ناديت شافي وازرق العود غناك
وانا على ماكنت وصل وقطاعه
يامرحبا ضج المكان بمزاياك
ياللي ورثت المجد طيب وشجاعه
مابالوطا وكر يناسب حلاياك
ماللصقر منزال غير الرفاعه
اللي يسوي بالاوادم سواياك
تاج على راس العرب والجماعه
ريح المكارم يصطفق فوق يمناك
مافيك عن فعل المكارم مناعه
ابك انت يمرح دابي النمل بحماك
لولاك ماامرح في ذرى الناس ساعه
كم واحد يوم اقبل السيف ينخاك
اما بدفع المال والا شفاعه
وقدمت مالك يوم شحو بلقياك
وراسه من السياف جبته قلاعه
وان عودت للشعر والشعر يزهاك
شعر كتبته من صحيح وقناعه
قبل الوداع وقبل تقفي مطاياك
ودعتك النفس الكريمه وداعه
يابو كفوفٍ سرها من نواياك
خلقك ربي بين مد وطاعه
كفك لو انك تمنعه عن عطاياك
حلت على بعض الاوادم مجاعه
سعد مطلق
فتحت لافواه البشر والردى باب
بزفر الكلام اللي زفرت وشهقته
خلاص ياابن الذيب لاتدور اصحاب
جردت وجهك من حياك ودفقته
سعد مطلق
مالقينا للمفارق حل رادع
وانحنينا للسكوت وللقطيعه
تاخذ الايام من عمر الموادع
مثل ماتاخذ من الغصن الطبيعه
سعد مطلق
وطن لاتضايق كلنا دون حدك سور
تلحف عيالك لا انكفوا دونك الاصحاب
نبيع القريب ونحتمي ظهرك المغدور
خسارة صديق ولا خسارة سما وتراب
سعد مطلق
ياموطني كل ذنبك فاتح بابك
وفي كل موقف يعز الدين وانت اقرب
تمسك الشعب حب وبارو اصحابك
ظهر لنا الداب عقب وطيت العقرب
سعد مطلق
حدث موقف لاحد الاصدقاء مؤلم.
يهيم في ليل العذاب وناحب
واغدت مواري وجهته رجليه
ماعاد باقي غير وجهٍ شاحب
يخاف لا تقسى عليه يديه
اشنع جروح العمر طعنة صاحب
وشلون باللي طعنته من خيه
سعد مطلق
لو كنت صادق والعزاوي صحيحك
ولو ان كفك لا اقرب الناس صيب
ان عجلت سود الليالي مطيحك
والله مايشمت فيك غير القريب
سعد مطلق
حزنك مهو شي لو تطلق مسابيقه
كثر التعب والتنهت ماله الداعي
ياوجه الاحزان كانك تشكي الضيقه
سلمني الضيق كله وامسك اوجاعي
سعد مطلق
لاصار صدرك من اللوعات متصدع
وجفنك من الحزن وامزان الغلا رمد
لاترسل دموع شعرك كنك مودع
انا اكره مفارق الغالين يامحمد
سعد مطلق
المدح للمال ماهو من عوايدنا
والمجتمع من سموم الحقد متذيب
والله لو نشاور الناس بقصايدنا
ماثار حرف لعزيز ولا انمدح طيب
سعد مطلق
سلامة شعورك يابوقلب حساس
كانك على بعض السواليف نادم
اللي تعودبالحكي يجرح الناس
لايستضيق اليا اجرحوه الاوادم
سعد مطلق
للشعر شيخه صداها جاك
غنابها شامي ونجدي
ماعاد لاهل العقول ادراك
ياوجد حرفي وياوجدي
للدره اللي مع الافلاك
نبجد بها اليابسه بجدي
بالله يااهل القصيد هناك
مامركم (مقحم النجدي)
سعد مطلق
قلت اقبل الوقت والايام منعاجه
وانعاج وجه الحياه وقلت ممنونك
حافظ وصاياك لكن باقيٍ حاجه
ما قلت لي كيف اعيش العمر من دونك
سعد مطلق
لاعودت لمراية المزح والرزح
ماني على سر النوايا مكلف
ماكل كلمه ضاحكه تعتبر مزح
احيان بعض المزح حقدٍ مغلف
سعد مطلق
يقوم مع هقوات الايام ويطيح
وعجزت متاهات الفقر تستبيحه
يرد جوعه لاكفر به بتسبيح
ولا شاف عابر درب يشحذ ذبيحه
اكبر عيوبه لا عذلته بتلميح
تنزل دموعه لا سمع له نصيحه
فقري وعودها على هبت الريح
ويلاوي يدين الزمان الشحيحه
سعد مطلق
طيب وعلا بك على راس مرقاب
ولا لك على مدات كفه مداخيل
من كثر ماحاز الفخر عند الاجناب
قاموا يحسدونك عليه الرجاجيل
سعد مطلق
ياوجه الحياه ان طاح من صحبتي ثلثين
عليك الله اكبر رد قلبي على جوفه
بلاش الظلام وليلة تنعي المقفين
وبلاش القصيد وشاعر ينزف حروفه
تطيح الوجيه وتنكسر هقوة الهاقين
وتدور الدواير بالكبير ان تعب شوفه
انا مؤمن ان الروح يسكن بها قلبين
وانا واثق ان العمر ماينفعه خوفه
لقيت الخوي مثل الذهب بالظروف يبين
اذا مد كفه ماتكلم بمعروفه
وعلى طاري الخوه ورفة جفون العين
خوي الزمن وقت الرخا نجهل وصوفه
حزام الظهر ماتكشفه مزهرات سنين
تبين المواقف لا اقبل الوقت بظروفه
رفيق ٍ اليا من طحت ولم لك السكين
ورفيق اليامن طحت شالك على كتوفه
سعد مطلق

