GeoTraverse_Group of Companies Ltd.

Hongera sana Ndugu Alphonce Lusako kwa kuaminiwa na kusajiliwa kama Wakili wa Mahakama Kuu ya Kenya. Alphonce Lusako, ni mmoja wa vijana waliopambana sana katika safari yao ya elimu bila kukata tamaa. Alifukuzwa chuo kikuu cha Dar es Salaam mwaka 2011 baada ya kuongoza harakati za kuwatetea wanafunzi waliokosa mkopo wa elimu ya juu. Wanafunzi hao walikuwa wamesajiliwa na bodi ya mkopo, na kusajiliwa chuoni lakini baadae walipata taarifa ya kutopata mkopo kwa sababu ya ufinyu wa bajeti ya serikali, na kwahiyo walitakiwa kujisomesha wenyewe au kuondoka chuoni. Kwa sababu ya harakati zake za kuwatetea wanafunzi wenzake, Alphonce aliyekuwa mwanfunzi wa BCom & Account, na wenzake 11 walifukuzwa chuoni UDSM. Alphonce alipambana sana kurudi chuoni bila mafanikio. Alifungua kesi mahakama kuu lakini hakupata majibu yotote kwa miaka 5 ya kesi hadi alipoamua kuondoa kesi ile mahakamani. Mwaka 2016 akiandika barua kwa Rais JPM ya kuomba msaada wa kurudi chuoni lakini hakupata majibu. Mwaka huohuo wa 2016 aliomba upya usajili wa chuo kikuu UDSM, akasajiliwa kusoma Bachelor of Economic, ingawa alipofika chuoni alibadili kozi na kuanza kusoma Bachelor of Law (LLB). Hata hivyo miezi michache baadae, Januari 2017 alifukuzwa tena chuoni kwa sababu iliyotajwa kuwa 'alisajiliwa kimakosa' Kuna sheria (au kanuni) ya vyuo vikuu inayozuia mwanafunzi akiyefukuzwa chuoni kusajiliwa tena. Nadhani inahusu vyuo vikuu vya umma. Niliwahi kusoma kanuni hii kwenye 'Prospectus' wakati nikiwa chuoni MUHAS. Nadhani ndio ilitumika kumfukuza Alphonce kwa mara ya pili. Aphonce hakukata tamaa. Aliamua kuomba usajili katika chuo kikuu kisicho cha serikali cha TUMAINI, ambako alisoma sheria na kufanikiwa kuhitimu Shahada yake ya kwanza Novemba 2020. Kwa sasa Alphonce Lusako ni Wakili Msomi wa Mahakama Kuu ya Tanzania baada ya kumaliza Shule ya Sheria (Law School) ya Dar es Salaam. Pia ni Wakili Msomi wa Mahakama Kuu ya Kenya baada ya kuaminiwa na Mahakama hiyo. Hongera sana Alphonce Lusako. Kioo cha mapambano ya kutafuta elimu kwa vijana wa Tanzania. Nawasilisha! Dr. Chris Cyrilo.