Absalom Kibanda

VIDEO: Mwenyekiti wa Jumuiya ya Maridhiano Tanzania (JMAT) Mkoa wa Dodoma, Askofu Evance Chande, amewataka viongozi wa dini na wadau mbalimbali kutumia siku chache zilizosalia kuelekea uchaguzi mkuu kutoa elimu kwa makundi mbalimbali hasa vijana kuhusu umuhimu wa kudumisha amani. Akizungumza leo Oktoba 25, 2025 jijini Dodoma katika kongamano la viongozi wa dini wa Kanda ya Kati (Dodoma na Singida) kuliombea taifa amani na utulivu kuelekea uchaguzi mkuu, Askofu Chande amesema ni muhimu kuwaelimisha vijana kutotumika vibaya na kujiingiza kwenye vitendo vinavyoweza kuhatarisha usalama wa nchi. “Tukae na vijana tuwaambie kwamba sumu haionjwi. Unaweza ukasema nitaandamana vyovyote itakavyokuwa, bila kuelewa madhara yake. Tuwape elimu hawa vijana, wasije wakaitumbukiza nchi hii kwenye matatizo,” amesema Askofu Chande.

VIDEO: Mwanahabari mkongwe nchini, Absalom Kibanda, amesema kuwa Chama cha Demokrasia na Maendeleo (CHADEMA) kimepoteza dira kuelekea Uchaguzi Mkuu wa mwaka 2025 kutokana kukataa kushiriki mchakato wa uchaguzi. Akizungumza na Jambo TV katika mahojiano maalum, Kibanda amesema uamuzi wa chama hicho kujitenga na mchakato wa uchaguzi na maridhiano ni matokeo ya hali ngumu ya kiuongozi ndani ya chama. Amesema viongozi wa CHADEMA wamekuwa wakisikiliza wenyewe mawazo yao bila kusikiliza sauti za Watanzania au kutafuta maridhiano na wadau wengine wa kisiasa. Kibanda ametaja kuwa chanzo cha hali hiyo kilianza kabla ya uenyekiti wa Tundu Lissu, akibainisha kuwa makosa ya msingi yaliibuka wakati wa uongozi wa aliyekuwa Mwenyekiti wa CHADEMA, Freeman Mbowe, hasa baada ya chama hicho kujiondoa kwenye vikao vya maridhiano na serikali kwa madai ya kutoridhishwa na mwenendo wa majadiliano.