Selvakumar Vaiyapuri(Dr. Anitha's Family)

“அவர் ஊத, இவர் ஆட” பாஜக சொல்ல தவெக செய்ய!!! மாநில சுயாட்சிக்கு எதிரான தமிழக வெற்றிக் கழகத்தின் நடவடிக்கை! பாஜகவின் விருப்பத்தை நிறைவேற்றுகிறதா விஜய் அரசு? இந்திய அரசியலமைப்புச் சட்டம் கூட்டாட்சித் தத்துவத்தை முழுமையாகப் பிரதிபலிக்காமல், வலுவான ஒன்றிய அரசுக்கு அதிக அதிகாரங்களை வழங்கும் ஒருமைத் தன்மை கொண்ட கூட்டாட்சி அமைப்பாக (Quasi-Federal) வடிவமைக்கப்பட்டுள்ளது. ஒன்றிய அரசுக்கு வழங்கப்பட்டுள்ள அதிகாரக் குவிப்பைக் கருத்தில் கொண்டுதான், மாநிலங்களுக்கான உரிமைகளும் அதிகாரங்களும் உறுதிப்படுத்தப்பட வேண்டும் என்று பேரறிஞர் அண்ணா அவர்கள் “மத்தியில் கூட்டாட்சி; மாநிலத்தில் சுயாட்சி” என்ற முழக்கத்தை முன்வைத்தார். அந்தக் கொள்கையின் வழியில், திராவிட முன்னேற்றக் கழகம் ஆட்சிப் பொறுப்பேற்கும் ஒவ்வொரு முறையும் மாநிலங்களின் உரிமைகளைப் பாதுகாப்பதற்கான சட்டரீதியான மற்றும் அரசியலமைப்புச் சட்டரீதியான நடவடிக்கைகளை முன்னெடுத்து வந்திருக்கிறது. தனக்குள்ள அரசியலமைப்புச் சட்ட அதிகாரத்தைப் பயன்படுத்தி ஆணையங்களை அமைப்பது, அவற்றின் பரிந்துரைகளை ஒன்றிய அரசிடம் சமர்ப்பிப்பது, தேவைப்படும்போது நீதிமன்றங்களை நாடுவது எனத் தொடர்ந்து மாநில உரிமைகளுக்காகப் போராடி வந்திருக்கிறது. அந்த வகையில், கடந்த திமுக தலைமையிலான திராவிட மாடல் ஆட்சியில், நீதியரசர் குரியன் ஜோசப் தலைமையில் மாநில சுயாட்சிக்கான உயர்நிலைக் குழு அமைக்கப்பட்டது. அக்குழு தனது முதற்கட்ட அறிக்கையை வழங்கியதோடு, இந்திய அரசியலமைப்புச் சட்டத்தில் மாநிலங்களின் உரிமைகளையும் அதிகாரங்களையும் வலுப்படுத்த வேண்டிய அவசியத்தையும் சுட்டிக்காட்டியது. இரண்டாம் கட்ட ஆய்வுப் பணிகள் தொடர வேண்டிய நிலையில், தற்போது ஆட்சிக்கு வந்துள்ள தமிழக வெற்றிக் கழக அரசு எவ்வித முன்னறிவிப்பும் இன்றி அந்தக் குழுவைக் கலைத்திருப்பது அதிர்ச்சியளிக்கிறது. தனது கொள்கைத் தலைவராகப் பேரறிஞர் அண்ணாவைக் கூறிக்கொள்ளும் தமிழக வெற்றிக் கழகம், அண்ணா வலியுறுத்திய மாநில சுயாட்சிக்கான முயற்சியையே முடக்குவது எத்தகைய முரண்பாடு? இந்தக் குழுவைக் கலைத்த தமிழக வெற்றிக் கழக அரசின் முடிவை பாஜக உடனடியாக வரவேற்றுக் கொண்டாடுகிறது. இதிலிருந்தே இந்த முடிவு யாருடைய அரசியல் விருப்பத்திற்கு உகந்ததாக இருக்கிறது என்பதைப் புரிந்துகொள்ள முடிகிறது. பாஜகவால் நேரடியாகச் செய்ய முடியாத பலவற்றை, தமிழக வெற்றிக் கழகத்தின் ஆட்சியின் மூலம் தமிழ்நாட்டில் நிறைவேற்றிக் கொள்ள முயற்சிக்கிறதா பாஜக என்ற கேள்வி எழுகிறது. சினிமாவில் சொல்வதைப் போல, “அவர் ஊத, இவர் ஆட” என்ற நிலைதான் தமிழ்நாட்டில் உருவாகிக் கொண்டிருக்கிறதோ என்ற சந்தேகத்தை இந்த நிகழ்வு வலுப்படுத்துகிறது. அண்ணா பெயரைச் சொல்லிக்கொண்டு, அண்ணா வலியுறுத்திய மாநில சுயாட்சியையே பலியிடுவது கொள்கை முரண்பாடு மட்டுமல்ல; தமிழ்நாட்டின் உரிமைகளுக்கு இழைக்கப்படும் அநீதியும் ஆகும்! தமிழ்நாட்டின் உரிமைகளைப் பாதுகாப்பதில் சமரசமில்லை! மாநில சுயாட்சியே நமது இலக்கு! #DMK #TVKVijay‌Fails