Prava Basnet

लक्ष्मी ! यसपालि तिमी धनीहरूको दरबारमा मात्रै नबसिदेऊ अलिकति समय निकालेर त्यो सानो झुपडीमा पनि पसिदेऊ जहाँ चाडपर्व आउँदा खुसीभन्दा पहिले घरको चुलो कसरी बाल्ने भन्ने चिन्ता आउँछ। त्यो घरमा पनि बसिदेऊ जहाँ उज्यालो बाल्ने तेलसमेत ऋणमा किनिन्छ जहाँ साँझ परेपछि अँध्यारो मात्रै होइन भोलिको बिहान कसरी टार्ने भन्ने चिन्ता पनि पस्छ। जहाँ आमाले छोराछोरीको भोक लुकाउन पानी पिएर रात काट्छिन् जहाँ बुबाले खाली खल्ती छाम्दै भोलि केही व्यवस्था होला कि भनेर आफ्नै मनलाई सम्झाइरहन्छन्। लक्ष्मी ! तिमीलाई सुनको थालमा राखिएको प्रसाद मात्रै प्रिय नलागोस् कहिलेकाहीँ गरिबको घरमा पाकेको नुन र खुर्सानीको ढिँडो पनि स्वीकार गरिदेऊ। तिमीलाई महँगा बत्तीहरूको झिलिमिली मात्रै मन नपरोस् वर्षौँदेखि चुहिने छानोमुनि एउटा सानो दियो बालेर बसेको परिवारको आशा पनि देखिदेऊ। #विनोदविनोदी