مساء الخير 😅 مكنناش حابين نتكلم كتير بس وجب التنويه لأمانكم: «ع الدائري» لعبة سواقة مصرية على الطريق الدائري عملناها ببلاش ومن المتصفح على طول، عشان أي حد بأي موبايل يلعبها. ووصلت لناس كتير في مصر وبرّه أسرع ما تخيلنا، وإحنا مبسوطين جدًا برد فعلكم: رسايلكم وأفكاركم وكليباتكم بتفرّحنا كل يوم. شكرًا لكل واحد فيكم. مع الانتشار بدأنا نواجه شوية مشاكل: ❌ تطبيقات على المتاجر بتقلّد لعبتنا، وبتستخدم رسوماتنا وشكلها، وبتغيّر اسمها كل شوية عشان تفضل موجودة. اتقدم فيها بلاغات رسمية. ❌ مواقع وجروبات بترفع نسخ من تطبيقنا، وبعضها متعدّل. ❌ ناس كتير بتكسب من ورا اسم «ع الدائري»: إعلانات على نسخ مش بتاعتنا، وصفحات بتتربّح بإعلانات من تعبنا… وإحنا لسه بنبتدي. لحد النهارده مفيش إعلان واحد في «ع الدائري». لا على موقعنا، ولا جوه اللعبة. ولا صرفنا جنيه على إعلانات عشان اللعبة تنتشر، ولا أخدنا جنيه من إعلانات. كل اللي وصلناله ده كان منكم إنتم ❤️ ولو الإعلانات هتيجي، هتبقى كلها اختيارية: إنت اللي تختار تتفرج لو عايز . مفيش إعلان هيطلعلك يمنعك من اللعب، و احتماليته علشان بس تساعدنا نكمل مش علشان نستغل اللعيبة. فأي نسخة فيها إعلانات بتفرض نفسها، أو بتطلب منك تحمّل حاجة تانية… مش مننا. المصادر الرسمية الوحيدة: ✅ اللعبة: dayeri.com موجود في البايو بتاعتنا. ✅ نسخة الأندرويد موجودة جوه الموقع متاحة للتنزيل على اندرويد. ✅ قريب على جوجل بلاي باسم "ع الدائري" و اسم المطور: تلاهي – Talahy والتحديث الجديد بيقفل أي نسخة متعدّلة. لو قابلت نسخة من مكان تاني، ابعتلنا اللينك علشان ناخد الأجراء اللازم، ونصيحتنا تمسحها. ودي لسه البداية 🎮 عندنا ألعاب تانية أحلى بكتير جاية في الطريق. ساعدونا بنشر البوست ده، عشان كل اللي بيحب اللعبة يوصل للنسخة الأصلية 🙏 استوديو تلاهي #عالدائري