Lastborn

Inasikitisha sana kuona watu waliosoma wanashindwa kuona ukweli huo. Kulikuwepo amani wakati wakoloni wanatawala hiyo hakuwazuia wazee wetu kupigania uhuru. Tukaupata na baadaye tukawa Jamhuri maana yake nchi ya watu na si ya kifalme. Lengo kuu ni kustawi pamoja katika nchi ambapo watu wako huru na wanachagua viongozi wao. Tulianza vibaya bila kuwa na Haki za Binadamu katika Katiba yetu na tukaharamisha vyama vingi. Mwaka 1984 Haki za Binadamu zikaingizwa kwenye Katiba na mwaka 1992 tukaruhusu vyama vingi. CCM wakakataa mabadiliko ya Katiba ya kuwezesha Tanzania kuwa kweli nchi ya vyama vingi. Kila uchaguzi tumeshuhudia uporaji wa uchaguzi na hali ikaharibika 2015. Ushindi wa Magufuli dhidi ya Lowassa ulikuwa ni wa utata. Upinzani kwa kushikilia amani wakakubali kuibiwa ushindi wao. Vivyo ule 2020 ambapo Magufuli na CCM walipora uchaguzi mchana kweupe. Usisahau ule wa 2019 na 2024 wa Serikali za Mitaa. Waswahili wana msemo usemao "Mwenye macho haambiwi tazama" na Walatini, kupitia Wanasheria,wanasema "Res ipsa loquitur"(the matter speaks for itself) au suala linajieleza lenyewe. Ukweli huo umedhihirika mwaka huu. Hivi nani mtu mwenye dhamiri na roho iliyo hai anayeweza kusema kuwa tarehe 29 Oktoba, Samia alichaguliwa na Watanzania milioni 32? Nani anaweza kusema huku,akikumbuka amri ya kutosema uongo, kuwa kura zilizopigwa nchi nzima zilihesabiwa, matokeo yakatangazwa vituoni, yakatumwa kwenye Tume na mshindi halali akatangazwa? Nani anaweza kusema kuwa nchi hii ombaomba, inaweza kuzima mtandao kwa siku tano huku kukiwa na zuio la watu kutotoka nje, lakini Tume ikawa na uwezo wa kuhesabu kura na kumtangaza mshindi! Sasa kampeni ya kupigania mabadiliko ya Katiba ina miaka 32. CCM imekuwa inatumia kila mbinu kukwamisha mabadiliko hayo na kuwapachika majina ya ajabu ajabu wapinzani. Mara ni "vibaraka wa mabeberu", "wana uchu wa madaraka" " wanaotaka kuharibu amani ya nchi" na mengineyo mengi. CUF miaka ya 2000 mwanzoni kiliitwa chama Cha Kiislamu, Chadema chini ya Mbowe, chama cha Wachaga, na sasa kwa Lissu eti ni cha "wahaini na magaidi". Ukweli umedhihiri kuwa unaweza kudanganya watu wote kwa muda au kipindi fulani lakini si muda wote. Sasa uongo na propaganda za CCM zimeonekana na kubainika kwa vijana wengi ambao hali zao zinaendelea kuwa mbaya kila uchao. Vijana wametambua kuwa viongozi lazima wapatikane kupitia uchaguzi huru na WA haki. Kudai Hilo ambalo halitakiwi kupingwa na hata mmoja wetu kumesababisha Vifo vya Maelfu ya Watanzania wenzetu. Wameuawa si na Wapinzani bali vyombo vya dola. Serikali Gani halali inaamrisha Polisi na vikosi vya Usalama kuua watu au raia wake? Hiyo si Serikali inayofahamu wajibu wake wa Kikatiba wa kulinda uhai wa raia wake. Kuandamana ni haki ya msingi kabisa ya wanadamu katika nchi yoyote ile. Mahatma Gandhi aliwaongoza Wahindi milioni 300 kuwapinga Waingereza na kusababisha India na Pakistani kuwa huru. Martin Luther King Jr, aliwaongoza Waafrika wa Kimarekani kupinga ubaguzi wa rangi huko Marekani. Hapa Tanzania,nchi iliyokuwa mstari wa mbele kukomboa nchi nyingine Afrika, kuandamana kunageuzwa kuwa uhaini na ugaidi? Ikumbukwe kuwa Samia ni kiongozi ambaye katika kipindi cha miaka 4 na miezi 4 ya utawala wake, amewaweka ndani kwa muda wa zaidi ya mwaka mmoja na miezi minne viongozi wa Chadema na kuwafungulia mashitaka makubwa yau ugaidi na uhaini. Mbowe alikaa ndani miezi minane. Lissu naye sasa huu ni mwezi wa Saba. Mbowe alikuwa mwenyekiti na Lissu sasa ni Mwenyekiti. Sasa watu wanaona na wanadai mabadiliko. Samia na CCM walikataa. Samia akaunda Kikosi kazi kikatoa mapendekezo akayaweka kapuni. Akaunda Tume ya Haki Jinai, chini ya Jaji Mkuu Mstaafu Othman Chande na Ombeni Sefue. Tume hiyo ikasema Jeshi la Polisi livunjwe liundwe upya, Samia akakataa. Tulichovuna kutokana na kukataa huko pamoja na kutokuwepo Tume Huru ya Uchaguzi mauaji makubwa na kuaibisha ya Watanzania wenzetu. Cha ajabu hata Serikali hii haijasema hata tuwaomboleze. Mara ya kwanza iliwaita "wahuni.