من أعظيم القصايد / مدغم أبو شيبة
——————————————
سلام الله على ظلم الفراق وقسّوة الأيام
عسى ربي يسهلّ لك طريقك وتحيا وتدوم
رح ووجهك بياضه من بياض الصبح ماينلام
وانا من مدّة ايدين البخت يرضيني المقسوم
وش بيدّي وقف حظ الفقير وماتت الأحلام
إذا حبّك من أوّل يوم وفراقك من أوّل يوم
رقبتي قفلتين وسيف هجرانك مسيرة عام
جلدني وأنكرتي ملحة العشره وربعي قوم
يهونها لو أن الحظ يسّلك مسّلك الأقدام
ماكان أوصل حدود الأرض وأعوّد وأنا محروم
تصافق لك معاليق الضماير يا بعد من قام
وخلاني خصيم لوسعة الصدر ولذيذ النوم
أداري عبرةٍ ضامت عيوني والعيون تضام
وأكبّر هقوتي لا كبرت الشرهه وكبر اللوم
ياويلي من مناديب الضنون وطرقة الأوهام
تساويني معك في خانة المحمود والمذموم
تشوف أنّك على حد اليمن وتشوفني في الشام
وأشوف أنّا على وجه الحياه أثنين توم وتوم
تذكّر وأنت عنّي بعد الأبوّه عن الأيتام
رهين الغربه اللي من دياره ماتجيه علوم
بعد مادار عام من المفارق يا غرام العام
وروحي مابقى الا زفرتين وتبلغ الحلقوم
لا ترخص قيمتي لامن تذكرتك وأنا قدام
وجيهن تذكر الظالم ولا تدري عن المظلوم
مابعتك بالسحايب والبروق السمر والأنسام
وساموني بتلويحة وداع وبعت بأوّل سوم
سئمت العيش (نون وصاد) واللذات (سين ولام)
بنادم والبنادم حيلته ماتوجد المعدوم
مادام الصحف جفت وأنت رحت ورفعت الأقلام
على حبٍ من أوّل يوم وفراقٍ من أوّل يوم
آتساقى " شرهة الايّام " و أمدّ اعتِذاري
كلّ ما جفّ الكلام احتجت للرُّوح القديمه
آه يا ملْح السَّنين إن ضاع في ضحكتك ثاري ؟
الحقايق "مدلهمَّة شور" .. و الفرقى مْقيمه
جيتني ما كنّك الاَّ ؛ من حقوق الغيم ساري
و اِستعضت عٌن القصور الشَّامخه في ظلّ خيْمه
ما جهلت احساسك المرتاب لا زلّ اِختياري
مرَّت فصول السنة ؛ و النار تأكل من هشيمه
يا حبيبي و انت عارف قدري ، و خابر وقاري
لا تحدّ اللي زرع لك ورد ، و إسْتسقاك غيمه
فاتحٍ لْك كل ما هبّ الهوى الغربي .. زراري
والله إني لو معه عطرك ؟ تعلَّقت بـ نسيمه
السَّما مشهد وداع ، و ريبة شعورك غدَاري
و رغم هذا خازنٍ لـ "عيونك الثَّنتين" قيْمه
كيف احبّك ؟ و انت مستسهل غِيابي و انتظاري
كيف أعافك ؟ و الهوى غلَّاب ، و عيونك غنيمه
لا تحاول .. و الحبايب غافله و الشكّ طاري
المحبّه ! ما لها تالي ، و شرهتها ظليمه
اعرف الرأي " العقيم " ولا تخيّرتك مساري
اللّيَالي لو نعرف " ظْنونها " تبقى عقيمه
و أنت وحدك تستفزّ الصّمت و تردّ الطواري
ما قدرت ألدّ لك تقدير .. و إلا اصدّ شيمه
نجمةٍ مرّت تهادى بين شكّي ، و اقتداري
استباحت كل شيّ "وكل طقّه بـ تْعليمه "
جعلني لا ضاعت أحلامي و سيّرتك قراري
ما تخيّب هقوة عيونٍ بعد فقدك ؛ يتيمه
ولا تنشّد عن هزائم وقفتي ، و الاَّ انتصاري
الجروح اللي على خبْرَك؟ على خبْرَك قديمه
هات لي عُمر انتِظارتي ، وشعري ، و إعتِباري
و الحقيقة لو عواقبها .. على روحي وخيمه
كلّ دربٍ ما يجيب عيونك النِّجل اضطراري
و الدروب اللي تجيبك "يا آخر أحبابي" كريمه
كم مضى لي بين أداري جرحك الأول ، و أداري:
قلبٍ إن ضاع الكلام إشتدّ لك ؛ شِعر ، و عزيمه
ما عليّ من الجفاف .. إنْ طالت يْدينه دياري
" وين ما لدّيت اشوفك نوض برق و وبل غيمه "









