عاشق الجنوب

عن غيابك كل يوم أكتب قصيد وأسال أحساسي وش اللي مبعّدك فاقدك من وقت لكن مو جديد الجديد أني تعودت أفقدك

شكيت لدكتور من دمعة العين اللي خذت من ناظري لذة النوم وكتب دواي و قال من بين قوسين لازم تشوفه " ٦ " مرات في اليوم

ياليت لقلوب البشر فيه تطبيق سجل دخول وشوف كامل صفاته اما احتفظ به فـالسجلات تـوثيق والا احذفه واحذف معه ذكرياته

بعض الرسايل خطها ينعش الروح لاجات من غالي وقلبك يوده تشفي عليل النفس وإن كان مجروح وتخلي أوقاته رخا بعد شدة ترى الغلا ما بين الأثنين مسموح ما أحد تحكم في فؤاده بيده

الله يـعين القلب لا ساقه الشوق صوب الـديار اللي سكنها وليفي الصدر من كثر الهواجيس مخنوق والوقت ماجاني على كيف كيفي

عطني شفاتك مره بالاسبوع بروي ضما قلبي واشرب عسلها جيتك وانا ميت عليها من الجوع ياحظ والله شفتك من وصلها

ياليت لقلوب المخاليق فورمات وان فرمتوها جات نسخه جديده ترجع ماتحمل شي من ماضي فات الا رسوم الذكريات السعيده

ماترجع الدنيا ولا ذيك الايام وقتٍ مضى بالعمر محدٍ يرده .

الناس مثل البن والوقت محماس ومن تحتهم نار السنين العجافي نوعٍ ليا ذقتــــه يكيـف لك الـرأس ونـوعٍ عسـى ربي يـديم العوافي

يالله عسى الوقت يمشي على خير وكل الامور اللي على البال تفرج وتشرق لنا شمس الامل بالتباشير ونلقى لنا من ضيقة الصدر مخرج