alaa okail

توضيح مهم جدًا، لأنه مش متعلق بس بحق الكابتن علي ماهر، لأ، ده كمان حق للنادي الأهلي! أنا كنت سردت بشكل ساخر الكلام اللي قاله الكابتن مدحت شلبي عن اكتشاف كابتن علي ماهر ، لما قال: «الكابتن علي ماهر كان معايا في التحليل، ومكنش بيدرّب خالص، وكان بعيد عن التدريب تمامًا، بس لاحظت إنه طول الوقت ماسك Laptop 💻 في تحليل الماتشات، فكلمت الحاج محمود الأسيوطي، وكان وقتها مالك نادي الأسيوطي، ورشحت له علي ماهر. قال لي: لأ، ده بعيد خالص! فقلت له: خده وجرّبه». حابب بس أصحّح معلومة مهمة جدًا! الكابتن علي ماهر مرّ بمراحل تدريبية كتير جدًا ومهمة جدًا قبل تدريبه للأسيوطي، ومكنش بعيد عن التدريب ولا حاجة، ده بالعكس يُعتبر واحد من الكوادر الفنية اللي اشتغلت واتطورت داخل النادي الأهلي 🦅 🔴 الكابتن علي ماهر اشتغل مدرب في قطاع الناشئين بالنادي الأهلي، ودرّب أكتر من مرحلة سنية، من أهمها فريق مواليد 1993، وكان له بصمة مع لعيبة كتير تم تصعيدهم بعد كده، منهم ناصر ماهر، ومحمود تريزيجيه، ورمضان صبحي، وكريم بامبو. 🔴 النادي الأهلي صعّد الكابتن علي ماهر للعمل مدربًا مساعدًا للفريق الأول في مايو 2013، مع الكابتن محمد يوسف! يعني قبل تجربة الأسيوطي بـ4 سنين! 🔴 الكابتن علي ماهر، نتيجة بصمته ودوره، كمل مع الكابتن فتحي مبروك، ثم خوان كارلوس جاريدو، وكان له دور أساسي ومهم جدًا، وفضل حوالي سنتين ونص في الجهاز الفني للفريق الأول. وخلال الفترة دي، شارك ضمن الأجهزة الفنية اللي حققت دوري أبطال أفريقيا، والسوبر الأفريقي، والكونفدرالية الأفريقية، والسوبر المصري ورغم عدم استمرار جاريدو مع الأهلي لكن كابتن علي ماهر التجربة دي تحديدا لها تأثير مباشر في كتير من أفكاره الفنية وتدريباته 🔴 بعدها خاض تجربة معايشة تدريبية مهمة مع أتلتيكو مدريد الإسباني فرقت معاه جدا 🔴 كابتن علي ماهر درب فريق نجوم المستقبل كمدير فني ورجل أول في 2015، يعني قبل تجربة الأسيوطي بسنتين! ، ثم خاض تجربة تدريبية أخرى مديرًا فنيًا لنادي الترسانة. 🔴 بعد كل المشوار ده، وفي مايو 2017، تولى تدريب الأسيوطي، ووصل معاه لنصف نهائي كأس مصر، بعد ما خرج الأهلي بقيادة الكابتن حسام البدري من ربع نهائي فللأمانة، فكرة إن علي ماهر «مكنش بيدرّب خالص، وكان بعيد عن التدريب تمامًا، بس لاحظت إنه طول الوقت ماسك Laptop في التحليل» دي فكرة فيها ظلم كبير لمجهود وتعب سنين من العمل في قطاع الناشئين بالنادي الأهلي، إلى التصعيد مدرب مساعد للفريق الأول، وشغل مع أكتر من مدير فني، والمساهمة ضمن الأجهزة الفنية في تحقيق بطولات تاريخية، مرورًا بتجربة المعايشة الأوروبية، ثم العمل مديرًا فنيًا لأندية قبل للأسيوطي ودي أمانة لازم أوضّحها، طالما المعلومات عندي.