Pinned Tweet
خايف .. إني أنخذل بآخر طريقي
و خايف إن العمر لوعات و حسايف
و خايف إن الكتف ما يسند صديقي
و خايف إن الحق يطلع شي زايف
و خايف إني أفقد القلب الحقيقي
و خايف إني ما أعيش بيوم خايف
من زمن يا شرّد القيفان ما جتني هبوبك
كنك اللي ما بريتي بالصدر قوس الربابة
السفر طوّل .. وطال الليل وأخلفنا دروبك
ما يزيد الجرح طعنة غير من قل الكتابة
جيت أبسرق من عتيم الليل ما يغفر ذنوبك
صادفتني نجمةٍ تغفى على جال السحابة
لا اقفى غبار الحرب والهيجا هجاد
شفت السعودية تدوس خصومها
ما هي وليدة يوم .. يوم الله اراد
هذي معانقة الفخر من يومها
أعجبك أو ما أعجبك جعلك للحصاد
نوطى ذيول الفرس تصرخ رومها
هذا البلد ما كان حي الله بلاد
طغمة همج قمنا نخزم خشومها
🇸🇦
الله يديم الوطن ويديم حكامه
ويديم شعبٍ تحت ظل السعودية
الله خلقنا على مد الزمن هامة
ما زعزعتنا زنابيل وحرامية
رح علم اللي يعد ويحسب أيامه
الموت في ساقتك يا سافل النيّة
لو تحفر قبور أهله بباقي عظامه
جمعتهم جمعة الفيران بالحيّة
رسخت حكمك بالمداراة والسيف
ونشرت شرع اللّٰه وسنة نبيّه
يوم إنها خوف وهجاد وتكاليف
وحدتها من فوق ظهر العبيّة
مثل السحابة جيت عن لاهب الصيف
تقشع ظلام الجهل والعنجهية
وأخذت شعبك فوق روس المشاريف
بالمقدرة والهيبة الفيصلية
#اليوم_الوطني_السعودي_٩٦
على أية حال يا قلبٍ يلوعه طاري الميلاف
تماسك واذكر أحزان السهارى وانفض أحزانك
ترا نصف الشجاعة والجسارة يوم صرت تخاف
لو إنك لأول خيوط الشعاع تفك بيبانك
أحس بغربتك وأنت الوطن والجرح ما ينشاف
يا كبر الجرح يوم إني غريب وضاعت أوطانك
تغيرت واجد وأدري الوقت لاعب دور
ما صرت أتشرّه وأقضي العمر بالساهل
عسى الله يعين اللي مساريه بالديجور
خطاويه تتعب لكن الموت بالكاهل
أخبر الجهل ظلمى وأخبر المعرْفة نور
أجل من يضوي خطوة الدرب للجاهل ؟
يا قلبي كتبت الحزن والفرح للجمهور
ما دامك رضيت الحزن والضيق تستاااهل
على الله يجيبك يا أترف الجيد صوت الناي
وأنا لي ضلوعٍ من هكالعام مثقوبة
يقولون تنسى .. والزمن سلوة النساي
أجل من يغض الطرف وعيونه التوبة ؟
مانيب النبي يعقوب لو الظروف أعداي
وعيوني الين الحين ترقب طرف ثوبه
تروح له بك ضيق وظروف وأزمات
وتقوم وهمك منشرح من سؤاله
لو إنه أكبر من جبال السروات
خلاه في عينك بحجم البيالة
يا عيون القصايد لا يصيبك عمى
اتركينا نعافر بالزمان ونشوف
الطموح إن تمادى يرتفع للسما
لا يرده سحاب ولا تغره قنوف
ما عشقت السراب ولا نكرت الظما
لين قلت الكلام اللي بليا حروف
بالحياة المريرة وين عذب اللمى ؟!
ثابتٍ بالخطاوي والظروف الظروف
ما كرهت بحياتي غير وقت الوداع
كل حرفٍ تلاشى وقت تلويحتك
ارحل بصمت ما ودي أحس بضياع
والنسيم أرتجيه يمر في ريحتك
ضاق درب المدينة لو عيونك وساع
ولو تطيح النجوم أهوَن ولا طيحتك



