عبدالله المفضلي

انياب الليالي نطحت عـضات الليالي بالانياب واضحك واقول الصبر لازال باقي لازال بـاقـي عزم واسباب وابواب مادام روحـي ما عـلـت للـتـراقـي ما اجامل المبغض ولا اجزع ولا اهاب ولا اطلب من الماء كاس والنذل ساقي احـس بالـغـربـه ومن حولي اغـراب عز النـديـم و راحــتـي بالـفـراقـي #عبدالله_المفضلي #شعر

نهايب شاعرٍ حسّاس وقريّب حضايب من تصاريف البشر صعبٍ وثوقه ما يقدّر كود نطّاح الـنـوايـب ولا يهين الا ضعيفٍ فيه بوقه للديار الخاليه حث الركايب يـم مرقاب العنا قلبه يسـوقـه ينهب الراحه من الدنيا نهايـب كن فرحة يوم ماهي من حقوقه جنّته في عزلته مقـفي وغـايـب من ضجيج الناس ما شيٍ يشوقه ماحلى صبح المطر طرق الهبايب وصفة علاج المريض وفك عوقه #عبدالله_المفضلي #شعر

لوم النفس طير الحباري صامل الطلع ردام شاف الطريده وانعثر بشبكتها مهما جرى مانيب للنفس لوّام دفـعـتها مار الحظوظ خذلتها ياحـظ مادامك تعثّر بالاقدام كم فرصةٍ ضاعت مثل سابقتها هذا الكفن مترين من ساتر الخام المـوته اللي تـقـطع النفس متها ازهد بدنيا كلها زيــف واوهــام وسوالــفٍ ما تنلّحق شاردتـها #عبدالله_المفضلي #شعر

الطايره بالطايره قلبي بذكراك مجبور يوم استدارت بالسما بأرتفاعي لك إلتفت مما بقلبي من الجور فوق السحاب العين يمّك تراعي نظرت لك بأحساس واشواق وشعور روحاً لـهـا من نار حبك متاعي وحسّيت بالحسره ولو صحت معذور مادام شوفي لك مهو مستطاعي كأس الهوى يا شاغل القلب مخشور سكّر نبات و سم رقط الافاعي #عبدالله_المفضلي #شعر

بشرى محتاج بشرى رغم كل الـعـوايـق وين انت يا صبح البشاير للارواح اشـرب مـرار الـصـبـر واقـول رايـق واضحك وانا همي على الوجه فضّاح اللي على نقرة حضوضا مـوايـق يكذب على النشّاد لو قال مرتاح لكن بعلم الغيب كل الحـقـايـق عند الكريم اسرار واقدار الافراح #عبدالله_المفضلي #شعر

تطنيش هذا الزمان اللي يشيّب رضيعه خلّى عزيزين المبادي دراويش يـصـعـد به الكاذب بروجٍ رفيعـه ويلقى به الصادق تجاهل وتهميش ثـلاثـة اربـاع الفـعـايـل خـديـعـه بالفشخره والواسطه والبخاشيش مـادام عندي للـمـودّع وديـعـه ابا اعطي الايام ضحكه وتطنيش #عبدالله_المفضلي #شعر

البوح عن ما تكن صدورنا يصعب البوح تخفي كما تخفي لحود المقابـر لو كـانت الدعوى خطيره على الروح مـا كـنـّهـا صارت ونمضي نكـابـر اللي على باب المشاريه مذبوح تـضـدّه الـدنـيـا ولا زال صابـر للغير من داني مجمّل ومسموح بـعض الهـقاوي كان تفكير عابـر #عبدالله_المفضلي #شعر

نصارع الدنيا على غطرستها نطلب عدالتها ولا عندها انصاف لين كشفت جرد السنين اقنعتها وبـانـت خـفـاياها على كل مشراف ناسٍ متون حظوظها شايـلـتـهـا وناسٍ تشيل حظوظها فوق الاكتاف #عبدالله_المفضلي #شعر

لاصار بالمجلس خبول ومهابيل وصارت سوالفهم غلاط ولجاجه اسكت ولا عندي على الناس توكيل او اتـركـه مالي بالاغـلاط حـاجـه والعزله افضل عن كثير التعاليل اليا رخص بيع الكـلام بـحراجـه #عبدالله_المفضلي #شعر

ترمي بنا الدنيا من الجال للجال مثل السكارى في حياة النكايد احلامنا من دونها ابواب واقفال وعزومنا مـنـهـا تـهـون الشدايــد بيضٍ نـوايـانـا على كل الاحـوال نفعل جميل ومرضي الناس كايد #عبدالله_المفضلي #شعر

قطبين السماء انا قريني كل ما عسعس اللـيـل زان السهر له وارتفع للـكواكب مابين قطبين السما الجدي وسهيل كن المـجـرّه في عيـوني مـواكـب الله لا يـجـزا الـهـواجـيس والـهـيـل ما كـنـهـا الا الـقـاز بالـنـار ساكب تسري شجون الليل مسرى المراسيل وترسي على بـر الــخيـال المـراكـب وانا الذي صادفت عوج العـراقـيـل انقل حمول الوقت فوق المناكب واجـنّـب الشرهه ضعوف الرجاجيل عزومهم تـشـبـه بيوت الـعـنـاكـب #عبدالله_المفضلي #شعر

غيب الايام يا راسي اللي كل همٍ يـرسه مع اقتراب الليل حزة حلوله (لو عندنا من غيب الايام رسه) قد قيل قبلي واعترف به واقوله جنبت دربٍ فيه نقص ومحسه و تركت بابٍ محكماتٍ قفوله ونصيت كنزٍ كل ناجح يعسه ويرجع يدرج بالفوايد حموله ما يرجع الصقّار يومي بدسه مضيّعٍ طيره و نفسه زعوله #عبدالله_المفضلي #شعر

اي والله ادري مار ما كني ادري إلزم حدودك وانتبه.. يدك والحار مقابر اسرار المعارف بصدري واموت ما بيّحت سر من الاسرار اراقب ألفاظي ولا اهين قدري وش قيمة الرجّال لا صار ثرثار #عبدالله_المفضلي #شعر

تلدغني الدنيا من الناب للناب وانا خطاي اني بليّا خـطـيـه كم هقوةٍ ماتت على عذر كذاب وكم ضحكةٍ بالوجه ماهي بـريه #عبدالله_المفضلي #شعر

(احجار العقيق) يستثار الشعر والمارد يفيق بوح روح وفيض في رحلة فكر ابني الاهرام بأحجار العقيق واختصر كل المعاجم في سطر ان سبقني بالجنون ابن زريق اخـتـلـفـنـا بالزمان وبالسفر كان انا قلت آه من جرحٍ عميق اعذروني سلّم الله من عذر و كان همي عبد؟ .قولو له عتيق معتقه ما ابيه جيّاب السهر حايرٍ مذهول في وادي سحيق للسباع وللـكـواسر فـيـه اثـر في مضارب غربتي ضاع الطريق داهـمـه ريح الـبـوارح وانـدثـر لا طريق ولا صديـق ولا رفـيـق ما سوى عصف الهوا بأرضٍ قفر من يقول الارض بأبنادم تضيق؟ لين صارت دار حبس ولا مفر علقم الايام بأكواب الرحيق يمنح الانسان تصميم وصبر اكفخ الجنحان يالحر الطليق الزمان دروس للناس و عبر كل حرٍّ ماعشق قمة طويق والله انه خاب لو عاش الدهر قال واحد كان لي مجدٍ عريق قلت كان و كان ميّت في قبر ياضعيف العزم والناصح شفيق خل قلبك مثل جلمود الصخر تخدع الابصار يالغصن الوريق ما دريت انك ضريع بلا ثمر كنت امارس حق قانون الرقيق للهقاوي لين صارت في خطر موتة الهقوه بصّده من صديق طـعـنـة الايـام غـدرٍ بالـظـهـر قلبي اللي حمّله ما لا يطيق حظي العاثر غرابيل و كدر ليه سلمى ما تنزّل للعشيق لو تكون الروح لرضاها مهر صابرٍ والجوف به جمر الحريق جعل جمر الجوف يطفيه المطر اتعلّق بالسبب مثل الـغـريـق مؤمنٍ بالله واحــوال الــقــدر #عبدالله_المفضلي #شعر

يامال فرقى العين يا قرب الانذال اللي تـحـدّك للردى وانت طيّب الناس تخدعها المظاهر والازوال هـيـاكلٍ لـكـن مـداهـا قـريـّب #عبدالله_المفضلي #شعر

(الجوهره) نار الطموحات مس القلب صاليها والنفس ألبّي طلبها يوم واعصاها لي حاجةٍ يشغل الخفّاق طاريها استوطنت في صميم الذات رجواها الجوهره غاليه والناس تغليها لكنّها كايده للي تـمـنّـاها ادلجت هجن العزايم في حراويها من كثر شوقي لها خفت اتعدّاها اسعد بها حلم واملكها واخفّيها واشقى بها علم واخشى الناس وارعاها اشيلها هم و اخذ وجد واعطيها واسري لها الليل واروى شوق واظماها واكتب لها بيت شعرٍ هايمٍ فيها واصبّها كيف عاشق واتقهواها و ارسم جسور الامل بالفكر وابنيها واغيّر الخارطه و اهد مبناها وابيع غير الكرامه بيع واشريها واعاند ظروف وقتي واتحداها احلى القصايد على المقصود اغنيها واحلى المشاوير ما وصّلني حماها بانت نجوم السما لعيون ساريها لولا ظلام الليالي ما نظرناها ياحادي العيس لالا ما انت حاديها قدّامك دروب ما تعرف خفاياها ارجوك تعطي سهام القوس باريها من كان له صنعةٍ لابد يـهواها ما همنّي ناس تسبقني بأمانيها طلّابة الهون ما تغفر خطاياها #عبدالله_المفضلي #شعر

( الشمال امطار) الشمال امطار والاجواء جميله التمشّي فيه وصٰفـه للتعـافـي كل ماهب الهوا ينعش عليله المزاج بنفحة الذعذاع صافي بالشمال انا المـعـزب والدليلـه والطيور وصحصح البرّان كافي كيف ما يطرب ولا يشفي غليله الغريب اللي له الصحرا منافي صابرٍ صبر الجمل لازاد شيله من ثقيل الشيل تلحاه الظلافي نظرتي حول المراقيب الطويله كل مقصد دونها ماهوب كافي الردي واللي مـحـاريفه هزيله لا نشدني قلت له مابي خلافي كان عز النفس بالدنيا فضيله ما ترجّينا العطا من كل هافي الحياد وكل واحد في سبيله ماحرصت اعرف خفا ماكان خافي #عبدالله_المفضلي #شعر

( شمس الحقيقه) انا وين يا شمس الحقيقه ودربي وين غريبٍ متاهـة غربته قطعّت سبله يعيش الامل يومين ويموت عشر سنين بشاير تجي بعده والاخرى تجي قبله تموت الظنون وينتظر رجعها في حين ولازال بـديـار الـعـنـا مـبـعـدٍ شـبـلـه يخيل السحاب وترتفع فرحة المظمين تزيحه رياحٍ عاتـيـه ما خسر وبـلــه سمعنا بحظ فلان ويقال ابو حظين فروق الجوازي راتعه مع طياح إبـلـه ولو كان وصفه من صنوف البشر مسكين يصيد الطرايد من ورى الضلع في نبله قصير الروابع تابع العالم الماشين الى جاد حظه مع هل البيع يكسب له الا يازمان الظلم تضحك لابو وجهين وابو كلمةٍ عوجا وابو شوفـةٍ خبله على راس ابو مره يرفرف غراب البين خبيث النوايا ما له حساب يحسب له على الشهرة القشرا كثير البشر حرصين وعلى الصوره اللي بالفلاشات منهبله يلمّع بشوت اهل الملايين بارد عين ولو قالوا يصلي صـلاةٍ بـلا قـبـلـه انا عزلتي راحة ضميري عن الواشين سبيل الرجا بالله وانا قاضبٍ حبله تحرّص على رجلك عن افعى وعقرب طين ترى الناس غير الناس يالغافل الابـلـه #عبدالله_المفضلي #شعر