lulu

الناس مش مدركة فعلًا دور التعليم المجاني في الترقي المجتمعي و أنه كان بيدي للفقير المعدم "فرصة". كشخص جاي من أسرة فقيرة من قرية في قلب الدلتا..مكانش فيه أي دكتور أو مهندس في عيلتي أو معارفي..والنهاردة شغال في أكبر مستشفى مش بس في أمريكا لكن في العالم..فأنا مكنش هيبقى عندي أي فرصة من غير التعليم المجاني اللي حصلت عليه "ببلاش". كان اللي بياخد درس خصوصي بيتبص له على أنه "ضعيف ومحتاج مساعدة زيادة" لأن المدرسة و المدرسين كانوا أكتر من كافيين. أنا اتعلمت يعني إيه ثقافة ومكتبة في مدرسة حكومي في قرية. اتعلمت يعني توسيع مدارك من أمينة مكتبة في حصص المكتبة بتاع المدرسة. مكانش عندي انترنت لحد أولى جامعة (وأعتقد ده كان له تأثير إيجابي أكتر من كونه سلبي) لكن كان عندي فرصة و كان ادامي مصادر و ناس مثقفة ومتعلمة تساعدني في قرية في أقصى غياهب الدلتا. اتعلمت و اتأسست تأسيس هدفع عشرات آلاف الدولارات علشان ابني يحصل على شيء قريب منه دلوقتي في أمريكا. للأسف ده مش موجود دلوقتي للأطفال الصغيرين. و للسبب ده ففعلا أي حد بيدمر أو يحد من فرص تعليم فقراءنا هو public enemy number 1.