كالعادة، مبعرفش اكتب إلا اللي أنا شايفه صح حتي ولو اختلف معي الجميع ومع كامل الإحترام لكل الآراء المضادة 👏 وجهة نظري في حكاية إن زيزو وإمام عاشور لازم يتباعوا، وإن المشكلة فيهم وإن رواتبهم كسرت سقف الرواتب في الأهلي او مستواهم الفني ! 👀🔴 خلينا نفكر بهدوء شوية.. إحنا مشينا تريزيجيه، وكان ملف الرواتب من ضمن الكلام عن أسباب رحيله، طب هل المشاكل الفنية انتهت؟ هل الأداء اتحسن بالشكل اللي كنا مستنيينه؟ 🤔 بالعكس خسرنا حل هجومي كان هو الأفضل لاعب النهاردة موجود في كل الاستفتائات بيكرم كأفضل لاعب 👌 أنا مش ضد إن الأهلي يبقى عنده نظام واضح للرواتب، ولا ضد إن الإدارة تحافظ على استقرارها المالي.. لكن فيه فرق كبير بين إنك تنظم مصاريفك، وبين إنك تفرّط في لاعيبة مميزة لمجرد إن رواتبهم كبيرة! 💰⚖️ إنت لما تتعاقد مع زيزو، فأنت عارف إنت جايب إيه.. لاعب مميز على الطرف، عنده القدرة على صناعة الفرص، وإرسال العرضيات، والتحرك لمناطق الخطورة، والتسديد، والتميز في الكرات الثابتة. 🎯 ولما تتعاقد مع إمام عاشور، فأنت جايب لاعب يقدر يصنع الفارق من وسط الملعب، بالاختراق والتقدم بالكرة والوصول لمنطقة الجزاء والتسجيل. 💪🔥 طيب، بعد ما استثمرت في الإمكانيات دي، مش المفروض توفر لهم مدرب يعرف يوظفهم صح، ويبني منظومة تستفيد من مميزاتهم؟ ولا ندفع في اللاعب وبعدين نسيبه وسط منظومة مش عارفة تطلع أفضل ما عنده، ولما مستواه يتراجع نقول راتبه كبير ولازم يمشي؟! 🤷‍♂️ إنت مش ممكن تدفع في لاعب باعتباره نجم هيصنع الفارق، وبعدين تحاسبه على فشل منظومة إنت أصلًا مش موفر له فيها الظروف المناسبة للنجاح! 👈 والأهم من كل ده، إننا شفنا بنفسنا إن مستوى اللاعب ومردوده ممكن يختلفوا من مدرب للتاني. إمام نفسه قدم فترات مميزة مع كولر، وده مش معناه إن كل تراجع في مستواه سببه المدرب، لكن معناه إن طريقة التوظيف والدور المطلوب من اللاعب عوامل مينفعش نتجاهلها. ⚽️🧠 اللحظة اللي الأهلي هيتعاقد فيها مع مدرب كبير وحقيقي، عنده رؤية فنية وشخصية وقدرة على بناء فريق، هي اللحظة اللي نقدر وقتها نحكم بجد على نجاح أو فشل أي لاعب في القوام الحالي! 👌🔴 وقتها، بعد ما كل لاعب ياخد دوره الصح، والمدرب يوظفه بالشكل المناسب، ويبني منظومة تساعده يطلع أفضل ما عنده، ابقى حاسب زيزو وإمام وغيرهم على أدائهم.. ولو فشلوا فعلًا، ساعتها ناقش رحيلهم! إنما قبل ما تعمل ده كله، وتصدر أحكام نهائية على اللعيبة، وتطالب بإعدامهم كرويًا وبيعهم، من غير ما تحاسب المدرب على شكل الفريق وطريقة اللعب وتوظيف العناصر اللي عنده.. يبقى إنت بتحكم على النتيجة من غير ما تعالج الأسباب! 🚨 طالما قررت تستثمر في لاعب كبير، يبقى لازم تستثمر في المنظومة اللي هتطلع أفضل ما عنده.. وأهم استثمار هنا هو مدرب يستحق القماشة اللي في إيده! 💯🔥 الأهلي عنده إمكانيات فنية كبيرة، ومش منطقي نفضل نبيع ونشتري ونغيّر في اللعيبة، ونسيب أصل المشكلة من غير علاج. لأنك ممكن توفر في الرواتب، لكن تخسر قيمة فنية كبيرة، وتدفع أضعاف اللي وفرته عشان تعوضها.. وفي الآخر تكتشف إن المشكلة لسه موجودة! 🤦‍♂️🔴🦅