نواف بن سعد

"قصيدً مايجذب لبة السمع مانبغاه لو انه ذهب ساسه قطيفه ومن دره " -نواف بن سعد الا ياسحابً قام برقه يزاحم ماه على طيحته عساسة النو مستره يمر الهشيم وينفهق ربله وحواه بعد ماتداحم ضرب سيله على البره انا الشاعر اللي لو يغني على ليلاه يحط السحاب صفوف والارض مغتره قصيدً مايجذب لبة السمع مانبغاه لو انه ذهب ساسه قطيفه ومن درّه ابا اللي سوات الحق لابان عند قضاه ذهيبه مجود خطو اثرها من المره ليا مـرت الغـاوي ترده على ذكراه يضـيق بنسمه زرار ثوبـه ليا زره متى يستريح ويصفي البال من شكواه ومن ساعة الضيقه ومن دمعة الحره من يحب يعرف داه في رحلته ودواه مثل ما الرصاصه تعرف محمد الدره ليا غطرست وانقاد حلمه وحن و تاه تهيد القلوب اللي من العشق منغرّه انا كيف اعاتب نبض قلبي عشان انساه وانا قلبي ان ضيعته يروح و يمره فريره فرير الكدري اللي على مرماه عجولً رماه ورميته عنه مفتره من يذوق من حرّ الليالي ربع ماجاه لو تـمره الحلوه يبا يذوقها مرّه يتيم الخطاوي لا لقا داره ومرباه يبا ينام لو ان المخده حصى الحره ترا جضة الدمعه مثل كوية الجمهاه على وحدةً نامت يتيمه وهي ضره انا قلبي من العشق لا من وصلت اقصاه لقيت الفضا ياخذ رحابة فضا بره من يحب يوجع نبض قلبه نحيب ادعاه ليا راحت خيول الاماني لها كره احبه واحاضي خاطره من سهوم اعداه واتابع حنانه مثل من يتبع الذره ترا اللي يدور في غيابه على منجاه مثل من يدور فالعجاجه على جره .