‏ 𝒀𝑺𝑭

أنا كويتي، وإذا سألتني شنو تعني لي السعودية، أقول لك: أهل وعزوة وسند، وبلد له بالقلب مكان ما ياخذه أحد 🇰🇼🇸🇦 السعودية غالية علينا حيل… غلاها تربّينا عليه قبل لا نعرف شنو معنى العلاقات بين الدول. عرفناها من كلام آبائنا، ومن أهلنا وربعنا، ومن بيوت ندشّها ونحس إنّا بين أهلنا. فرحتها تفرّحنا، واللي يعوّرها يعوّرنا، واللي يمسّها يمسّ شي عزيز داخل كل واحد فينا. محبتها راسخة، ما تنطر مناسبة عشان نعلنها، ولا مصلحة عشان نحافظ عليها. يا أهل السعودية، لكم عند أهل الكويت محبة أكبر من الكلام، يوم الجد تلقون الكويتي واقف معاكم، بقلبه وصوته وموقفه. الله يديم عزّكم وأمنكم، ويحفظ قيادتكم وشعبكم، ويديم هالأخوّة بيننا جيل عقب جيل. السعودية عند الكويتي… أهل، والأهل غلاهم بالعمر كله. 💚 #السعوديه_خط_أحمر

شباب الحمدلله أنا بخير وأموري طيبة بفضل من رب العالمين أنا رجل مؤمن بقضاء الله وقدره، والحمد لله على نعمة الإيمان بالقضاء والقدر، رغم الوجع، أحس براحة وطمأنينة ما أقدر أوصفها، واللهم لا اعتراض على حكمك هل أمي توفت قبل يومها؟ لا الله عز وجل كاتب تتوفى بهذا اليوم ؟ نعم الله عز وجل كاتب تتوفى بالمستشفى ؟ نعم الله عز وجل كاتب تتوفى بسبب المرض ؟ نعم إذا فالمرحومة لا تحتاج إلى دموعي أو حزني، بل تحتاج إلى الدعاء والصدقات أكيد أنا إنسان، وقلبي مكسور، وحزين ومتألم جداً، ومرات تنزل دموعي من غير ما أحس. والحزن على الأم طبيعي، وما يتعارض مع الرضا بقضاء الله وجل أمي راحت عند ربها بعد سنوات من المرض والتعب وأسأل الله أن يجعل صبرها على مرضها تكفيراً لذنوبها ورفعةً في درجاتها، وأن يرحمها ويجعل الجنة دارها إن شاء الله بعيش حياتي مثل ما كانت تبي لي، وببدأ بتحقيق وصيتها: إن نهائي «تحدي الثلاثين» يكون وايد حلو، مثل ما كانت تتمناه. النهائي كان بالنسبة لها أحلى يوم بالسنة، وأبي أسوي كل اللي أقدر عليه عشان يكون على قد فرحتها فيه. فأرجوكم عاملوني بشكل طبيعي، وبدون حساسية. أدري إن فقد الأم وجع كبير، وأدري بعد إني مو أول ولا آخر إنسان يمر بهذا الوضع يكفيني إن ملايين الناس ترحّمت على أمي ودعت لها، وهذا بالنسبة لي أكبر إنجاز. مشكورين من قلبي على دعائكم ووقفتكم، والله لا يوريكم مكروه بعزيز

أمي في ذمة الله إنا لله وإنا إليه راجعون