وسيع العيون اللي رموشه سهوم الموت
من اول لقى والقلب مجروح ويعاني
سحرني بصوتٍ نبرته من سحر هاروت
رغم قوتي قاومت , لكن ما امداني
عطيته وانا المحروم من عمري الموقوت
عشان المحبه سقت له عمري الفاني
عسى ما يجيني مثل ما جاء عقاب ونوت
بعد ما دخلت الحب بـ اسلوب متفاني
محتاج لي يوم فيه أهدا ويوم استريح
يومين والثالث أواصل معاك الأمر
فـ إذا أنت متعوّد تفارق وتقفي جريح ؟
تراي انا مابعد عشت الجفا المستمر
عطني معك وقت افكر بالخيار الصحيح
زعلك مر وعتبك أدهى ، وصدتك أمّر
ماهوب بالساهل إنك من عيوني تطيح
ولا من الذاكره تِمحى ولا من العمر
ودي ارجع بالزمن قبل عام او حول عام
[ واستعيد الضحكة الغايبة .. وانولها ]
ماحسدت من البشر صاحب العقل التمام
ماحسدت الا ( مجانينها ) و ( خبولها )
(الحياه) من الغرابيل ماعطتهم جرام
مايذوق من الغرابيل غير .. (زحولها)
غريب الدار ؟ لا والله أحسنِّي غريب شعور
فتر قلبي ولكن ما هدى فكري عن إزعاجه
سجين الذكريات الِّلي تحاوطني بليّا سور
نديم قيود ما تفرق معاها لحظة إفراجه
لا صار ذراعي الأيمن تغير بدون مبرور
زوال النعمة الِّلي ضيّعت نوري عن سراجه
شعوري الليلة شعور البدايه
بين القديم من السكك والمنازل
شعور من يبغى الرضا و الهدايه
ويواجه أنواع الحيل والمهازل
غريب ماله من ورى الناس غايه
وبينه وبين الواقعيه عوازل
راحت حياته ينتظر والنهايه
يوم أقترب من كل حاجه .. تنازل
ألا يارفيقي مرحبا والعلوم عفاك
تراني تجاهلت الخطا ما تجاهلتك
دقاق الأمور الماضيه جعلها تفداك
يدمحها غلاك و طيّب راسك ومرجلتك
أنا مستحيل أزعل على اللي مهوّ شرواك
مقدار الزعل عندي بْمقدار منزلتك
قلبي اللي صابته عين مدري من اي نوع
و ان سلم ماعاد والله يجي له عايده
يتشالا بالمطاريش وبشوف النجوع
وخوة اللي طمر عجفا الخوي عوايده
فيه للطاله مواري وللناموس شوع
يا كبر هقواته ويا وسع بنايده
ابلج مع وجهه الطيب ماخذها قطوع
شغلته خاطر رفيقه مغير يصايده
تراك الشمس لا عمّ الظلام وشانت ظروفي
و ظل الدرب لا مال الجدار وطاحت ركونه
وتراك الجنب الأيمن والحليف ومزبن سيوفي
و سند روحي ليا خان الزمان و دارت غبونه
وتراك أغلى مساييري و طيفك أكرم ضيوفي
و صدري مجلسك و الناس ماعادو يمرّونه !
اصنع من القسوه رخا قدّام تصنعك السنين
ترا الحياة أم المعارك تهلكك لا اهملتها
ابطش على الدنيا و واجهها بعزمٍ ما يلين
ان كان ما خلّدت مجدك سطوتك خلدتها
ترى البطل ماعاش فوق الأرض مكتوف اليدين
إما عظيمٍ فوقها — ولّا عظيمٍ تحتها