ّ

حديتني للبعد ما كنت ناويه خيرتني ما بين عزي و ذلي انت الوحيد اللي انا كنت اغليه و اخذتها حجه و عناد و تغلي قلبٍ مليته بالعتب وين اوديه ؟ ابغاك مره تحط نفسك محلي انا تعبت اشيل حبك وترميه وشلون هاين تجرحه و انت خلي ؟ خليتني في وقت محتاجلك فيه هذا و انا اللي كنت اسميك ظلي

على الله يوم زلاته ماهي تحتاج للتوضيح و أجنَّبها عن لسان الملام المرَّ والمنَّة وأنا يوم أترك دموعي على هيئة قصيد تطيح؟ تجفّ بـ كلّ صح الله لسانك لا لفت منَّه وأنا لو زحت عن بالي طيوفه ما قويت أزيح شعورٍ كل ما يطري .. يدفَّ الونَّة بـ ونَّة

ودي أكمل معك حتى - الحياة البرزخيه - وين تلقى عاشقٍ يبغاك حتى في مماته من يشوفك يدري ان الموت حاجة عايديه كل ليله في "طوارف بسمتك" يعلن وفاته هات فنجال الهوى بـ إيدك وحطّه في يديّه لو تصّب الموت في فنجال حبك قلت هاته

على البال ما تحتاج ناسٍ يطرونك و أنت أربع حروفك داخل القلب منحوته أحبك ولا لي قدرة أعيش من دونك و غيرك ترا ما لي بشوفه ولا صوته

أن كان غيري يحن لك و يروف عسى القلوب تدوم والله يقربها ماني بقايل تعال و أمد لك الكفوف هذا غلط روحي و لازم أحاسبها ولا ينشغل بالك ولا يلحقك خوف و أشواقي ليا جات والله لا أكذبها صحيح قلوبنا عمياء ما تشوف لكن تحس بخيانة حبايبها

تبي غلا و تبي وفا و تبي حنان تبي عطا و تبي رضى و تبي هنا ؟ تبي أهتمام و قلب ما يزعل و أمان تبي و تبي .. و تبي تبي .. طيب و أنا ؟

أتصدّد عن عيوبه وبالي مستريح كل غلطة تعترض لي منه صلّحتها بس جاب مطمةٍ ما وراها الا قريح الهقاوي فوقها و السموحة تحتها

على هامش فراغاتك تبيني أعيش؟ أبدًا ما أعيش في هامش فراغاتك أنا جادلٍ مطغيني الكبر والطيش ما تلقاني إن ماكنت ضمن أولوياتك

ألين الأحساس و أسمّح الدرب و أهون الزله رضى و أبتسامه أعطي فرص لين أقتنع و أهجر القرب من بعدها تحرم علي النّدامه مع كل فرصه ضايعه ينقص الحب لين السلام .. يصير مع السلامه

طاوعت قلبي يوم جّرني لك الهوى و عصيت ربي لجل عينك وجيتك أخطيت و درب الضيّاع فيني التوى و بأوهام حبٍ في خيالي بنيتك - واليوم وينك ؟ قفّيت عني و قلبي من الهمّ أستوى و هذي النتيجة يوم إني عطيتك! يا ليت قلبي عن غرامك قد قوى ولا عصيت اللي خلقني و رجيتك

أن كان مالك نفس قلي و مسموح ولا تكرهني بنفسك و أنا أغليك الروح ما تجبر على معرفة الروح فكر وعطني صامل العلم و أعطيك إن ما حصل ما بيننا ضحك و مزوح بالغصب ماني يا أريش العين باغيك ما أبيك تنهي صادق الحب بجروح أبذكرك بالخير لا حلّ طاريك

أحبّه .. و أنا مدري إذا الحب ينصفه أبي شيٍ أكبر من غلاه و وقايده حبيبٍ عزل قلبي عن الناس و امسكه مثل ما يعزل الحر الأشقر طرايده حبيبٍ خذا مني كثر ما خذا السهر من عيوني اللي بازرق الدّمع جايده

الصمت يكفي و يشفي صدر راعيه لا صار كلّ الحكي ماله معاني و القلب ما عاد تعنيه المشاريه و العين ما عاد تغريها الأماني يا ليت حزني مجرد دمع و أبكيه ما هو عايش معي بين المحاني مدري ذكرني زمان كنت ناسيه مدري ذكرت الزمان اللي نساني

لي مدةٍ و ظروف الأيـام ضدّي أقول تصفى و الزمن ما صِفالي و إن دارت الأيـام ما باح سدّي رضيت بالمقسوم مهما جرالي

يعرّيني الشوق وتعشمني الأحلام لا لبّسني التفكير ثوبٍ ما هو ثوبي على يمِّتك من وين تبعد بك الأوهام ! ما دام أعرفك ماني بـ ناشد عن دروبي مثل ما تدارك في المطر خطوة الأقدام تداركت في وابل مشاريهك عيوبي وش أقول لو وجهك توارى مع الأيام ؟ وأنا الضحكة اللي في وجه غيرك ذنوبي

بتفقدني ليا من بل دمعك شالك المطروح ولا عيّنت حولك من يحن الناعس الخدري و ترجع لي تشيلك حسرتك شيل البحر لـ اللوح و أغني لك و أنا مشتاق لك « ما عاد به بدري » ما والله تدخل لـ قلبي لو إن قلبي سفينة نوح عقب ما جاك مصفية الهيام و صرت له جدري

راح تذكرني إذا شانت سنينك و راح تفقدني مع الأيام أدري الوعد قدام ما بيني و بينك روح جرب غيري و تعرف قدري حبي لك أكثر ترا من والدينك يا مشاركني تفاصيلي و عمري

عجزت اتخطى ذكرياتٍ طواها الياس انا كيف بنسى ماضيٍ صعب نسيانه ؟ حلالاه لو اعيش عمري بدون احساس احس الحياة بدون الاحساس فنانه عسى الساعة الي جابت المترف المياس فدا الساعه الي هزّت القلب و اركانه

الله من ذكرى تحوف الرقادي لا جاء لذيّذ النوم ترسم خياله تاخذني لكل جالٍ ووادي و تجر قلبٍ حالته حيل حاله تقبل بعاصفة الحنين و تنادي و تلعب بقلبي لين يبدا هباله و المشكله في كل ليله تعادي حتا غدى حالي من احدا حلاله أحارب الذكرى و أعزز عتادي و اليا قمعت الشوق زاد اشتعاله

لا تحسب إني كارهك يوم صدّيت قلبي على حطت يدينك .. وخبرك سويت كل حاجه تجيبك .. ولا جيت وش باقي أسوي ؟ سواة اللّٰهُ ابرك