Lulu Robertson

MAKAMU WA RAIS AWABANA VIONGOZI SONGEA: BILIONI 3 ZA SOKO LA MANZESE ZAIBUA MASWALI MAZITO Makamu wa Rais wa Jamhuri ya Muungano wa Tanzania, Mhe. Deogratius Ndejembi, amewataka viongozi wanaosimamia miradi ya maendeleo kuacha kubembelezana na wakandarasi wanaoshindwa kutimiza wajibu wao, akionesha kukerwa na ucheleweshaji wa ujenzi wa Soko la Manzese A na B, mjini Songea. Mradi huo, ambao mkataba wake ulianza mwaka 2025 kwa kipindi cha miezi 18 na ulitarajiwa kukamilika Septemba 2026, umechelewa licha ya mkandarasi kulipwa shilingi bilioni 3 kama malipo ya awali. Akizungumza na wananchi wa Songea, wakati wa ziara yake mkoani Ruvuma, Makamu wa Rais amembana kwa maswali Mkurugenzi wa Halmashauri ya Manispaa ya Songea, Wakili Bashir Muhoja, akitaka kufahamu sababu za mkandarasi huyo kuongezewa muda wa utekelezaji hadi Machi 2027, wakati tayari imebainika kuwa anakabiliwa na udhaifu wa usimamizi na upungufu wa vifaa vya kazi. “Hebu tubadilike! Tuwe accountable na fedha za umma. High-level meeting inakusaidia nini?” amehoji Ndejembi, akipinga utaratibu wa viongozi kuendelea kufanya vikao vya kumbembeleza mkandarasi badala ya kuchukua hatua zinazohakikisha mradi unakamilika kwa wakati. Makamu wa Rais amemtaka Waziri mwenye dhamana ya TAMISEMI kuchukua hatua dhidi ya uzembe katika usimamizi wa mradi huo, akisisitiza kuwa viongozi lazima wawajibike kwa dhamana walizopewa. Aidha, ameiagiza TAKUKURU kuchunguza kampuni iliyopewa mradi huo, ikiwemo matumizi ya fedha za malipo ya awali, ili kubaini sababu za mkandarasi kushindwa kutekeleza wajibu wake licha ya kupokea fedha za walipakodi. Makamu wa Rais amesisitiza kuwa Serikali haiwezi kuvumilia uzembe unaosababisha wananchi kuendelea kupata kero, huku fedha nyingi za umma zikiwa zimetumika bila miradi kukamilika kwa wakati. Kauli ya Makamu wa Rais imebeba ujumbe mzito kwa viongozi na watendaji wa Serikali: Fedha za wananchi si za kubembelezana na wakandarasi; kila mwenye dhamana ya kusimamia miradi ya maendeleo lazima awajibike. Makamu wa Rais anaendelea na ziara ya kikazi katika Mkoa wa Ruvuma, akitarajiwa kuelekea mikoa ya Mtwara, Lindi na Pwani. Imetolewa na Ofisi ya Makamu wa Rais 10 Novemba 2026 Songea – Ruvuma.

RAIS SAMIA KUELEKEA UTURUKI KUSHIRIKI MKUTANO WA KIMATAIFA WA TABIANCHI (COP31) 🇹🇿🇹🇷 Rais wa Jamhuri ya Muungano wa Tanzania, Mheshimiwa Dkt. Samia Suluhu Hassan, anatarajiwa kushiriki Mkutano wa 31 wa Umoja wa Mataifa kuhusu Mabadiliko ya Tabianchi (COP31), unaofanyika jijini Antalya, nchini Uturuki, kuanzia Novemba 9 hadi 20, 2026. Mkutano huo unawakutanisha viongozi wa nchi mbalimbali, taasisi za kimataifa, wataalamu na wadau wa mazingira kujadili hatua za pamoja za kukabiliana na mabadiliko ya tabianchi na kujenga mustakabali endelevu. Masuala muhimu yanayotarajiwa kujadiliwa ni pamoja na: Ufadhili wa kukabiliana na mabadiliko ya tabianchi. Mpito kuelekea matumizi ya nishati safi. Ulinzi wa mazingira na uhifadhi wa misitu. Kukabiliana na athari za ukame, mafuriko na ongezeko la joto. Kuimarisha ustahimilivu wa uchumi na jamii dhidi ya mabadiliko ya tabianchi. Nafasi ya Tanzania Ushiriki wa Tanzania katika mkutano huo ni fursa muhimu ya kuendeleza diplomasia ya mazingira, kuwasilisha vipaumbele vya taifa na kutafuta ushirikiano pamoja na uwekezaji katika nishati safi, kilimo himilivu na maendeleo endelevu. Aidha, Tanzania ina tukio maalumu katika COP31 litakalojadili mpango wa mpito wa nishati na matumizi ya nishati safi katika shule na vituo vya afya, Novemba 11, jijini Antalya. Tukio hilo limetajwa kumshirikisha Rais Samia Suluhu Hassan. #SamiaCOP31 #NishatiSafiSamia