Bashar Jarrar بشّار جرّار

قيل كم سنة في الزرقاء، وتحديدا الساعة ٣ الفجر كان في شاب أردني اسمه عامر الحباشنة، وطاحونته مش مخليته يعرف ينام. من كثر الألم، رن على صاحبه الدكتور، وحكاله: "دكتور، ترى أنا متألم!" رد عليه: "عامر، هيني جايك!" وفعلا إجاه لحد بيته، أول ما صل رن عليه وقال: "هيني عندك على الباب انزل آخذك بسيارتي!" وراح فيه عالعيادة. بس لما وصلوا، اكتشف الدكتور إنه من قد ما هو مستعجل كان ناسي مفتاح العيادة! رن على زوجته أم يوسف، وحكالها: "الحقينا بمفتاح العيادة!" وفعلا، إجت أم يوسف وجابت المفتاح معها. صاحب قصتنا هو الدكتور محمد يوسف القسوس، من أقدم وأبرز أطباء الأسنان بالزرقاء، واللي أهل المدينة عرفوه باسم طبيب الفقراء! اللي بيجي يتعالج وما معه يدفع، كان يسامحه، وإذا محتاج دواء، يعطيه من عنده. وإذا الدواء مش موجود، يروح يجيبه من الصيدلية ويعطيه إياه. والصيدلانية بشرى الصرارية بتقول:" كان يرن علي ويقول لي دكتورة بشرى، الجماعة هذول حسابهم عندي! هالموقف ما صار مرة ومرتين، تكرر على مدى كل السنين اللي تعاملت معه فيها. هيك كان فاهم الطب، رسالة قيمتها برحمة صاحبها بالناس، لأنه المال ما كان هدفه، وأفنى عمره وهو يعالج مرضاه. وهاي الحنية، كانت موجودة كمان ببيته، مع زوجته وأولاده. زوجته أم يوسف بتحكي عنه: "محمد رفيقي، حبيبي، أنا عشت معاه، حياتي معاه، ودللني!" لكن يوم الجمعة الماضي، كان الدكتور محمد وزوجته طالعين من البيت باتجاه الكرك، بدهم يقوموا بواجب العزاء، وهم بالطريق شاف الوقت وحكالها: "خلينا نطلع شوي شوي، قزدرة، معنا وقت!" وطول الطريق، وهو يحكي معها ويحكيلها قصص، مرقوا عالقطرانة، أخذوا قهوة، وكملوا الطريق سوا. ولما وصلوا، صف السيارة، ونزلوا يمشوا مع بعض. وقف الدكتور محمد يسلم عالزلام، زوجته اتطلعت عليه، ودخلت وقعدت، وصارت تتطلع حواليها، تستناه يفوت، بتقول:"بالعادة، هو بدخل وبقعد جنبي، بس سبحان الله، نصيبه هالمرة إنه يظل برا!" وفجأة، سمعت صوت خبطة قوية، فكرت باب وقع، وما خطر ببالها إشي ثاني! لكن بعدها سمعت صوت طلق، وشافت القزاز يوقع، وعرفت إنه صوت رشاش! فجأة، بطلت عارفة وين هي، ولا شو اللي بصير حواليها. أخوه، الدكتور عمر، شاف زلمة وقع عالأرض، وفجأة، صار اللي يركض واللي ينزل عالأرض. محمد كان جنب إخوانه عمر وخالد نازلين على الأرض. بعد ما خلص الصوت، طلعت أم يوسف وشافت عمر واقف، وناداها: "تمارة، تمارة، هي محمد!" راحت عليه، وسألته: "محمد، إيش؟" رد عليها: "لا، لا، لا، ولا إشي، بس إجري!" بس هي تطلعت، وشافت الوضع مختلف، بتقول: "دمه ظل على إيدي! طلعوا فيه بسيارة الإسعاف، وراحت معه. ولما وصل ابنه ودخل على العناية الحثيثة، كان قدامه مشهد صعب كثير، بقول:"عمري ما رح أنساه، كان أبوي غايب عن الوعي!" ثاني يوم وحوالي الساعة ٣ ونص، بلش ضغط الدكتور محمد يرتفع لمستوى كويس، هالتحسن طمنهم شوي، فطلع ابنه باتجاه الكافتيريا، يجيب شوية أكل للناس اللي موجودين، لكنه ما لحق يوصل ورنوا عليه أهله: "ارجع هسه ضروري!" رجع وكان أبوه توفى. ومن بعدها، صارت أم يوسف تحكي عن رفيق عمرها: "تركني وراح وخلص، الله يسامحه!" أما ابنه فبقول: "الدنيا تغيرت، وصلنا لنقطة حياتنا كلها رح تتغير، لازم نتعود نعيش بعد ما خسرنا سندنا بحياتنا!" الدكتور محمد القسوس رحل بحادثة غادرة وآثمة، وترك وراه أهل فقدوا حنانه وسنده، ومرضى رح يظلوا يتذكروا رحمته فيهم. مريض سامحه بحسابه، ودواء دفع ثمنه من جيبته، وصاحب وجعته طاحونته، فراح أخذه بنفسه من بيته، الساعة ٣ الفجر. رحل طبيب الفقراء، ورح يظل ذكره الطيب حاضر. الله يرحم الدكتور محمد يوسف القسوس، ويصبر قلب زوجته وأولاده وأهله وكل محبينه، ويجزيه الخير عن كل وجع خففه، وكل إنسان وقف معه.