Хонгорхон минь

ЕРӨНХИЙЛӨГЧ БОЛ ХААН БИШ! МОНГОЛ УЛС ЕРӨНХИЙЛӨГЧИЙН ЗАСАГЛАЛТАЙ Ч УЛС БИШ! Ерөнхийлөгчөө шүүмжилж болохгүй юм бол Монгол Улсыг ардчилсан улс гэж нэрлэх хэрэг байна уу? Ерөнхийлөгчийн халдашгүй дархан байдал гэдэг нь түүнийг шүүмжлэлээс хамгаалсан хуяг, ард түмний дуу хоолойг боомилох эрх биш! Халдашгүй дархан байдал бол хариуцлагаас чөлөөлөгдөх эрх биш. Ерөнхийлөгч бол ард түмний дээр заларсан хаан биш, Үндсэн хуулийн хүрээнд ажиллах ёстой төрийн албан тушаалтан! Бид нэг зүйлийг зоригтой хүлээн зөвшөөрөх цаг болсон. Монгол Улс парламентын засаглалтай гэж тунхаглачихаад, бүх ард түмнээс сонгогдсон Ерөнхийлөгчид улс төрийн асар их нөлөө, эрх мэдэл төвлөрөх боломжийг хадгалсаар байна. Энэ бол засаглалын тогтолцооны суурь зөрчил! Үнэхээр сонгодог парламентын засаглалтай болъё гэвэл Ерөнхийлөгчийг ард түмнээс шууд сонгодог тогтолцоог халж, УИХ-аас эсвэл тусгай сонгуулийн байгууллагаар сонгодог, эрх мэдэл нь хатуу хязгаарлагдсан, үндсэндээ бэлгэдлийн шинжтэй институц болгох ёстой! Харин гүйцэтгэх засаглалыг тэргүүлж, улс орны хөгжлийн бодлого, эдийн засаг, төсөв, хөрөнгө оруулалт, төрийн удирдлагын үр дүнг хариуцах Ерөнхий сайдын эрх мэдэл, бие даасан байдал, бодлого хэрэгжүүлэх чадавхыг эрс нэмэгдүүлэх шаардлагатай! Мэдээж эрх мэдлийн хамт УИХ-ын бодит хяналт, улс төрийн хариуцлага ч улам хүчтэй байх ёстой. Хоёр толгойтой мэт ажилладаг гүйцэтгэх засаглал, эрх мэдлийн давхардал, улс төрийн байнгын сөргөлдөөнөөс бид хэзээ салах юм бэ? 2027 ОНД БИД ЧУХАМ ЮУНЫ ТӨЛӨӨ ЕРӨНХИЙЛӨГЧИЙН СОНГУУЛЬ ХИЙХ ГЭЭД БАЙНА ВЭ? Дараагийн П.Очирбат, Н.Багабанди, Н.Энхбаяр, Ц.Элбэгдорж, Х.Баттулга, У.Хүрэлсүхийг тодруулахын төлөө юу? Эсвэл улс төрийн эрх мэдлийн дараагийн төвийг, төрийн бодлогод нөлөөлөх дараагийн «түлхүүр баригч»-ийг сонгохын төлөө юу? Нэр нь өөрчлөгдөнө. Нам нь солигдоно. Нүүр царай нь шинэчлэгдэнэ. Харин тогтолцоо нь хэвээрээ үлдвэл улс төрийн хямралын үндэс хэвээрээ л байна! Сонгууль бүр ардчиллыг бэхжүүлдэггүй. Зарим сонгууль буруу тогтолцоог дахин дахин хууль ёсны мэт баталгаажуулдаг. Ард түмний шууд санал авсан гэдэг шалтгаанаар улс төрийн давхар эрх мэдлийн төв бий болгох нь парламентын засаглалыг бэхжүүлэх биш, харин ч сулруулах эрсдэлтэй. БИД ДАРААГИЙН ЕРӨНХИЙЛӨГЧ ХЭН БАЙХ ВЭ ГЭЖ МАРГАЛДАХААСАА ӨМНӨ ЕР НЬ ИЙМ ЭРХ МЭДЭЛТЭЙ ЕРӨНХИЙЛӨГЧ БАЙХ ШААРДЛАГАТАЙ ЮУ ГЭЖ АСУУХ ЁСТОЙ! Асуудал хувь хүндээ биш, тогтолцоондоо байна! Ардчилал гэдэг нь тав, зургаан жил тутам нэг хүнийг өргөмжлөх ёслол биш. Ардчилал гэдэг нь эрх мэдлийг хязгаарлаж, хариуцлагыг тодорхой болгож, төрийг институцээр нь удирдах тогтолцоо юм. Монгол Улсад дараагийн хүчирхэг Ерөнхийлөгч хэрэггүй. Харин хүчирхэг парламент, хариуцлагатай бөгөөд эрх мэдэлтэй Ерөнхий сайд, тогтвортой Засгийн газар хэрэгтэй! 2027 оны сонгуулийн өмнө Үндсэн хуулийн энэ суурь асуудлыг хэлэлцэх улс төрийн зориг бидэнд байна уу? Эсвэл дахиад л нэг хүний нэр тойрч талцан, таван жилээ үрж, дараагийн сонгуулийг хүлээх үү? ОДОО БОЛСОН ЮМ БИШ ҮҮ? ХҮНИЙГ НЬ СОЛИХ БИШ, ТОГТОЛЦООГ НЬ ӨӨРЧИЛЬЕ!

Урд хөршид юу болоод байна вэ? Оюу толгойн зэсийн баяжмалын экспорт Гашуунсухайт–Ганцмодны боомт дээр саатаж, сүүлийн хоёр долоо хоногт экспортын хэмжээ 70 хувиар буурсан гэх мэдээлэл байна. Зөвхөн энэ хугацаанд 300 сая ам.долларын экспорт тасалдаж, нөхцөл байдал он дуустал үргэлжилбэл уг дүн 1.2 тэрбум ам.долларт хүрч болзошгүй гэсэн тооцоо гарчээ. Энэ бол бидний олон жил ярьж ирсэн Оюу толгойн ногдол ашгийн хэмжээтэй дүйцэхүйц асар их мөнгө. Гэтэл улсын экспорт, валютын орлого, төлбөрийн тэнцэлд ийм хэмжээний эрсдэл үүсэж байхад Засгийн газар яагаад чимээгүй байна вэ? Урд хөршийн талд яг ямар асуудал үүссэн юм бэ? Экспортын саатлын бодит шалтгаан юу вэ? Хэзээ хэвийн болох вэ? Энэ бол зөвхөн Оюу толгойн асуудал биш. Монгол Улсын эдийн засаг, экспортын орлого, валютын нөөцтэй шууд холбоотой асуудал. Иймд Засгийн газар нөхцөл байдлыг тодорхой тайлбарлаж, авч хэрэгжүүлж буй арга хэмжээний талаар олон нийтэд мэдээлэл өгөх шаардлагатай байна. @NyamUchral