PT IT Wing

மதுராந்தகம் - தாராபுரம் இடைத்தேர்தல்கள்! தவெக சாதித்துவிடவும் இல்லை; திமுக, அதிமுக சாய்ந்து போய்விடவும் இல்லை! ...................................... தமிழ்நாட்டிற்கான சட்டமன்றப் பொதுத்தேர்தல் முடிவுற்று ஒரு மாதம்கூட ஆகாத நிலையில், ஆளுங்கட்சிப் பக்கம் சாய்ந்தால் ஆதாயமான பதவிகள் கிடைக்கும் என்ற அடிப்படையில், இதுவரை ஆறு சட்டமன்ற உறுப்பினர்கள் அதிமுகவிலிருந்து தவெகவிற்கு தாவி உள்ளனர். இது அப்பட்டமான ’குதிரை பேரம்’ என்று அனைவராலும் விமர்சிக்கப்பட்டது. சட்டரீதியாக இத்தேர்தலை நடத்த வழியில்லாத காரணத்தினாலே, தாராபுரம் மற்றும் மதுராந்தகத்திற்கு இடைத்தேர்தல் அறிவிக்கப்பட்டது. கடந்த நான்கு மாத ஆட்சியில் குறிப்பிட்டு சொல்லக்கூடிய சாதனைகள் எதையும் ஆளும்கட்சி செய்யாத நிலையில், நடைபெறக்கூடிய இடைத்தேர்தலில் ஆளுங்கட்சியான தவெக அவ்வளவு எளிதாக வெற்றி பெற முடியாது என்ற கருத்தை நாம் ஏற்கனவே வெளியிட்டிருந்தோம். அதற்கு ஏற்ப, அணி மாறிய இரண்டு வேட்பாளர்களும் தொகுதிக்குள் சென்ற இடமெல்லாம் பொதுமக்களின் எதிர்ப்புகளைச் சந்தித்தனர். கள நிலவரங்கள் நாளுக்கு நாள் ஆளுங்கட்சிக்கு எதிராகச் சென்றுகொண்டிருந்ததை அறிந்துகொண்ட விஜய், மதுராந்தகத்தில் 39 இடங்களில் பேரணி நடத்தினார். தாராபுரத்தில் மிக குறைவாக வாக்குகள் பெறக்கூடும் என்ற மூலனூர் ஒன்றியத்தில் மாட்டு வண்டியை ஓட்டினார்; முருங்கைக்காய் பறித்தார். அங்கிருக்கக்கூடிய பெரும்பான்மை சமுதாயத்தின் குலதெய்வக் கோயிலுக்குச் சென்று விழுந்து விழுந்து சாமி கும்பிட்டார். பொதுவாக இடைத்தேர்தல்களுக்கு முதலமைச்சராக இருக்கக்கூடியவர்கள் இப்படியெல்லாம் மூலைமுடுக்கெல்லாம் சென்று பிரச்சாரம் செய்த வரலாறு இதுவரை இல்லை. ஆட்சி பலம், அதிகார பலம், பண பலம் ஆகியவற்றைக் கொண்டு இரண்டு தொகுதிகளிலும் வெற்றி பெற்றுவிட்டார்கள். எனினும், தாராபுரத்தில் ஆறு சுற்றுகளில் அதிமுகவே முன்னிலை வகித்தது. அதிமுக இரண்டாவது இடத்தைப் பிடிக்கும் என்று எதிர்பார்க்கப்பட்ட நிலையில், மூன்றாவது இடத்திற்கு தள்ளப்பட்டுவிட்டது. இரண்டாவது இடத்திற்கு வந்த திமுகவிற்கும், வெற்றி பெற்ற தவெகவிற்கும் இடையே வாக்கு வித்தியாசம் வெறும் 9,471 மட்டுமே. அதேபோல மதுராந்தகத்திலும் பெரிய வித்தியாசம் ஒன்றும் இல்லை. பொதுவாக இடைத்தேர்தல்களில் ஆளுங்கட்சி லட்சக்கணக்கான வாக்குகள் வித்தியாசத்தில் வெற்றி பெற்றதே கடந்த கால வரலாறு ஆகும். எதிர்க்கட்சிகள் கடந்த தேர்தலில் சந்தித்த தோல்வி மனப்பான்மையிலிருந்து இன்னும் முழுமையாக மீண்டு வராதது; காலச் சூழ்நிலைகளுக்கு ஏற்ப கள அளவில் ஒன்றுபடாமல் இருந்தது; உண்மையான நேச சக்திகளை இணைத்துக்கொண்டு செயல்படாதது ஆகியவை ஆளுங்கட்சிக்கு நூலிழையில் சாதகமாக அமைந்துவிட்டது. எனவே, தவெக இடைத்தேர்தலில் சாதித்துவிட்டது என்று சொல்வதற்கு எதுவுமில்லை. கடந்த இரண்டு தேர்தல்களில் வாய்ச்சவடாலுடன் மாயாஜாலம் காட்டி நாடாளுமன்ற உறுப்பினர், சட்டமன்ற உறுப்பினர் பதவிகளை பெற்றுக் கொண்டவர்கள் ’பச்சோந்திகளாக’ மாறி எதிர்த்தரப்பிற்குச் சென்ற பின்னரும் தனது வாக்குகளைத் தக்கவைத்துக் கொண்டது திமுக சாய்ந்துவிடவில்லை என்பதையே காட்டுகிறது. இதன்மூலம் திமுகவுடன் கூட்டணியில் இருந்த காங்கிரஸ், மதிமுக, விசிக, ஐயுஎம்எல், கம்யூனிஸ்டுகள் உள்ளிட்ட கூட்டணிக் கட்சிகளின் வாக்குகள் சட்டமன்றப் பொதுத் தேர்தலிலேயே திட்டமிட்டு மடைமாற்றப்பட்டு விட்டன என்பது உறுதியாகி உள்ளது; யார் யாரால் பலன்பெற்றிருக்கிறார்கள் என்பதும் வெட்டவெளிச்சமாகி உள்ளது. அதிமுகவைப் பொறுத்தமட்டிலும், பொதுத் தேர்தலில் முதலிடத்திலிருந்த அதிமுக இப்போது மூன்றாவது இடத்திற்கு வந்திருக்கிறது. தேர்தலுக்குப் பின்பு அக்கட்சி சட்டமன்ற உறுப்பினர்கள் இடையே ஏற்பட்ட பிளவுகள், பலர் அணி மாறியது, ஒவ்வொரு வாரமும் சனிக்கிழமை வாரச்சந்தையில் கூடுவதுபோல பனையூரில் முன் கேட் வழியாகவும் பின் கேட் வழியாகவும் தவெகவில் தங்களை இணைத்துக் கொண்டது, மேல்மட்டத்தில் ஏற்பட்ட அதிகாரப் போட்டிகள், கள அளவில் பணியாற்ற போதிய தொண்டர்கள் இல்லாதது ஆகியவை அதனுடைய வாக்கு வங்கியைக் குறைத்ததோடு, மூன்றாவது இடத்திற்கும் தள்ளிவிட்டது. 2026 சட்டமன்றத் தேர்தல் அதிமுக கூட்டணியில் அல்வாவை போல ஒரு நாடாளுமன்ற மேலவை உறுப்பினர் பதவியையும், 17 சட்டமன்றத் தொகுதிகளையும் பெற்ற அன்புமணி வஞ்சகத்தோடு நடுநிலைமை வகித்தது அதிமுகவிற்குப் பெரிய பலம் இழப்பாகும். இந்தத் தேர்தலைப் பொறுத்தமட்டிலும் தமிழக அரசியல் களத்தில் பச்சோந்திகளையும், சந்தர்ப்பவாதிகளையும் பொதுவெளியில் நன்கே அடையாளம் காட்டியிருக்கிறது. விஜயின் பலவீனத்தை வெளிப்படுத்தி, தமிழகத்தில் உள்ள எதிர் கட்சிகள் ஒருங்கிணைந்து பணியாற்ற வேண்டியதற்குண்டான எச்சரிக்கையையும், எதிர்காலத்திற்கான சரியான அரசியல் களத்தையும் அமைத்து கொடுத்துள்ளது.

வங்கி ஊழியர்களின் தொடர் போராட்டம் - தொழில்கள், சேவைகள் முடங்கும் அபாயம் - மத்திய அரசு மெத்தனமாக இருக்கக் கூடாது! வங்கி ஊழியர்களின் நியாயமான கோரிக்கைகளுக்கு தீர்வுகாண மத்திய நிதித்துறை அமைச்சர் நிர்மலா சீதாராமன் அவர்கள் நேரடியாக தலையிட வேண்டும்! ........................................ தேசியமயமாக்கப்பட்ட வங்கி ஊழியர்கள் பல்வேறு கோரிக்கைகளை வலியுறுத்தி ஏற்கனவே செப்டம்பர் 11 ஆம் தேதி ஒருநாள் அடையாள வேலைநிறுத்தம் செய்திருந்தனர். மீண்டும் செப்டம்பர் 28 முதல் 30 வரை தங்களின் மூன்று நாள் தொடர் போராட்டத்தை அறிவித்துள்ளனர். கோரிக்கைகள் நிறைவேற்றப்படவில்லையெனில், அக்டோபர் 26 முதல் காலவரையற்ற வேலைநிறுத்தம் செய்யப்போவதாகவும் எச்சரித்துள்ளனர். வங்கி சேவை என்பது இன்றைய காலகட்டங்களில் தினசரி தொழிலாளர்களாக இருக்கக்கூடியவர்கள் முதல் பெருந்தொழில் நிறுவனங்கள் வரையிலும் மிக மிக இன்றியமையாததாகிவிட்டது. குறிப்பிட்ட தொகைக்கு மேல் பணமாகப் பரிவர்த்தனை செய்யக்கூடாது என்ற விதி அமலில் உள்ள சூழலில், 99.9 சதவீதப் பரிவர்த்தனைகள் வங்கிகள் மூலமாகவே நடைபெற்றாக வேண்டும். எனவே, வங்கி ஊழியர்களின் வேலைநிறுத்தங்களால், வங்கிகள் அடிக்கடி செயல்படாமல் போவதால் அனைத்துத் தரப்பு மக்களும் பெரும் சிரமங்களுக்கும், தொழில் மற்றும் சேவை வளர்ச்சிகள் முடங்கும் அபாயமும் உருவாகி வருகிறது. ஏறக்குறைய 60 ஆண்டுகளுக்கு முன்பு, எந்த நோக்கத்திற்காக தனியார் வங்கிகள் நாட்டுடைமையாக்கப்பட்டதோ, அந்த நோக்கங்கள் முறையாக நிறைவேறவில்லை. மெல்ல மெல்ல தனியார் வங்கிகள் பெருக ஆரம்பித்துவிட்டன. பல நேரங்களில் அரசு வங்கிகளைக் காட்டிலும் தனியார் வங்கிகளின் சேவை சிறப்புற இருக்கிறது என்ற நிலைகூட உருவாகிவிட்டது. எனவே, அரசு வங்கிகளின் சேவையை மேம்படுத்தி, அவை வலுப்படுத்த வேண்டிய பொறுப்பு மத்திய அரசுக்கு உண்டு. அரசின் எல்லா நிறுவனங்களையும் அந்நிய நாட்டு முதலீட்டுக்கு திறந்துவிட முடியாது; கூடாது. அது ஒரு குறிப்பிட்ட காலகட்டத்தில் மிகப்பெரிய ஆபத்தாகவும் போய்விடும். எல்லாவிதமான தரவுகளும் வங்கிகள் மூலமாக அந்நியச் சக்திகள் கபளீகரம் செய்யக்கூடிய மிகப்பெரிய ஆபத்தும் உண்டு. வங்கி ஊழியர்களின் செயல்பாட்டில் ஏற்படக்கூடிய சில குறைபாடுகளைக் களைவதற்குப் பதிலாக, அதைக் காரணம் காட்டி யார் யாருக்கோ இந்திய மக்களின் உழைப்பைச் சுரண்ட வாய்ப்பளித்துவிடக் கூடாது. அரசு வங்கி ஊழியர்களின் அனைத்துக் கோரிக்கைகளும் ஏற்புடையவையாக இல்லாமல் இருக்கலாம். ஆனால், அவர்களின் நியாயமான கோரிக்கைகளைப் புறந்தள்ள முடியாது. குறிப்பாக, பெரும்பாலான தினசரி பணிகளையே Outsourcing என்ற பெயரில் தாரைவார்ப்பது ஏற்புடையதல்ல. வங்கி ஊழியர்கள் பற்றாக்குறை என்பது மிக மிக ஏற்றுக்கொள்ளக்கூடிய வாதம். எனவே, இதுபோன்ற நியாயமான கோரிக்கைகளை அரசு தீர்த்து வைப்பதற்கு கனிவுடன் அணுக வேண்டும். பிற அரசு அலுவலகங்களை போல வாரத்தில் 5 நாள் மட்டுமே வேலை என்பது ஏற்புடைய கோரிக்கையாகத் தோன்றவில்லை. மத்திய, மாநில அரசு அலுவலகங்களை ஐந்து நாள் வேலை அறிவித்ததன் விளைவாக, பொதுமக்கள் தங்களுக்கான சேவைகளை முறையாக பெற முடியாத மோசமான நிலை இந்தியா முழுமைக்கும் உருவாகியுள்ளது. எனவே, வங்கிகள் சனிக்கிழமை இயங்க வேண்டியது கண்டிப்பாக அவசியம். இந்த ஒரு கோரிக்கையை விட்டுவிட்டு, வங்கி ஊழியர்களின் எண்ணிக்கையை அதிகரிப்பது, வங்கிப் பணிகளை Outsourcing முறைக்குத் தாரைவார்ப்பதைத் தடுப்பது, வங்கிகளில் 20 சதவிகித நேரடி அந்நிய முதலீட்டை கைவிடுவது போன்ற முக்கியமான கோரிக்கைகளைப் பரிசீலித்து அதற்குத் தீர்வு காண வேண்டியது மிக மிக அவசியம். வங்கி ஊழியர்களின் தொடர் போராட்டம் மற்றும் முடக்கத்தால், வளர்ந்து வரும் இந்தியாவின் பொருளாதார வேகம் குறைந்துபோக அல்லது பின்னோக்கிப் போவதற்கு உண்டான வாய்ப்பு உண்டு. எனவே, மாண்புமிகு மத்திய நிதித்துறை அமைச்சர் நிர்மலா சீதாராமன் அவர்கள் நேரடியாக தலையிட்டு, உடனடியாக அனைத்து வங்கி ஊழியர் சம்மேளனங்களை அழைத்து பேச்சுவார்த்தை நடத்தி, இனிமேல் வங்கி ஊழியர்களின் போராட்டம் நடைபெறாத வண்ணம் தகுந்த நடவடிக்கை எடுக்க வலியுறுத்துகிறேன். டாக்டர் க. கிருஷ்ணசாமி MD, Ex. MLA, நிறுவனர் & தலைவர், புதிய தமிழகம் கட்சி 26.09.2026 @nsitharamanoffc @PMOIndia

சமூக நீதி விடுதிகளில் மாட்டுக்கறி! வன்னியரசை கண்டித்து செப்டம்பர் 30 - புதிய தமிழகம் கட்சி போராட்டம்.! பத்திரிக்கை செய்திகள்!

அமைச்சர்கள் ’கறி’ அரசியல் பேசுவதை விட்டுவிட்டு, பள்ளி - கல்லூரி மாணவர்களுக்கு பாதுகாப்பான உணவை வழங்குவதில் கவனம் செலுத்துவார்களா? ............................................ திருவள்ளூர் அருகே உள்ள கொட்டையூர் ஊராட்சி ஒன்றிய நடுநிலைப் பள்ளியில் வழங்கப்பட்ட காலை உணவில் பல்லி விழுந்திருந்ததாகவும், அந்த உணவைச் சாப்பிட்ட சுமார் 30-க்கும் மேற்பட்ட மாணவ, மாணவிகள் உடல்நலக்குறைவு ஏற்பட்டு அரசு மருத்துவமனையில் அனுமதிக்கப்பட்டுள்ளதாகவும் வெளியாகியுள்ள செய்தி மிகுந்த அதிர்ச்சியளிக்கிறது. பள்ளி, கல்லூரிகளில் மாணவர்களுக்கு உணவு தயாரிக்கும் சமையல் கூடங்கள் தூய்மையற்றதாகவும், பாதுகாப்பற்றவையாகவும் இருப்பதும், பணியாளர்களின் கவனக் குறைவுமே இதுபோன்ற நிகழ்வுகளுக்கு முக்கிய காரணியாகும். பள்ளிக் குழந்தைகளுக்கு வழங்கப்படும் காலை உணவைக் கூட சுகாதாரமான முறையில் வழங்க முடியாத சூழல் இங்கு நிலவி வருகிறது. ஆனால், கள எதார்த்தம் இவ்வாறு இருக்கையில், விடுதிகளில் மாட்டிறைச்சி, பன்றியிறைச்சி தருவோம் என்றெல்லாம் அமைச்சர்கள் வாய்க்கு வந்ததையெல்லாம் பேசி வெற்று வார்த்தை அரசியல் செய்து வருகிறார்கள். எனவே, தமிழகம் முழுவதும் உள்ள அனைத்துப் பள்ளி மற்றும் கல்லூரி, விடுதிகள், சமையற்கூடங்களை தூய்மையாகவும் சுகாதாரமாகவும் பாதுகாப்பாகவும் வைத்திருப்பதில் அமைச்சர்கள் முழுக்கவனம் செலுத்திட வேண்டும் என வலியுறுத்துகிறேன். மேலும், கொட்டையூர் ஊராட்சி ஒன்றிய நடுநிலைப் பள்ளி நிகழ்வை போன்று இனி எந்தவொரு சம்பவமும் நடக்காத வண்ணம் பள்ளி மற்றும் கல்லூரி விடுதிகளில் மாணவர்களுக்கு உணவு பரிமாறுவதற்கு குறைந்தபட்சம் 30 நிமிடங்களுக்கு முன்பாக, அங்குள்ள ஆசிரியர்கள் அல்லது பணியாளர்கள் அந்த உணவைச் சுவைத்துப் பார்த்து, சோதனை செய்யப்பட்ட பிறகே மாணவர்களுக்கு வழங்கப்படுவதை உறுதிசெய்யும் வகையில், வாட்ஸ்அப் (WhatsApp) குழுக்கள் மூலம் கண்காணிக்க பள்ளி, கல்லூரி துறைகள் உரிய நடவடிக்கை எடுக்க வேண்டும் என வலியுறுத்துகிறேன். டாக்டர் க. கிருஷ்ணசாமி MD, Ex. MLA, நிறுவனர் & தலைவர், புதிய தமிழகம் கட்சி 24.09.2026

மதுரை கூடல் நகர் மாணவன் தமிழ்ச்செல்வன் சந்தேக மரணம்! மரணத்திற்கான உண்மை காரணம் வெளிக்கொணரப்பட வேண்டும்! .................................... மதுரை கூடல் நகர் பகுதியைச் சேர்ந்த 11ஆம் வகுப்பு பயின்று வரும் ஊராளிக் கவுண்டர் சமூகத்தைச் சார்ந்த தமிழ்ச்செல்வன் என்ற மாணவன், கடந்த 6 ஆம் தேதி காலையில் விளையாடச் சென்று, இரவு வரை வீடு வந்து சேரவில்லை. அவரது தாயார் அளித்த புகாரின் பேரில் தேடியதில், அங்குள்ள நீர்நிலையில் பிணமாக மிதப்பது கண்டுபிடிக்கப்பட்டுள்ளது. இம்மாணவனுக்கும் வேறொரு சமுதாய மாணவிக்குமிடையே காதல் இருந்ததாகவும், மாணவியின் பெற்றோர் அம்மாணவனை பலமுறை எச்சரித்ததாகவும் சொல்லப்படுகிறது. மேலும், அன்றைய தினம் மாணவன் சிலருடன் மீன்பிடிக்கச் சென்றதாகவும் தகவல்கள் தெரிவிக்கின்றன. மாணவனின் உடலில் பல இடங்களில் காயங்கள் இருந்திருக்கின்றன. இந்த மரணம் பல சந்தேகங்களை எழுப்புகிறது. மாணவனின் மரணத்திற்கு உண்மையான காரணம் என்ன என்பதை வெளிக்கொண்டுவரவும், அது கொலையாக இருக்கும் பட்சத்தில் குற்றவாளிகள் மீது கடும் நடவடிக்கை எடுக்கவும் வலியுறுத்துகிறேன். - டாக்டர் க.கிருஷ்ணசாமி MD, Ex.MLA, - நிறுவனர் & தலைவர், - புதிய தமிழகம் கட்சி, - 09.09.2026

மதுரை மீனாட்சி அம்மன் கோவில் கும்பாபிஷேகம்! பார்வையாளர்களுக்கு சிறப்பு அனுமதி – அரசியல் தலையீடு இருக்கக் கூடாது.! ..................................................... பிரசித்திப் பெற்ற மதுரை மீனாட்சி அம்மன் கோவில் கும்பாபிஷேகம் 17 வருடங்கள் கழித்து, வரும் செப்டம்பர் மாதம் 17 ஆம் தேதி சிறப்பாக நடைபெற உள்ளது. இச்சிறப்பு நிகழ்ச்சியில் மேல்மாடத்திற்குச் சென்று பங்கேற்க பலரும் ஆர்வம் செலுத்துவர். இந்நிகழ்ச்சிக்காக ஏறக்குறைய 9,000 சிறப்பு அனுமதிச் சீட்டுகள் அச்சடிக்கப்பட்டும் ஆளுங்கட்சி அரசியல் தலையீடு காரணமாக வழங்கப்படாமல் இருப்பதாக தெரிகிறது. பொதுவாக மீனாட்சி அம்மன் கோவிலின் உபயதாரர்கள், சுற்றுவட்டாரப் பகுதியிலிருக்கக்கூடிய நாடாளுமன்ற, சட்டமன்ற உறுப்பினர்கள், நீதியரசர்கள், அனைத்து சமுதாயத் தலைவர்கள் - பிரமுகர்கள் என பலரும் சிறப்பு அழைப்பாளர்களாக அழைக்கப்படுவது உண்டு. ஆனால், மதுரை மீனாட்சி அம்மன் கோவில் கும்பாபிஷேக நிகழ்ச்சிக்கு இன்னும் 8 தினங்களே உள்ள நிலையில் அச்சடிக்கப்பட்ட 9,000 சிறப்பு அழைப்புகள் இன்னும் வழங்கப்படாதது ஆன்மீகப் பெரியோர்கள், பக்தர்கள், முக்கியஸ்தர்கள் மத்தியில் பெரும் அதிருப்தியை உருவாக்கி உள்ளது. எனவே, எந்தவிதமான பாகுபாடுகளுக்கும் இடமின்றி, அச்சடிக்கப்பட்ட 9,000 சிறப்பு அழைப்புகளும் எந்த ஒரு குறிப்பிட்ட அரசியல் கட்சி அல்லது குழுவிடம் சிக்கிவிடாத வண்ணம், இந்து சமுதாய அனைத்து முக்கிய பிரதிநிதிகளும் பங்கேற்கக்கூடிய வகையில், இந்து அறநிலையத் துறை வெளிப்படையாகவும் நேர்மையாகவும் அழைப்புகளை விநியோகம் செய்ய வேண்டும். இதுபோன்ற நிகழ்ச்சியில் எந்தவிதமான குறை குற்றங்களுக்கும் இடமில்லாத வகையில், அறங்காவலர் குழு, அறநிலையத்துறை அதிகாரிகள் என அனைவரும் ஒருங்கிணைந்து இதை ஒரு ஆன்மீக நிகழ்ச்சியாக நடத்த வேண்டுமே தவிர, இதை ஒரு அரசியல் நிகழ்ச்சியாக மாற்றக் கூடாது. அரசியல் காழ்ப்புணர்ச்சியுடன் யாரையும் ஒதுக்கி வைக்கவோ, புறந்தள்ளவோக் கூடாது. பாரபட்சமற்ற வகையில் மதுரை மீனாட்சி அம்மன் கோவில் கும்பாபிஷேக நிகழ்ச்சி சிறப்பு அழைப்புக்கான அழைப்புகளை உடனடியாக வழங்கிட வலியுறுத்துகிறேன். - டாக்டர் க.கிருஷ்ணசாமி MD, Ex.MLA, - நிறுவனர் & தலைவர், - புதிய தமிழகம் கட்சி, - 09.09.2026

காவல்துறை மானியக் கோரிக்கைக்கு முதல்வர் விஜய் நாளை பதிலளிக்க வேண்டிய தருணத்தில், சென்னை அடையாறு தவெக உறுப்பினர் படுகொலை - நல்ல அறிகுறி அல்ல.! நாளை பதிலுரையில் பொறுப்பை உணர்ந்து செயலாற்றுவாரா அல்லது எதிர்க்கட்சிகளைக் கிண்டலடிப்பதற்கும், கேலி செய்வதற்கும், ரீல்ஸ் மற்றும் பஞ்ச் டயலாக்குகளுக்கு மட்டுமே பயன்படுத்துவாரா? ................................................................ விஜய் அவர்கள் ஆட்சிக்கு வந்துள்ள 4 மாதத்தில், அதிகரித்து வரும் பாலியல் வன்கொடுமைகள், ஏடிஎம்களையும் உடைத்துக் கொள்ளையடிக்கப்படும் சூழல், தமிழ்நாடு எங்கும் பல்வேறு மாவட்டங்களில் நடந்தேறிய கொலைகள் என ஒட்டுமொத்தத்தில் சட்டம் ஒழுங்கு சீர்குலைந்து கிடக்கிறது என்ற குற்றச்சாட்டு எழுந்துள்ள நிலையில், காவல்துறைக்குப் பொறுப்பேற்றிருக்கக்கூடிய தமிழ்நாடு முதலமைச்சர், சட்டமன்றத்தில் காவல்துறை மானியத்தின் மீது நாளை பதிலுரை கொடுக்க வேண்டிய இந்த தருணத்தில், இன்று சென்னையில் அடையாற்றில் அவரின் தவெக கட்சியைச் சார்ந்த ஒருவர் கொலை செய்யப்பட்டிருப்பது, சட்டம் - ஒழுங்கு குறித்து அனைத்துத் தரப்பினராலும் ஏற்கனவே வைக்கப்பட்டிருக்கக்கூடிய குற்றச்சாட்டுக்கு வலு சேர்க்கக் கூடியதாக இருக்கிறது. பேசாமல் இருப்பது அவருடைய சுபாவமா அல்லது அரசியல் உக்தியா என்று தெரியாது. அது அவருடைய கடந்த கால சினிமா வாழ்க்கைக்கும் தனி வாழ்க்கைக்கும் பொருத்தமாகக்கூட இருந்திருக்கலாம். ஆனால், இந்தியாவிலேயே வலிமை வாய்ந்த தமிழக காவல்துறைக்குப் பொறுப்பேற்றிருக்கக்கூடிய முதலமைச்சர் தொடர்ந்து மௌனம் காப்பதும், அரசு நிர்வாகத்தோடு நெருங்கிய தொடர்பில் இல்லாததும், வெறும் அரசியல் வியூகவாதிகளை மட்டும் வைத்து ஆட்சி செய்ய நினைப்பது தமிழ்நாட்டின் ஒட்டுமொத்த அமைதிக்கே குந்தகம் ஏற்பட்டு விடுமோ என்று அஞ்ச வேண்டி இருக்கிறது. பிற துறைகளில் ஏதாவது சுணக்கம் ஏற்பட்டால்கூட அதனால் மக்களுக்கு உடனடியாக எந்தப் பாதிப்பும் வந்துவிடாது; வரக்கூடிய சூழல் வந்தால்கூட தடுத்து நிறுத்த முடியும். ஆனால், சட்டம் ஒழுங்கு என்பது வெறும் வார்த்தையல்ல. தமிழ்நாட்டில் வாழ்கின்ற எட்டுக்கோடி மக்களுடைய வாழ்வு சம்பந்தப்பட்ட விஷயம். காவல்துறையை தனது கையில் வைத்திருக்கக்கூடிய முதல்வர், 24 மணி நேரமும் அதன் மீது தனது முழுப் பார்வையும் செலுத்தினால்தான், அத்துறை செம்மையாகச் செயல்பட முடியும். கடந்த காலங்களைக் காட்டிலும் அண்மைக்காலமாக நகர்ப்புறங்களிலேயே எந்தவிதமான அச்சமும் இன்றி வன்முறைச் சம்பவங்களும் கொலை, கொள்ளைச் சம்பவங்களும் அதிகரித்து வருவது ஏதோ ஒரு மிகப்பெரிய ஆபத்தின் அறிகுறியாகத் தோன்றுகிறது. எனவே, விஜய் அவர்கள் தனக்கு கிடைத்திருக்கக்கூடிய இந்தப் பொறுப்பை உணர்ந்து, செம்மையாகச் செயலாற்றுவாரா? நாளை காவல்துறை மானியத்திலும் எதிர்கட்சிகளை கிண்டலடிப்பதற்கும், கேலி செய்வதற்கும், ரீல்க்காக ’பஞ்ச்’ டயலாக்கிற்கும் மட்டும் பயன்படுத்துவாரா அல்லது சட்ட ஒழுங்கை பாதுகாக்க ஆக்கப்பூர்வமான கருத்துக்களை முன்வைப்பரா என பொறுத்திருந்து பார்ப்போம்! - டாக்டர் க.கிருஷ்ணசாமி MD, Ex.MLA, நிறுவனர் & தலைவர், புதிய தமிழகம் கட்சி, 06.09.2026

விஜய் அரசே, டாஸ்மாக்கை விட்டொழியுங்கள்! கூழுக்கும் ஆசை, மீசைக்கும் ஆசை வேண்டாம்! ............................... "ஆட்சிக்கு வந்தவுடன் விஜய் அண்ணா எல்லா டாஸ்மாக் கடைகளையும் மூடிவிடுவார்" என்று வாக்குறுதி அளித்து ஆட்சிக்கு வந்தவர்கள், தற்போது அதற்கு நேர்மாறாக மாற்றிப் பேச ஆரம்பித்துவிட்டனர். ஒரு நல்ல காரியம் நடக்க வேண்டுமென்றால் சிலவற்றை இழந்தாகத்தான் வேண்டும். அரசுக்கு வரும் ரூபாய் 55,000 கோடி வருமானத்தை இழக்க மனமும் இல்லாமல், டாஸ்மாக் கடைகளை இழுத்து மூடத் துணிவும் இல்லாமல் திண்டாடுகிறார்கள். டாஸ்மாக் உற்பத்தி முதல் காலி பாட்டில் விற்பனை வரை எங்கும் ஊழல், எதிலும் ஊழல்! ஊழியர்களின் சம்பளத்தை உயர்த்தினாலும் கடை வாடகை, மின்கட்டணம், துப்புரவுப் பணி உள்ளிட்ட பல்வேறு அடிப்படைப் பிரச்சனைகள் தீர்க்கப்படாமல் சில்லறை பிரச்சினைகளுக்காக ஊழியர்களை சஸ்பெண்ட் செய்வது தீர்வாகாது. டாஸ்மாக் உடலுக்கும், வீட்டுக்கும், நாட்டுக்கும் கேடு விளைவிப்பது மட்டுமல்லாமல், ஊழலின் ஊற்றுக்கண்ணாகவும் விளங்குகிறது. விஜய் அவர்களே, டாஸ்மாக்கை முற்றாக விட்டொழிப்பதே சரியான தீர்வாகும். கூழுக்கும் மீசைக்கும் ஒரே நேரத்தில் ஆசை கொள்ளாதீர்கள்! - டாக்டர் க.கிருஷ்ணசாமி MD, Ex.MLA, நிறுவனர் & தலைவர், புதிய தமிழகம் கட்சி, 05.09.2026

பிரதமர் வேட்பாளராக விஜய்யை முன்னிறுத்தி வேகமெடுக்கும் பரப்புரைகள்.! பாகிஸ்தானின் தளமானது எப்படி? சமூக வலைதளங்கள் இந்தியாவிற்கு எதிரான ’நவீன ஏவுகணைகளா’? உஷார் ஆகுமா இந்திய உளவுத்துறை?? ....................................... எந்தவொரு கட்சிக் கட்டமைப்புகளுமின்றி, சமூக வலைதளப் பிரச்சாரத்தின் வாயிலாக மட்டுமே தமிழக வெற்றிக் கழகத்தை ஆட்சிக்குக் கொண்டுவந்த சக்திகள், தற்போது விஜய் அவர்களை இந்தியப் பிரதமர் வேட்பாளராக முன்னிறுத்தித் தீவிரப் பிரச்சாரம் செய்துவருவது பல கேள்விகளை எழுப்புகிறது. ஆட்சிக்கு வந்து மூன்று மாதங்கள் ஆகியும், தாங்கள் அளித்த வாக்குறுதிகளைக் காப்பாற்ற முடியாமல் தத்தளிக்கும் தவெக, அனைத்து வாக்குறுதிகளையும் நிறைவேற்றி சாதித்து விட்டதைப் போல, இந்தியா முழுவதும் பல கோடிகளைச் செலவழித்துப் பிரச்சாரங்கள் செய்யப்படுகின்றன. அடுத்த பிரதமர் வேட்பாளர்களாக மோடி மற்றும் ராகுல் ஆகியோருடன் விஜய் அவர்களையும் முன்னிறுத்தி, பாகிஸ்தானைத் தளமாகக் கொண்டு இயங்கும் எண்ணற்ற சமூக வலைதளப் பக்கங்கள் கடந்த சில நாட்களாகச் செயல்பட்டு வருகின்றன. மதம், அரசியல், மொழி சார்ந்து சுயமாகச் செயல்பட்டு வந்த முகநூல் (Facebook), இன்ஸ்டாகிராம் (Instagram), எக்ஸ் (X) உள்ளிட்ட சமூக வலைதளக் பக்கங்கள் சில நாட்களில் எவ்வாறு விஜய் ’புகழ் பாடிகளாக’ மாறின? அந்தச் சமூக வலைதளப் பக்கங்களுக்குக் கோடி கோடியாகக் கொட்டிக் கொடுத்தவர்கள் யார்? மேலும், விஜய் புகழ் பாடும் சமூக வலைதளக் கணக்குகள் அனைத்தும் பாகிஸ்தானில் இருந்து செயல்படும் ஒரு வாட்ஸ்அப் (WhatsApp) எண்ணை மட்டுமே மூலமாகக் கொண்டு செயல்படுவது எப்படி? பாகிஸ்தானிலிலிருந்து இயங்கும் சமூக வலைதள கணக்குகளுக்கு விஜய் மீது இவ்வளவு அக்கறை ஏன்? சட்டமன்றத் தேர்தலில் விஜய்யை முன்னிறுத்திய ரூட் மாஃபியா மற்றும் லாட்டரி குடும்பத்திற்கும், தற்போது நடைபெறும் பரப்புரைகளுக்கும் என்னென்ன தொடர்பு? இதுவரை இந்தியாவை ஆயுதங்களால் வெல்ல முடியாது என்று எண்ணிய அந்நிய நாட்டு மதவாத சக்திகள், இந்தியாவை கைப்பற்ற மேற்கொள்ளும் முயற்சியா இது? இவ்வளவு விஷயங்கள் பரபரப்பாக நடந்து கொண்டிருக்கும் சூழலிலும், இந்தியாவின் IB, RAW உள்ளிட்ட உளவுத்துறை அமைப்புகள் அமைதி காப்பது ஏன்? சமூக வலைதளங்கள் இந்தியாவிற்கு எதிரான நவீன ஏவுகணைகளாகின்றனவா? இந்திய அரசு உடனடியாக விழித்துக் கொள்ளுமா? டாக்டர் க. கிருஷ்ணசாமி MD, Ex.MLA, நிறுவனர் & தலைவர், புதிய தமிழகம் கட்சி, 31.08.2026

பணியிலிருக்கும் ஆசிரியர்களுக்கு TET தேர்விலிருந்து விலக்களிக்க சட்டத் திருத்தம் வலியுறுத்தி, அமைச்சர் ராஜ்மோகனால் கொண்டுவரப்பட்ட அரசினர் தனித் தீர்மானம் பலனளிக்குமா? ................................................. கட்டாயக் கல்வி உரிமைச் சட்டம் 2009-ன் படி, இந்தியா முழுமைக்கும் ஆசிரியர்கள் TET தேர்வில் தேர்ச்சி பெற்றிருக்க வேண்டும் என்ற நிபந்தனையை மத்திய அரசும் கொண்டு வந்தது; உச்சநீதிமன்றமும் உறுதி செய்துள்ளது. இதன் அடிப்படையில் நடைபெற்ற TET தேர்வில் 60 ஆயிரத்துக்கும் மேற்பட்ட ஆசிரியர்களால் ’தமிழ்’ பாடத்திலேயே வெற்றி பெற முடியவில்லை. பிற பாடங்களில் தேர்ச்சி பெறாதவர்களுடைய ஒட்டுமொத்த சதவீதம் 95; அதாவது 5 சதவீதம் பேர் மட்டுமே TET (Paper 1 & Paper 2) தேர்வில் முழுமையாக வெற்றி பெற்றார்கள் என்றும், குறிப்பாக, 2010-க்கு முன்பு ஆசிரியர்களாக நியமிக்கப்பட்டவர்களால் இந்த TET தேர்வில் பெருமளவில் வெற்றி பெற முடியவில்லை எனவும் தகவல்கள் தெரிவிக்கின்றன. தமிழ்நாட்டில் அரசாங்கத்தினுடைய நேரடி பள்ளிகள் மற்றும் அரசு உதவி பெறும் பள்ளிகளில் 10-ஆம் வகுப்பு வரையிலும் பயிற்றுவிக்கக்கூடிய ஆசிரியர்களுடைய எண்ணிக்கை மட்டும் 3 லட்சத்து 28 ஆயிரம் ஆகும். அவர்களுக்கு இந்த ஆண்டு ஜூலை மாதம் 4, 5 ஆகிய தேதிகளில் மீண்டும் TET தேர்வு நடைபெற்றுள்ளது. ”2010-க்கு முன்பு ஆசிரியர்களாக நியமிக்கப்பட்டவர்களுக்கு TET தேர்விலிருந்து விலக்களிக்கும் வகையில் மத்திய அரசு சட்டத்திருத்தம் கொண்டு வர வேண்டும்” என வலியுறுத்தி—நேற்றைய தினம் (25.08.2026) சட்டமன்றத்தில் அரசினர் தீர்மானம் ஒன்றை பள்ளிக் கல்வித் துறை அமைச்சர் ராஜ்மோகன் அவர்கள் முன்மொழிந்துள்ளார். இதை எப்படி மத்திய அரசு ஏற்றுக்கொள்ளும் அல்லது உச்சநீதிமன்றம் ஏற்றுக்கொள்ளும் எனத் தெரியவில்லை. இதை ஆசிரியர்களை சமாதானப்படுத்துவதற்கான ராஜ்மோகனின் ஒரு முயற்சியாகத்தான் கருத வேண்டுமே தவிர, இத்தீர்மானத்தின் மூலம் ஆசிரியர்களுக்கு விதிவிலக்கு கிடைக்குமா என்பது மிகப்பெரிய கேள்விக்குறியே.! விலக்கு கேட்டு மத்திய அரசு மற்றும் உச்சநீதிமன்றங்களின் படிக்கட்டுகளில் ஏறிக் கொண்டிருப்பதற்கு பதிலாக, 6 மாதம் முதல் ஒரு வருடம் வரையாவது ஆசிரியர்களுக்கு தீவிரப் பயிற்சியளித்து TET தேர்வில் வெற்றி பெற வைப்பதன் மூலம் ஆசிரியர்களின் தரமும் உயரும்; அரசுப் பள்ளிகளில் கல்வியின் தரமும் மிளிரும். ஆசிரியர்களும் TET தேர்வில் வெற்றி பெற முடியவில்லையே என்ற கவலையோடும், யாருடைய கருணையை எதிர்பார்த்தும் பயணிக்க வேண்டிய அவசியமும் இருக்காது. எனவே, ஆசிரியர்களை தகுதிமிக்கவர்களாக மாற்றுவதை விட்டுவிட்டு, இதுபோன்று எடுக்கப்படும் நடவடிக்கைகள் அரசியல் ரீதியாக மட்டுமே பார்க்கப்படும். தமிழக அரசின் இந்த முயற்சி ”எலியைப் பிடிக்க மலையைக் குடைவதற்குச் சமமாகவே” கருதப்படும். ஆசிரியர் தகுதித் தேர்வில் (TET) 150-க்கு 90 மதிப்பெண்கள் (60%) பெற வேண்டும் என்ற விதியை தளர்த்தியதற்கு எதிரான வழக்குகளை வாபாஸ் பெற வைத்து, பணிபுரியும் ஆசிரியர்களிடத்தில் ஒருமித்தக் கருத்தை உருவாக்கி, அனைவரையும் தேர்ச்சி பெற வைக்க வேண்டியது அமைச்சர் ராஜ்மோகன் அவர்களின் தலையாய முயற்சியாக இருக்கட்டும்; இதுபோன்று கடந்த காலங்களில் பல தேர்வுகளுக்கு விலக்குக் கேட்டு நிறைவேற்றப்பட்ட தனித்தீர்மானங்கள் பலனளிக்கவில்லை; இனியும் பலனளிக்குமா என்பதும் கேள்விக்குறியே! டாக்டர் க. கிருஷ்ணசாமி MD, Ex.MLA, நிறுவனர் & தலைவர், புதிய தமிழகம் கட்சி. 27.08.2026

’பரந்தூர்’ பசுமை விமான நிலைய திட்டம் இரத்து! வெறும் அரசியல் காரணங்களுக்காக ₹27,500 கோடி திட்டத்தை கைவிடுவதா? ....................................................... தமிழகத்தில் சென்னை விமான நிலையம் அருகே புதிதாக பசுமை விமான நிலையம் அமைக்க ’பரந்தூர்’ என்ற இடம் தேர்வு செய்யப்பட்டு, அதற்காக ₹27,500 கோடி நிதியும் மத்திய அரசால் ஒதுக்கப்பட்டுவிட்டது. ஸ்ரீபெரும்புதூர் அருகே உள்ள பரந்தூர் மற்றும் ஏகனாபுரம் உள்ளிட்ட 13 கிராமங்களில் ஏறக்குறைய 5,846 ஏக்கர் நிலம் ஆர்ஜிதம் செய்யத் திட்டமிடப்பட்டு, இதுவரை 1,802 ஏக்கர் நிலம் விலை கொடுத்து வாங்கப்பட்டுள்ளது. எனினும், மிக முக்கியமான அந்த பகுதியில் உள்ள ஏகனாபுரம் மற்றும் பரந்தூர் கிராம மக்கள் கடந்த இரண்டு வருடங்களுக்கும் மேலாகப் போராடி வருகிறார்கள். ஒரு தொழில்—சிட்கோ (SIDCO), சிப்காட் (SIPCOT) அல்லது இதுபோன்ற விமான நிலையங்கள் அமைப்பதற்குப் பொதுவாக ஆயிரக்கணக்கான ஏக்கர் நிலங்களே தேவைப்படுகின்றன. அந்த இடங்களைத் தேர்வு செய்கின்ற பொழுது பெருநகரங்களிலிருந்து இணைப்பு, எதிர்கால வளர்ச்சி, துறைமுகங்கள் மற்றும் பிற போக்குவரத்துகள் உள்ளிட்ட பல்வேறு அம்சங்களைக் கணக்கில்கொண்டே இடங்கள் தேர்வு செய்யப்படுகின்றன. அவ்வாறு தேர்வு செய்யப்படுகின்ற பொழுது, நிலங்களுக்கு கூடுதல் விலை மற்றும் நிலத்தின் மீதான தீராத பற்று ஆகியவற்றின் காரணமாக, அந்தப் பகுதி மக்கள் நில ஆர்ஜிதங்களுக்கு எதிராகக் குரல் கொடுப்பது என்பது நாடெங்கும் இருக்கக்கூடிய பிரச்சனை. இப்போது விமானப் பயணம் என்பது சர்வசாதாரணமாக அனைத்துத் தரப்பினராலும் பயன்படுத்தக்கூடிய போக்குவரத்தாக மாறியுள்ளது. வரக்கூடிய காலகட்டங்களில் 90% பேர் விமானப் போக்குவரத்தைப் பயன்படுத்தக்கூடிய சூழல் ஏற்படும். பசுமை விமான நிலையம் என்பது பல்வேறு நவீன வசதிகளை உள்ளடக்கியது. வெறும் உள்நாட்டுப் பயணிகள் மட்டும் பிரயாணம் செய்யக்கூடியது அல்ல; பிற சர்வதேச நாடுகளுக்கும் பயணிக்கும் கேந்திரமாக இந்த விமான நிலையம் அமையும். அதுமட்டுமின்றி, இந்தியாவில் உற்பத்தியாகக்கூடிய பல்வேறு விதமான மின் உபகரணங்கள் மற்றும் பிற பொருட்கள் வெளிநாடுகளுக்கு ஏற்றுமதி செய்வதற்கும் இதுபோன்ற பெரிய விமான நிலையங்கள் முக்கியமான இடத்தைப் பெறும். அந்த நோக்கத்தோடு அமையப்பெற்ற பரந்தூர் பசுமை விமான நிலையத் திட்டத்தை ரத்து செய்து முதலமைச்சட் விஜய் அவர்கள் அறிவித்திருக்கிறார். அவர் ஆட்சிக்கு வருவதற்கு முன்பு, அந்த மக்களைச் சந்தித்து வாக்குறுதி கொடுத்தார் என்பது வேறு விஷயம். ஆனால், தமிழ்நாட்டினுடைய முதலமைச்சராக அமர்ந்த பிறகு, ஏற்கனவே அந்த திட்டத்திற்கான நில ஆர்ஜிதம் 75% முடிந்த பிறகு அதை ரத்து செய்வது, ஒட்டுமொத்தமாகத் தமிழ்நாட்டுக்கு வரவேண்டிய ஒரு மிகப்பெரிய திட்டத்தை நழுவ விடுவது ஆகாதா? இந்திய விமான நிலைய ஆணையம் (Airports Authority of India - AAI) ஏற்றுக்கொள்ளக்கூடிய அளவில் மாற்று இடம் தேர்வு செய்யப்பட்டப் பிறகு, இந்த இடம் ரத்து செய்யப்பட்டு இருந்தாலும் கூட பரவாயில்லை. ஆனால், மாற்று இடம் கூட தேர்வு செய்யப்படாத நிலையில் இத்திட்டம் ரத்து செய்யப்பட்டது துளியும் ஏற்புடையது அல்ல. அண்டை மாநிலங்களான ஆந்திரா, தெலங்கானா, கர்நாடக அரசுகள் தமிழகத்தினுடைய எல்லையிலேயே போட்டி போட்டுக்கொண்டு புதிய புதிய விமான நிலையங்களைக் கட்டி வருகின்றன. இந்த ஒரு தருணத்தில் இவ்வளவு பெரிய தொகையில் கட்டக்கூடிய விமான நிலையத் திட்டத்தை வலிந்து விட்டுக்கொடுப்பது, சர்வதேசத் தொழில் முதலீடுகளுக்கும் வளர்ச்சியை நோக்கிக் கொண்டு பயணிப்பவர்களுக்குமான தவறான சமிக்ஞையாக அமைந்துவிடாதா? இதுபோன்ற விமான நிலையங்கள் இப்போது தொடங்கினாலே பயன்பாட்டுக்கு வருவதற்கு குறைந்தது 10 வருடங்கள் ஆகும். பரந்தூரை ரத்து செய்துவிட்டு, இன்று இருக்கக்கூடிய சென்னை விமான நிலையம் அருகிலேயே எப்படி 5,000 ஏக்கர் நிலத்தை—அதுவும் நீர்நிலைகள் இல்லாத, விவசாயம் செய்ய முடியாத தரிசு நிலங்களைத் தேடிக் கண்டுபிடிக்க முடியும்? ஒருவேளை இதே பரந்தூர், ஏகனாபுரத்தை முன்னுதாரணமாகக் கொண்டு அங்கும் விவசாயிகள் போராட்டம் நடைபெற்றால், அப்போது எந்தத் திட்டத்தைக் கொண்டுவர முடியும்? தமிழ்நாட்டுக்கு வரவேண்டிய கனவுத் திட்டமான ₹27,000 கோடி பசுமை விமான நிலையத் திட்டம் வெறும் கனவாகவே போய்விடாதா? இதுபோன்ற ஒரு முக்கியமான முடிவை எடுப்பதற்கு முன்பாவது அனைத்துக் கட்சியினர், அனைத்துத் தரப்பினரையும் அழைத்து பேசி ஒரு சரியான முடிவை எடுத்திருக்கலாமே? "நான் வாக்குறுதி கொடுத்துவிட்டேன்; அதைக் காப்பாற்றுவேன்" என்பதற்காகத் தமிழ்நாடு முதலமைச்சர் விஜய் அவர்கள் ”பரந்தூர் பசுமை விமான நிலையத் திட்டத்தை ரத்து செய்தது” நியாயமாக தென்படவில்லை. மறுபரிசீலனை செய்வாரா? என பொறுத்திருந்து பார்ப்போம்.

நாளை (24-ஆம் தேதி) மீண்டும் தொடரும் சட்டமன்றக் கூட்டத்தொடரில், தென்னிந்திய முதலமைச்சர்கள் மாநாடு விவாதம் குறித்து தமிழக முதல்வர் விரிவான விளக்க அறிக்கை வெளியிட சட்டமன்றத்தில் வலுவாக எழுப்ப வலியுறுத்தி புதிய தமிழகம் கட்சி தலைவர் டாக்டர் க. கிருஷ்ணசாமி அவர்கள் எதிர் கட்சித் தலைவர் மற்றும் அனைத்திந்திய அண்ணா திராவிட முன்னேற்றக் கழகம், பாட்டாளி மக்கள் கட்சி, தேசிய முற்போக்குத் திராவிடக் கழகம், இந்திய கம்யூனிஸ்ட் கட்சி, இந்திய கம்யூனிஸ்ட் கட்சி (மார்க்சிஸ்ட்), இந்திய யுனியன் முஸ்லீம் லீக், பாரதிய ஜனதா கட்சி, அம்மா மக்கள் முன்னேற்றக் கழகம் உள்ளிட்ட சட்டமன்ற கட்சி குழு தலைவர்களுக்கு எழுதியுள்ள கடிதத்தின் சாராம்சம்: ........................................................ பொருள் : தென்னிந்திய முதலமைச்சர்கள் மாநாட்டில் தமிழக முதலமைச்சர் விவாதித்த விபரங்கள் குறித்து சட்டமன்றத்தில் விரிவான அறிக்கை சமர்பிக்க வலியுறுத்தல் - சார்பு ..................................................... அன்புடையீர் வணக்கம்! கடந்த 20.08.2026 அன்று, மாமல்லபுரம் அருகே உள்ள கோவளத்தில் மத்திய உள்துறை அமைச்சர் அமித்ஷா அவர்கள் தலைமையில் 31 வது தென்னிந்திய முதலமைச்சர்கள் மாநாடு நடைபெற்றது. இக்கூட்டம் குறித்த முன்னறிவிப்பு ஏதும் ஊடகங்களுக்கு முறையாக தெரிவிக்கப்படவில்லை. தமிழகத்தைப் பொறுத்தவரை காவிரி நதிநீர்ப் பிரச்சினை மிகத் தீவிரமாக உள்ள சூழலில் நடைபெற்ற இம்மாநாட்டில் தமிழ்நாடு முதலமைச்சர் சி. ஜோசப் விஜய் அவர்கள் துணைத் தலைவராகப் பங்கேற்றார்; கர்நாடகா, கேரளா, ஆந்திரா, தெலுங்கானா, பாண்டிச்சேரி உள்ளிட்ட தென் மாநிலங்களின் முதலமைச்சர்களும் இதில் கலந்துகொண்டனர். இம்மாநாட்டில் தமிழகத்திற்கு உரிய காவிரி நதி நீர் பங்கீடு முறையாக வழங்கப்படாதது மற்றும் கர்நாடக அரசு மேகதாது அணை கட்ட மேற்கொள்ளும் முயற்சிகள், முல்லைப் பெரியாறு அணையின் நீர்மட்டத்தை 152 அடியாக உயர்த்த கேரள அரசு அனுமதி மறுப்பது, பாலாற்றின் குறுக்கே ஆந்திர அரசு தொடர்ச்சியாக தடுப்பணைகளைக் கட்டி தமிழகத்திற்கு வரும் நீரோட்டத்தைத் தடுப்பது உள்ளிட்ட தமிழக மக்களின் முக்கிய வாழ்வாதாரப் பிரச்சினைகள் குறித்து விவாதம் மேற்க்கொள்ளப்பட்டதா? அதில் என்ன முடிவுகள் எட்டப்பட்டது என்பது பற்றிய விரிவான அறிக்கையை தமிழ்நாடு சட்டமன்றத்தில் சமர்ப்பித்திருக்க வேண்டும். ஆனால், இதுவரை அத்தகைய அறிக்கை எதுவும் சமர்ப்பிக்கப்படவில்லை. எனவே, நாளை (24-ஆம் தேதி) மீண்டும் தொடரும் சட்டமன்றக் கூட்டத்தொடரில், தமிழக மக்கள் அனைவரும் தெரிந்துகொள்ளும் வகையில் தென்னிந்திய முதலமைச்சர்கள் மாநாடு விவாதம் குறித்து தமிழக முதல்வர் விரிவான விளக்க அறிக்கை வெளியிட வேண்டும் என தாங்கள் இக்கோரிக்கையை சட்டமன்றத்தில் வலுவாக எழுப்ப வேண்டும் என வலியுறுத்திக் கேட்டுக்கொள்கிறேன். டாக்டர் க. கிருஷ்ணசாமி MD, Ex.MLA, நிறுவனர் & தலைவர், புதிய தமிழகம் கட்சி. 23.08.2026