمدير الفني مش موظف عند النجوم، وأي منظومة كروية محترمة لازم يكون فيها نظام واضح، وكل واحد يعرف حدود دوره ومسؤولياته. وفي المقابل، رفضنا لفكرة تحكم لاعب في مصير مدرب مش معناه إننا بندافع عن حسام حسن أو بنعتبره فوق النقد والمحاسبة. حسام حسن مسؤول عن تصرفاته وتصريحاته، وفيه أزمات ومشاكل إعلامية وشخصية حط نفسه فيها، ومينفعش ننكر إن النوع ده من الأزمات بيأثر على صورة منتخب مصر وسمعته. المدير الفني للمنتخب لازم يكون قد المسؤولية، ويحافظ على صورة المنتخب، ويتعامل مع المواقف المختلفة بحكمة واحترافية بدل ما يدخل في أزمات تشتت التركيز عن الهدف الأساسي. لكن فيه فرق كبير بين إننا نحاسب حسام حسن على أخطائه، وبين إننا نقيله لمجرد وجود خلاف بينه وبين محمد صلاح أو أي لاعب تاني. لو اتحاد الكرة شايف إن حسام حسن مش مناسب للمرحلة الجاية، أو إن نتائجه ومستواه الفني وطريقة إدارته مش على مستوى طموحات الجماهير، يبقى من حقه ياخد قرار التغيير، لكن لازم يكون قرار مبني على تقييم فني وإداري واضح، مش استجابة لضغوط أو محاولة لإرضاء لاعب مهما كان اسمه. لأن لو ترضية لاعب هتبقى على حساب المدرب، إحنا كده بنفتح الباب لفكرة أخطر، وهي إن كل لاعب يبقى له حساباته وشروطه، والمدير الفني يفقد سلطته وشخصيته، ويتحول لمجرد اسم موجود على الخط من غير قدرة حقيقية على إدارة الفريق. إحنا مش بندافع عن حسام حسن، ولا بنهاجم محمد صلاح، ومش بنبرر أخطاء أي طرف على حساب التاني. إحنا بنطالب بمنظومة تحترم نفسها، يكون فيها اتحاد كرة قادر ياخد قراراته، ومدير فني يتحمل مسؤولية شغله، ولاعبين يلتزموا بدورهم، بعيدًا عن الضغوط والصراعات الشخصية. المدرب يتحاسب على شغله، واللاعب يتحاسب على أدائه والتزامه، واتحاد الكرة يتحاسب على اختياراته وقراراته .. لكن محدش فيهم يبقى أكبر من منتخب مصر. إحنا محتاجين نرجع الهيبة للمنتخب، ونفهم إن مصلحة المنتخب لازم تكون فوق أي مصالح أو اعتبارات شخصية 🤚

فيه فرق كبير بين إنك تسامح حد، وإنك ترجعه لنفس المكانة اللي كان فيها.. الأولى راحة لقلبك 🤍 والتانية قرار لازم يستحقه 🔒 #ما_تتركه_الحياة #من_عُمْق_الأيام