Yasin Ghazzawi | ياسين غزاوي

⛔️مراجعة #فخر_السويدي فيلم ناضج وجميل، والكوميديا فيه موزونة ومبنية على كيمستري واضح بين الطاقم،، اشكر كل فريق العمل على شغلهم، من التمثيل للإخراج للساوندتراك وحتى الراب، كل التفاصيل خدمت الفيلم وخلّته حيّ وممتع القصة خفيفة ولطيفة، وتوصل للمشاهد بشكل سلس ،، من ناحية فنية؟ كان ودي أشوف مشاهد ليلية أكثر، خصوصًا بحي مثل “السويدي”، ليل الرياض له نكهة وكان ممكن يعطي الفيلم بعد بصري مختلف وبرضو الجانب العاطفي لكل شخصية ما أخذ حقه، كان ودي أعيش مع الشخصيات في بيوتهم وبين أهاليهم اكثر الشخصيتين اللي فعلاً عشنا معهم هم “شاهين” و”زياد”، والبقية كانوا أقرب للصورة العامة ، لكن بالمقابل؟ الدوافع كانت واضحة جدًا، وهذي نقطة قوة تُحسب للفيلم كل شخصية عندها دافع مفهوم ومبرر. المدير مثلًا واضح إنه يبي يكون قائد ومؤثّر، وعنده شعور داخلي بالمسؤولية. وزياد؟ شخصية جميلة وواقعية، ولد موهوب في تصميم الألعاب، عنده شغف حقيقي، لكن واقف بوجهه رفض من أهله اللي يشوفون إن هذا الطريق ما له مستقبل وهذا الصراع خلاك تتعاطف معه وتفهم دوافعه، لأنه كثير من الشباب يمرون بنفس الموقف الأداء؟ الكل أبدع بصراحة، كل ممثل أتقن دوره وقدّمه بطريقته الخاصة، وحسّيت إن الطاقم فاهم الشخصيات ومتعايش معها، وهذا انعكس على طبيعة الكيمستري الواضحة بينهم،، وأخص بالذكر: أبو سلو: حضوره عالي وكاريزمته واضحة، صحيح فيه لقطات أوفر، لكن طبيعة الكوميديا تسمح فيها، وقدر يوازن بين المبالغة والصدق في التمثيل ياسين غزاوي: فعلاً فاجأني. على إنه من خارج المنطقة، إلا إنه أتقن اللهجة والدور وكأنه من أهل الحي تمثيله كان صادق، ومافيه مبالغه ابداً يزيد الموسى: ضحكني وأقنعني جدًا، خصوصًا وهو جاي من خلفية “جماعة التوعية”، واللي يعرف يعرف! أداءه كان طبيعي وعفوي، والافيهات بصراحه كان مضحكه جداً واكيد اي عمل لا يخلو من السلبيات السلبيات؟ رغم متعة الفيلم وقوته، إلا إن فيه بعض الملاحظات: تشتت الفصول: أحيانًا تحس إن القصة تفلت منك أو تتشتت ، طريقة الانتقال لكل ربع او ثلث ساعه يكون فصل من القصة ، وكانها مجموعة حلقات مسلسل وتم اختصارها في فيلم ( وهذا اعتقد سببها اساسي بحكم كان المفترض يكون مسلسل ) غياب العمق العاطفي: كثير من الشخصيات كان فيها فرصة نغوص فيها أكثر، وخصوصًا من ناحية علاقاتهم العائلية والابعاء النفسيه ،، قلة المشاهد الليلية: حي السويدي له حضور قوي في الليل، واستغلاله بصريًا كان ممكن يضيف لمسة واقعية وشاعرية أقوى ،، مبالغات كوميدية: بعض المشاهد فيها أوفرات خفيفة، تضحك بس تخليك شوي تطلع لحظة من جو القصة والمشهد واخص بالذكر بعض مشاهد شخصيه شاهين الخلاصة: فيلم فخر السويدي تجربة كوميدية ناضجة، قريبة من الناس، كتب عنّا، عن شوارعنا، عن حياتنا، ، اطباعنا الخ… وهذا كله لأن كُتّاب الفيلم سعوديين، ومن أهل المنطقة، وعاشوا الواقع اللي يكتبون عنه كوميديتنا حنّا، وهالفيلم هو افضل فيلم في الكوميديا السعودية 👏 تقييمه بالنسبة لي: 8.5 / 10 ويستاهل كل ريال تدفعه… واوعدك بتطلع من الفلم وانت تضحك