ahmed froto

كلام والدة يوسف وانت بتسمعه تحس إنك بتسمع قصة فيلم.. بس للأسف دي حقيقة. بتقول: يوسف ابني 15 سنة، تعب فجأة، خدته وجريت بيه على دكتور باطنة، كشف عليه وقالي شاكك إنها الزايدة، ولازم أشعة بسرعة عشان نتأكد. روحنا المستشفى، عملنا الأشعة، ورجعنا للدكتور، أكد إنها الزايدة فعلًا ولازم عملية. روحت لجراح في نفس المستشفى، ونبهته قبل أي حاجة: يا دكتور ابني عنده حساسية مزمنة من صغره، وده علاجُه معايا، خلي بالك منه ده نور عيني. طمني وقالي متخافيش، وطلب تحاليل عملناها جوه المعمل، وطلع عنده أنيميا، وطلب كيس دم، وجبناه. دخل يوسف أوضة العمليات.. ومن هنا بدأ الكابوس. بتقول سمعت زعيق عالي من جوه، وصوت دكتور التخدير بيزعق لابني: احنا مش فاضيين لك ورانا حالات تانية! وسمعت صوت ضرب على ضهره، ولما بصيت اتصدمت من اللي شوفته. وبتقول كان فيه حقنة ضهر شكلها يخوف، وبيورّوها ليوسف، وهو طفل 15 سنة وأول مرة يدخل عمليات في حياته! لساني اتربط من الصدمة، مبقيتش عارفة أتكلم. وتقول: عاملة النظافة داخلة طالعة من أوضة العمليات، والباب مفتوح، واللي رايح واللي جاي شايف كل حاجة. والأغرب إن دكتور التخدير بعد ما خدره مشي، وبعد شوية بعتوا جابوه تاني! بعد شوية طلع الجراح وقالي العملية نجحت واديناه بنج كلي. سألته: اديته كيس الدم؟ قالي: لأ مش دلوقتي عشان سخن. قولتله: سخن إزاي ودخلتوه وهو سخن؟! زعق فيا وقالي: انتي هتعلميني شغلي؟! انزلي الحسابات حاسبي تحت. نزلت وحاسبت، وطلعت لقيت ابني طالع على ترولي. قولتلهم: مش المفروض يبقى في الإفاقة؟ قالولي: لأ عشان واخد بنج كلي. حطوه على سرير من غير فرش حتى. فضلت أسأل: ابني مش بيفوق ليه؟ يقولي: هيفوق هيفوق. حاولوا يشربوه مية، والمية بتنزل على صدره، وهو مش بيبلع أصلًا. وشغّل التكييف وصدره مبلول ولسه طالع من العمليات! قولتله حرام عليك، قالي اسكتي وافتحي الشباك كمان. فضل على الحال ده 8 ساعات كاملة.. مش بيفوق! 8 ساعات وأنا بتحايل عليهم يسيبوني أنقله مركز إفاقة، والدكتور رافض. كنت بخبط راسي في الحيطة وبصرخ: فوقوا ابني حرام عليكم! لحد ما بعد 8 ساعات.. يوسف مات. دخل المستشفى عشان يعمل الزايدة، وخرج منها ميت. بتقول: أنا اللي وديته بإيدي، كنت فاكرة بوديه مكان يعالجه، طلع دخل كويس وخرج ميت. مش قادرة أنسى اللي شوفته، ولا اللي سمعته، ولا 8 ساعات وأنا بترجاهم يفوقوه. يوسف كان 15 سنة، أول مرة يدخل عمليات، كان المفروض يرجع لحضني. أنا مش هاخد عزا ابني غير لما أعرف الحقيقة كاملة، إيه اللي حصل جوه، وليه مفاقش، ومين المسؤول. حق يوسف لازم يرجع، ومش هسكت لحد ما كل مسؤول يتحاسب. الله يرحمه ويغفر له، وإن شاء الله حقه يرجع.