تمرّد حرف ثاير فالصدر واللي تشكّل قاف
بعد ماطال حكم الصمت طاح وفازت الثوره
عسى ربي يعين اللي يعيش وخاطره شفاف
لو انه يخفي كسوره عيونه تكشف كسوره
تمنّى يرمي الذكرى والايام العجاف خلاف
ولكن كيف يرميها وهي فالذهن محفوره
ما حدّ اكثر شواعير العرب ل اللعب والمشراف
سوى جرحٍ قديمٍ ينفتح لامن فتح صوره
معاذ الله من كلمه تعادل ضربة السيّاف
تدل القلب وتمرّه وتتمرجح على سوره
تقبّلها من الصدمة بتغميضة وضحكٍ جاف
وهو كنّه يحس الكون من حوله خذا دوره
يعيش بحرقها طول العمر في حالة استنزاف
ما يقدر ينتهي منها ولا يتدبّر اموره
ياليت الله جعل لي خاطر اليا عاف شيٍ عاف
ما كان ادنات حاجه تحرفه عن سيره وطوره
وش اللي بخسره لامن خذيت من السهاد لحاف
مادام ان الضمير ارتاح من ظلمه ومن جوره
يقوله من خذا جرعة من الدنيا وعاش وشاف
فهم بعض الامور اللي ما تِشرح وسط سبوره
16 نوفمبر 2026
9:52🪄
18
1,096
بين تيار الظروف وبين خطوات المساعي
صرّح المسؤول عن حلمي بمفلاس الذخيره
يا ضميري لا تعاتبني و تنشد عن ضياعي
البنادم لو تهرّب ما تهرّب عن مصيره
و الليالي ما تفكر في هدوّي و اندفاعي
والقدر ينرد بالدعوات يالعين السهيره
خابر انّي قبل خمس سنين قد كنت اجتماعي
غير مدري وش بلاني في السنوات الاخيره
🚶🏻♀️🪄-
ما تركته في حدود الممكنه والمستحيله
كنت أداري خاطره لو خاطره مدري علامه
وكنت أوقف له على ساق وقدم في كل ليله
لين أعدلها عقب ماهيب ميله وأستقامه
ان ثقل همه على متنه فـ أنا أول من يشيله
وان تمادى بالسهر ليله فـ أنا آخر من ينامه
يدري ان الدمعه اللي في طرف عيني ثقيله
وأدري ان عيونه اللي صدت أبلغ من كلامه
💫✨🪄⭐️🩶☕️
طرا لي رفيقً كنت احسبه ذرا وحزام
واشوفه في درب الطيب واليوم ضيعته
عليك العتب واللوم يالصاحب اللوّام
من الخاطر اللي ضيقة الوقت لايعته
بعد شفت دربك كله الغام تحت الغام
تصافحت مع كف المفارق وبايعته
انا وجعتي من موقفك كل دورة عام
مثل وجعة اللي دورة الوقت موجعته
( على كثر ما اتوقع خطا الناس والايام
خطاك الوحيد اللي حصل ما توقعته )
————💫🪄✨🗞️🩶————
تعابير الوجيه الصامته تستنطق اللمّاح
عيونك صارحتني في كلامٍ قد تحقّقته
ما تحمله المشاعر في الخفا تشعر به الارواح
وانا احساسي ماهوب يخونني لا قال صدّقته
تغانمني ترى ما عاد باقي لي كثر ما راح
ذبل غصنٍ رطيب وجف ماه وحتّت اورقته
على كيفك تبي تشقى معي والا تبي ترتاح
انا حلمٍ لغيرك ما تحقق في ملاحقته
ترى وجيه الليالي وانت داري شاحبه وشحاح
كم اغتالت لها ضحكه ويا كم شمل فرّقته
هقيتك تعتذر وتجي تراضيني وانا دمّاح
يا زين العذر لا من جاء من الغالين في وقته
ولا أكبر من ضياع الهقوه وقدر الكبير ان طاح
سوى اللي ما هقيت آفارقه يا لين فارقته
من يقفّي لا يرجي من وراي استعطفه بـ إلحاح
من يقفّي ، يقفّي والسلامه في مرافقته
على ذكرىً تزايفها الهبوب وسافية الارياح
سلام السامح اللي معتق جروحه ومعتقته
ما عاد يشوقني ضوح المزون وبرقها اللوّاح
لو انه باقيٍ في خاطري حلمٍ ما حققته
17
741
سو الي براسك ولا تذكر اسباب
لاصرت بايعني توكل على الله
مابيني وبينك مشاريه و اعتاب
شف دربك اللي جيت منه تدله
في ذمتي لجعلك عبره للاحباب
لين الخليل يتوب عن جرح خله
زلاتك الي مانفع فيهن احساب
لاجيت اعدهن على القلب عله
احرجتني بين القرايب و الاصحاب
كان الجفا سيفن في وجهي تسله
ماكنت اقصر فيك منكثر الاعجاب
يومك عندي تساوي الكون كله
كنت القريب وكلهم كانو اغراب
حتى القمر لاغاب شفتك محله
خلاص لاترجع ترا خاطري طاب
الخاطر الي كنت عايش في ظله
رح واعتبرني واحد اذنب و تاب
ماني بثوبن تلبسه ثم تمله
مايجتمع بالحب صادق و كذاب
رزقي على الله وانت رزقك على الله
———💫🪄✨———١
