Chama cha Wanasheria Uganda (ULS) kimesema ni aibu kwa eneo la Afrika Mashariki kuona watu wanaotetea maslahi ya umma wakilazimika kuchagua kati ya kutoa maoni yao na kubaki salama katika nchi zao, kikionya kuhusu kuongezeka kwa vitendo vya ukandamizaji vinavyovuka mipaka ya nchi. Katika taarifa iliyotolewa Kampala, Uganda, Oktoba 26, 2026, na kusainiwa na Makamu wa Rais wa ULS, Asiimwe Anthony, chama hicho kimelaani taarifa za kutekwa kwa Twaha Mwaipaya, mwanaharakati wa upinzani kutoka Tanzania, ambaye aliripotiwa kuchukuliwa na watu wasiojulikana Oktoba 25, mwaka huu, katika eneo la Kamulu, Kaunti ya Machakos nchini Kenya. Kwa mujibu wa taarifa hiyo, Mwaipaya alitekwa majira ya saa nane mchana akiwa safarini kwa teksi kwenda kuwatembelea marafiki zake, huku mahali alipo pakibaki hapajulikani hadi wakati taarifa hiyo inatolewa. ULS imesema matukio ya watu kutoweshwa kwa nguvu, kutekwa, kukamatwa kiholela na kutishwa kwa watu wenye misimamo tofauti yamewalazimu wanaharakati wa kisiasa, waandishi wa habari, wanasheria, majaji na watetezi wa haki za binadamu kukimbilia uhamishoni ndani ya Jumuiya ya Afrika Mashariki (EAC), lakini hata baadhi ya nchi wanazokimbilia zimeendelea kuwa na changamoto za usalama. Chama hicho kimetolea mfano wa Robert Kabera, aliyekuwa mwanajeshi wa Jeshi la Ulinzi la Rwanda na aliyekimbilia Uganda mwaka 2020, ambaye kwa mujibu wa taarifa hiyo, alikutwa amekatwa kichwa katika Wilaya ya Mpigi nchini Uganda, Oktoba 17, 2026. ULS imesema Serikali ya Uganda bado haijatoa maelezo kuhusu kifo hicho. Kuhusu Mwaipaya, ULS imesema iwapo Serikali ya Tanzania ina tuhuma za jinai dhidi yake, inapaswa kufuata utaratibu rasmi wa kisheria wa kumrejesha nchini kupitia mchakato wa extradition, huku ikihakikisha anapata haki ya kusikilizwa kwa mujibu wa sheria za Kenya. Chama hicho kimesisitiza kuwa hakuna tuhuma za jinai zinazoweza kuhalalisha kukwepa sheria na kumnyima mtu ulinzi wa mahakama, kikitaja pia suala la Dkt. Kizza Besigye na msaidizi wake, Obeid Lutale, kuwa jeraha ambalo bado halijapona katika eneo hilo. Aidha, ULS imezitaka Mahakama ya Afrika Mashariki na mahakama za nchi wanachama wa EAC kuzungumzia ukiukwaji huo, huku ikiwataka wakuu wa mahakama kutoa kauli za wazi na kuhakikisha serikali zinawajibika kwa kukomesha ukandamizaji unaovuka mipaka. Pia, imezitaka viongozi wa Umoja wa Afrika (AU), Umoja wa Mataifa (UN) na wakuu wa balozi za nchi mbalimbali kuacha ukimya kuhusu suala hilo, ikihitimisha kwa wito wa kupinga uvunjaji wa sheria na kumwachia huru Twaha Mwaipaya.