Stanley Mvuyekule🇹🇿

“Tulidhani furaha ilikuwa mbele yetu, kumbe wakati mwingine furaha yenyewe ilikuwa pale tulipokuwa” Maisha ya shule pengine ndiyo maisha yenye furaha zaidi ukilinganisha na hatua nyingine tunazopitia katika safari ya maisha. Ilikuwa ni kipindi ambacho hakuna aliyewaza kuhusu bili ya umeme, maji, kodi ya nyumba wala gharama za maisha. Urafiki wa kweli, wa dhati na usio na masharti ulitawala. Tulipendana bila kuangalia nani anatoka familia tajiri, nani ana uwezo mkubwa au nani hana kitu. Tulikuwa pamoja kwa sababu tulikuwa sisi. Cha kushangaza zaidi, hakuna aliyejua miaka kumi tu baadaye maisha yangempeleka wapi. Mchana darasani, jioni uwanjani tukipiga mpira, na usiku kwenye vibanda umiza kutazama filamu za Van Damme, Rambo na Jet Li. Hizo ndizo zilikuwa burudani zetu. Tulicheka kwa moyo wote, tulitania bila kuumizana na tulifurahia hata vitu vidogo ambavyo leo tungeona havina maana. Wakati huo, karibu wote tulikuwa sawa. Hakukuwa na matabaka makubwa kati yetu. Sote tulikuwa na ndoto zinazofanana, matumaini yanayofanana na hofu zilezile za matokeo ya mitihani. Kila mmoja alipambana kwa namna yake kuhakikisha anapata angalau Division Four ya 26, ili mradi tu asikose nafasi ya kusomea ualimu! Huo ndio ulikuwa mtazamo wetu wa mafanikio wakati ule. Lakini miaka imepita. Maisha yametutawanya katika njia tofauti. Wengine wamefanikiwa, wengine bado wanapambana, na wengine wamejikuta katika hali ambazo hawakuwahi kuzifikiria walipokuwa wakiketi pamoja kwenye madawati yale ya shule. Leo tukikutana tena, mara nyingi hatuoni tena tabasamu lile la zamani. Furaha haiji kwa wepesi kama ilivyokuwa. Mazungumzo yamebadilika, ukaribu umepungua na matabaka ya maisha yamejenga umbali mkubwa kati yetu. Kila mmoja ana mzigo wake, mapambano yake na simulizi yake ambayo huenda wengine hawaijui. Hata sonona imekuwa sehemu ya maisha ya wengi. Wapo wanaotamani sana muda urudi nyuma. Wangependa kupata nafasi nyingine ya kufanya maamuzi tofauti, kurekebisha makosa, kuchagua njia nyingine na pengine kuishi maisha tofauti na haya waliyonayo leo. Lakini muda hauna mlango wa kurudi nyuma. Umesonga mbele, na baadhi ya nafasi hazirudi tena. Pengine hatukujua kwamba tulikuwa tunaishi siku bora zaidi za maisha yetu. Tulidhani furaha ilikuwa mbele yetu, kumbe wakati mwingine furaha yenyewe ilikuwa pale tulipokuwa. Hapa niko na mwanangu @stanitoh85 🙏🏻

Vyeti Vya shule vitakuwezesha kupata kazi na pengine kupanda cheo. Mafanikio baada ya hapo yatategemea sana yale mambo tunayochukulia poa kama vile mahusiano mazuri wa watu; uwezo wa kuzikabili hisia; hulka ya kupenda mafanikio; na uwezo wa kutengeneza mtandao wa marafiki.