До.Батболд

Монголбанкны цасан бөмбөг шиг алдагдал хаанаас эхтэй вэ гэвэл Баярцогт ЗГХЭГ дарга байхдаа засгийн балансаас тийш нь хувааж бичих схем зохиосон. МАН мангардуу хулгай хийдэг. Баярцогт бол тогтолцоогоор нь хулгайлах схем зурах авьяастай. Хамгийн аймшигтай хортой хүн дээ төрд.

Харанхуй өрөөнд нуусан өрийн дэвтэр, дэвтэр тойрсон "эхнэр нөхрийн хэрүүл" Хэдэн жилийн өмнө асуудалд орсон эхнэр нөхөр хоёртой танилцав. Асуудал юув гэвэл банкин дээр зээл нь чанаргүйдээд ирэхээр холбоо таслаад зугтсан аж. Тухайн үед Капитал банк дампуурах гэж байсан ба зугтаачихвал дампууралтай хамт нойллоно гэж буруу тооцжээ. Юу гэж тийм юм байхав дээ. Улам улмаар нэмэгдсэн зээлийн төлбөрт хамаг хөрөнгөө хураалгахад тулж, заримыг нь зарж үрж байж төлөв. Миний зуслантай болсон түүх ийм. Өнөөдөр Монголбанкны алдагдал 7 их наяд гаруй төгрөг болжээ. Энэ тухайд сангийн сайд Мэндсайхан Монголбанк алдагдал, алдаагаа Сангийн яаманд үүрүүлэх гэж байна гэж ярьсан байх юм. Энэ сайхан гар дээр дурдсан эхнэр нөхөр хоёроос ялгаа алга л даа. Монголбанкны алдагдал бол Засгийн газрын алдагдал. Байр орон сууц, ипотекийн хөтөлбөр, шатахууны үнэ тогтвортой байлгах гэх мэт нь Засгийн газрын ажил. Төв банк руу засгийн ажлаас хувааж авсан Золжаргалаас хойш энэ мэтийгээ Монголбанкны баланс руу бичиж, Монголбанкны үнэт цаасаар санхүүжүүлж, Монголбанкны алдагдал болгож явсаар тэр нь энэ мэт дүнтэй болжээ. Зүйрлэбэл нөхөр нь эхнэртээ орон гэрээ засварлах, машинаа түлштэй байлгах гэх мэт асуудлаар зээл авахыг зөвшөөрч, зээлийн дэвтрээ харанхуй өрөөнд нуу гэжээ. Эхнэр нь нөхрөө арав гаруй жил аялдан харж зээлийн дүн нэмэгдсээр нөгөө дэвтэр нь дүүрч иржээ. Нэг өдөр эхнэр нь зээлийн дэвтрээ гаргаад ирсэн чинь нөхөр нь наадах чинь надад хамаагүй, наад данс дэвтрээ аваад манайхаас зайл гээд загнаад байна гэсэн үг л дээ хаха. Гол нь эхнэр дэвтрээ аваад зайлах арга байхгүй. Зайлбал банкны систем чинь байхгүй, төгрөг чинь байхгүй, юу ч байхгүй. Золжаргалтай холбоо сүлбээгээ ашиглаж, зардлаа төв банк руу хувааж нууж байсан Баярцогт байна уу, Мэндсайхан байна уу, тэр хүндээ биш. Монгол Улсын Сангийн сайд л бол сангийн сайд. Нөхөр л бол нөхөр. Өр л бол өр. Тэрнээс хойш хэчнээн Монголбанкны ерөнхийлөгч дэвтрээ харанхуй өрөөнд дарлаа. Энэ удаад Наранцогтын баг өрийн дэвтрийг харанхуй өрөөнөөс гаргаж ирлээ. Нөхөртөө ядаж 2030 он хүртэл арга ухааныг сэтгэж, энийгээ барагдуулъя гэжээ. Тэрэнд нь бол браво гэж хэлэх байна. Дахиад хэлье. Монголбанкны өр бол Засгийн газрын харанхуй өрөөндөө нуусан өрийн дэвтэр юм. Хэдий чинээ удаан нууна, төдий чинээ асуудал хүндэрнэ. Өрийн дэвтрийн хуудас дүүрэх өдөр үндэсний валют чинь жинхэнээсээ цаас болно. Монголчуудын үнэний өмнө тавьсан өрийн дэвтрээ харанхуй өрөөндөө нууж, үүрд тэндээ хадгалж чадна хэмээн харанхуй итгэж амьдрах чадвар үргэлж гайхшрал төрүүлэх юм. Би ч яахав ах эгч хоёрын харанхуй өрөөн дэх дэвтрийг худалдаж аваад зуслантай болсон. Монголын эдийн засгийн өрийн дэвтрийг хойд урд ах нар харанхуй өрөөнөөс гаргаж ирж бүхэлд нь худалдаж авах өдөр үндэсний мөнгө санхүүгийн тусгаар тогтнол чинь дуусаа шүү.