عبدالله السيحاني

معترض لي خشف ريمٍ يورّد للحياض المنايا في عيونه ، تهاوى من بِطر :) بنت بدوٍ ما تبا الا الخباري ، والفياض ما تفكر في حضارة دبيّ ، وفي قطر ايه ياللي لاجلك الشاعر مْع الليل هاض انتي اللي لاجلها دق ناقوس الخطر ماخذه من زين جدتك مجدول وبياض وماخذه من جدك الاوّل عناد وسطر ! فتنتن لو دونك اكوان ، وحروبٍ تخاض نشطر صفوف المجاويخ لعيونك شطر كيف ما اغنيك وارقب مجيّك للرياض وانتي اللي مع مجيك يجيب الله مطر :)

يا مدوخة شاعرك والدوخه الدوخه وشلون ما ادوخ في وجهك وفي عودك ؟ ما انتي من البدر مطبوعه ، ومنسوخه احلى من البدر وشهودك على عضودك وزودً على الزين دلوعه ومطنوخه عاد الطناخه ورثتيها من جدودك انتي سليلة دواهي نجد وشيوخه كل العرب ما عليها زود عن زودك ! الظاهر ارماح جدك راعي الجوخه قد صفّها كل ابوها صف في سودك عقال خلق الله بطاريك مرضوخه وش عاد في واحدن كل ليله يرودك ما انلام لا ذبت في جيدك وفي خوخه لا صار حتى ذهبك يذوب فنهودك :)

يا بنت عودن تقدّم حزة الماجب شيخن بكلمه يعدّل كل منعاجه ! وشلون ما ابدع بشعري والشعر واجب في طيب راسه ووقفاته ، وفي انتاجه :) اي والله انتاجه اللي من ظهر ناجب غطّى على نجد ، والعشوا ، وهداجه يا سبّة الموهبة ، ما للقمر حاجب والشعر لولاك مدري شلون منهاجه لو ما اكتبك كان ماشفتيني بعاجب ( متذوّقين القصيد ) وكل روّاجه .. عليك زينٍ ماهوب بيشجبه شاجب يا شبه وضحاً على الميدان رهّاجه وان قلتي العين ما تعلى على الحاجب انتي ترا العين والحاجب وكل حاجه :)

بعض الهقاوي فالاوادم حسايف احذر ترا الخيبه على الكبد مرّه خذها وانا رجال شايف وعايف يا قل والله من يحبّ المبرّه كم واحدً كنت احسبه فالنوايف واليا بغيته ما لقيت اله جرّه يا سعد والله من معه مثل نايف اللي ( يرد اخوه ) في كل مره :)

القمر والليل والضوّ والقاع المساس تلهم اللي ما يغني سوى ف الملهمه ! شاعرن لا طرّف الليل وانحاز النعاس قمت اغني ما يكنّه ضميري وانهمه :) ما كتبت من الشعر غير ما يشعا الحواس ولا تركت من الشعر غير شعر الهيلمه القصيد اللي ماهو من شعور ومن حماس لا سمعته ، كنين اسمع رطين وتمتمه كل ما بان القمر صرت في حال انغماس انغمس في حالتن مشكلتها مبهمه ! مشكلة قلب الهواوي يجي فيه التماس والبدو قلب المولّع لا يمكن ترحمه لو اجيب البيت فكره وتركيب وجناس نادر اللي ينصف البيت والا يفهمه ! مخطي اللي يجلب الماس عند اهل النحاس كنه اللي يجلب المسك لاهل المفحمه :) وانت يا سبّة قصيدي ، ويا صعب المراس اسمع الشعر الحقيقي ب عينه واعلمه .. ادري انْك من الترف ما تشوف الناس ناس وادري انّك حلمي اللي من العام احلمه ! جل من لبّسك بالزين ، والفتنه لباس آخذن من كل حاجه تعنّيني ، سمه .. زينك اللي لا يوصّف ، ولا حتى يقاس الشعر ما ياصفه ، والرسم ما يرسمه ! والله اني يوم اجي للحراوي كنت حاس كل بيضاً عند شوفك تبا تصير شحمه مرحبا يا بنت اعزّ العرب ، واعزّ ساس مرحبا بك عدّ ما جر شاعرك نسمه والله ان شوفك يطيّر عن الراس العماس ووالله ان رمشك على القلب يدوي بسهمه اثمن اللحظات من بعد ما جيتي طفاس يا اثمن اللحظات فعلاً ، واطهر مسلمه انتي اللي حبها يجعل المبدول راس وانتي اللي صدها يجعل الكفو رخمه والولد لا صار ما فيه عزم ، وقوّ باس ما هو ابيستاهل الحب من قلب طخمه :)

يلومونني فاخوان مريم وانا ما انلام 🇰🇼 ما دام الجمايل بيننا البين مصيونه 🇸🇦

عسى الله يعز اللي لبيت الولي خدّام تفانوا بحال ، ومال ، وارواح من دونه عيال السعود اخوان نوره ضنا الحكّام سلايل هل العوجا حجا المجد وركونه لو ان النصارى كلهم واليهود اكوام يبون امننا والله فلا انهم يمسّونه ! ما يدرون باننا فالمواقيف ما ننضام ولا نشبه اللي ب الخيانه يمشّونه ما حنا ب مثل اللي ورا حدنا قمّام عميلن تحالف مع صعاليك بينونه خيانة من يشوف العروبه فقط هندام ما تنعاب من ( عمياً تمشّط لمجنونه ) ما دام العروبه في دمينا ، على الصدّام من يخون حد البيت ب اننقز عيونه ما وقّف مع اخوانه ياكود الوفي الضرغام ولا خاننا ، يا كود من عزمه يخونه يلومونني فاخوان مريم وانا ما انلام 🇰🇼 ما دام الجمايل بيننا البين مصيونه 🇸🇦

من تعود في حياته على الشي القليل ما روى ، لو انك تورّده عد الروى :)

يا قبلة الله صدق والله من الزين قد صبه الله في تهاياك مدرار :) عينك كبر عين الجوى ماهي بعين ووحدة قياس معنّقك قيس الاشبار ويلي على عنقً يجي قيس شبرين ونحرن ليا منه زمى ، ( زمّة احرار ) الله حسيب الخصر والردف واللين يا رب تسترنا ب سترك يا ستاااار مفروض لا منك طلعتي تمشّين تجي على الجوال صافرة الانذار ! خلي صواريخ الزيود الملاعين انتي براسك من صواريخ الاقطار والله ماعاد ادري معك وجهتي وين الظاهر اني ضايعن وسط دوار ! فالشامه اللي فوق عينك من يمين والشامه اللي تحت عينك من يسار :)