ياسر فاروق داود

النهاردة كانت عملية البنوته العراقية اللي اتكلمت عليها قبل كدا، هي و اهلها بيتكلمو كوردي فقط… ليها أخ عايش في المانيا بيتكلم الماني و كوردي فقط… عندها تشوه بالعمود الفقري ثانوي لعدة تشوهات خلقية بالفقرات و تدني بمستوي النخاع الشوكي … عملوا ايه بقي…. أخوها ليه صاحب في المانيا بيتكلم الماني و عربي… المريضة جت من كوردستان مع اهلها علي مصر و اخوها جه من المانيا و جاب صاحبه معاه.. أنا اشرح لصاحبه بالعربي و صاحبه يشرحله الماني و هو يشرح لأهله بالكوردي و لما حد يسأل سؤال نعكس الدايرة من كوردي لكودي ثم لألماني ثم عربي… المرتجم صاحب اخوها رهيب… رجل فاضل جداً جه معاهم مرتين من المانيا علشان يساعدهم في موضوع الترجمة دا. المريضة راحت المانيا و تركيا و ايران علشان حل لتشوه العمود الفقري و الكل اجمع انها لو دخلت العمليات هتتشل ف بيقولي اشمعنا انت متطمئن قولتله مش عارف لكن مطمئن … و بعدين سألني علي لسانهم ايه اسوأ حاجه ممكن تحصلها في العمليات قولتله دا سؤال كويس بس قولي ايه اسوأ حاجه ممكن تحصلنا كلنا دلوقتي حالاً من غير ما نروح العمليات… برق لي بعنيه و بلع ريقة كدا كأنه شاف حتة جاتوه و يستعد يأكلها كلها و قالي بدون تفكير … نموت كلنا المهم قولتلهم الموضوع خطير جداً ايوه لكم أنا مطمئن …. بعد ساعة من الأسئلة قولتله طيب قولهم اني مطمئن لمن ممكن اطلع حمار و كنت مطمئن غلط و كل الناس الباقية كانوا صح …و صممت يترجمهالهم بعد شوية كتير لقيتهم بيتكلموا مع بعض و سايبيني خالص قاعد مش فاهم حاجه😃 قولتلهم فيه ايه قالي اصلهم بيسألوني اسئلة مكررة و أنا حفظت الإجابات منك ف بجاوب مكانك العملية كانت تاني واحدة النهاردة و قبلها كان عثمان من الجزائر والدتة جراحة أطفال و كانت مرعوبة جدا و عثمان كان صعب الحقيقة … لما قولتلها عثمان بخير انهارت من البكاء ف قولتلها لا مش وقته خالص دا أنا داخل علي التنين حالا… المهم ربنا اكرمنا و خلصت البنوته العراقية علي خير و نزلت لأهلها و مكناش في حاجه لمترجم علشان اطمنهم اشتغلنا احضان و إشارات علطول لحد ما جه صاحبهم المترجم