عبدالله النعيمي ‏

ما فيه داعي بلقيانا تعشِّمني نفسي من الوقت فيها اللي مكفِّيها   إلى متى وأنت تبنيني وتَهْدِمني وتشعل شموع الأمل وتْردّ تِطْفيها   واجهني، وطالع عيوني، وكلِّمني رسايل الهاتف الجوَّال ما آبيها   وإنْ كان به حاجةٍ تمنعْك علِّمني أحسن، ولا تلعب بنفسي طواريها   ماني بْلايِمْك يومك منت فاهمني "النار ما تحرق إلا رجل واطيها"   أغيب، والروح في الغربة تخاصمني متعلِّقة في الكويت وفي ضواحيها   وأعود، وألعن زمانٍ منْك حارمني وأمَنِّي النفس في بكرة، وأواسيها   أمرّ بيتك لعلّ الحظّ يَخدمني وألقَى عيونٍ رِسا القلب بْموانيها   النجَّل اللي لا طرُّوها تتيِّمْني حسبي على اللي يطرِّيك ويطرِّيها   الأشواق لِوْصالك أزْهَمْها وتَزْهَمني ولا هوب في ايديني، ولا هوب في ايديها   أشعر بشيٍّ على التنهيد يرغمني بوادر الصدّ يا الله لا تحيِّيها   يا خوفي إنِّك عقب هالودّ تصدمني والله يا نَبْرَتْك هذي إنّ البلا فيها   فإنْ كنت ناوي فراقي لا تعشِّمني نفسي من الوقت فيها اللي مكفِّيها